भांगरभूंय | प्रतिनिधी
हैदराबादः भारतीय पंगडाचो स्पीनर युजवेंद्र चहलान आयपीएल 2023 सर्तीत आपले स्पीन बॉलिंगेची जादू दाखयत हैदराबादच्या सनरायजर्साची बॅटिंग मातयेभरवण करून राजस्थान रॉयल्साक तांचे पयलेच मॅचींत 72 धांवड्यानी जैत मेळोवन दिलें. दोनूय पंगड तांच्या कांय मुखेल खेळगड्या विणे खेळटाले. अशे स्थितींत दोनूय पंगडा सामकार सर्तीची सुरवात जैतान करपाचें व्हड आव्हान आशिल्लें. तातूंत राजस्थानान बाजी मारली.
सनरायझर्स हैदराबादान राजीव गांधी स्टेडियमाचेर जाल्ले हे मॅचींत टॉस जिखून पयलीं बॉलिंग करपाचो निर्णय घेतलो. राजस्थान रॉयल्सान पयलीं खेळून हैदराबादा सामकार जैता खातीर 204 धांवड्यांचे लक्ष्य दवोरलें. मात हैदराबाद फकत 131 धांवड्यो करपाक शकलो. व्हडल्या आव्हानाचो फाटलाव करतना हैदराबादाची सुरवात सामकीच बाबत जाली. शून्याचेर तांच्यो दोन विकेटी पडल्यो. अभिषेक शर्मा आनी राहुल त्रिपाठी शू्न्याचेर आवट जाले. ट्रेंट बोल्टान पयलेच ओव्हरींत तांकां आवट करून हैदराबादाक दोट्टी धपको दिलो.
ते उपरांत युजवेंद्र चहलान हॅरी ब्रुकाक (13) आवट करून तांका तिसरो धपको दिलो, वॉशिंग्टन सुंदर लेगीत सवाय भितर आवट जालो. आश्विनान ग्लेनाक आवट केलें. ओपनर मयांक अग्रवालान एक बाजू लावंन धरून डाव साल्वार करपाचो यत्न केलो मात तो 23 बॉलांत 27 धांवड्यो करून आवट जालो. भुवनेश्वर कुमाराक आवट करून चहलान मॅचींतली चवथी विकेट घेतली. ह्यो चारूय विकेटी ताणे फकत 17 धांवड्यो दिवंन घेतल्यो. हे उपरांत अब्दुल समद आनी उमरान मलीक हांणी थोडे शॉट मारले मात पंगडाक हारींतल्यान ते वाटावपाक शकले नात.
पयलीं बॅटिंग करपी राजस्थान रॉयल्साक जॉस बटलर आनी येसस्वी जैस्वालान बरी सुरवात करून दिली. ताणी पयले विकेटी खातीर 85 धांवड्याची भागिदारी केली. पॉवरप्लेच्या निमणे ओव्हरींत बटलरान 22 बॉलांत 54 धांवड्यो करून पॅव्हिलियनांत परत आयलो. ताणे 7 चौके आनी 3 सके मारले. जैस्वालान कॅप्टन संजू सॅमसना वांगडां अर्द शेंकड्याची भागिदारी केली. येसस्वीन 9 चौक्यांनी 37 बॉलांत 54 धांवड्यो करून आवट जालो. देवदत्त पडिक्ललाक उमरान मलिकान बोल्ड केलें, रियान परागान 7 धांवड्यो केल्यो. हेटमायर आनी आश्विनान 6वे विकेटी खातीर 9 बॉलांत 16 धांवड्यांची भागिदारी केली. ताका लागून राजस्थानाक 200चो टप्पो हुपलो. नटराजन आनी फारुकीन दरेकी दोन विकेटी घेतल्यो. हेटमायर 22 धांवड्यांचेर नाबाद रावलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
