भांगरभूंय | प्रतिनिधी
इंडियन प्रिमियर लिगेची (आयपीएल) 13वी मॅच राजस्थान रॉयल्स आनी मुंबय इंडियन्स ह्या पंगडां मदीं जातली. चालू हंगामांतली ह्या पंगडांची ही तिसरी मॅच आसा. राजस्थान रॉयल्सान आपल्यो पयल्यो दोनूय मॅची जिखून जैताची धांव कायम राखल्या, जाल्यार मुंबय इंडियन्सान एक जैत जाल्यार एक हार घेतल्या.
दोनूय पंगडां मदीं अजून मेरेन 30 मॅची जाल्यात. हातूंतल्यो 16 जाल्यार राजस्थानान 14 मॅची जिखल्यात. पूण, 2022 सावन दोनूय पंगडां मदीं चुरस पळोवपाक मेळ्ळ्या. फाटल्या स मॅचींनीतल्यो तीन मॅची मुंबयन जाल्यार तीन मॅच राजस्थानान जिखल्यात. गुवाहाटींत मुंबय इंडियन्स पयलेच खेपे खेळटा.
मुंबयचो रोहित शर्मा सध्या जबरदस्त फॉर्मांत आसा. पयले मॅचींत 78 जाल्यार दुसरे मॅचींत 35 धांवड्यांची खेळी केल्ली. पूण, राजस्थानाचे बॉलराक रोहित शर्माक आडावपाक शकतात.
संदीपान रोहिताक 12 डावांतल्यान 5 खेपे बाद केला, रोहिताची ताचे आडची स्ट्रायक रेट फक्त 86 आसा. जोफ्रा आर्चरान रोहिताक आठ डावांतल्यान तीन खेपे बाद केला. रवी बिश्नोईन लेगीत ताका स डावांतल्यान तीन खेपे तंबूंत धाडला.
विशेश म्हणल्यार, राजस्थाना आड फाटल्या पांच डावांनी रोहिताक चार खेपे दोट्टी आंकडो लेगीत हुपपाक जमूंक ना.
राजस्थानाचो फिनिशर शिमरॉन हेटमायराक जसप्रीत बुमरा पसून सादूर रावपाची गरज आसा. बुमरान ताका 10 डावांत वट्ट 6 खेपे बाद केला. जाल्यार हेटमायराक ताच्या आड फक्त 74चे स्ट्रायक रेटीन धांवड्यो करपाक जमल्यात. मुंबय आड हेटमायराची सरासरी (14.1) ही खंयच्याय आयपीएल पंगडां आडची ताची सगल्यांत बाबत कामगिरी आसा.
हे मॅचींत ओपनरांची भुमिका निर्णायक थारतली. 2025 सावन किमान 500 धांवड्यो करपी जोडयां मदीं वैभव सूर्यवंशी आनी यशस्वी जयस्वाल हांची जोडी 200चे स्ट्रायक रेटी सयत पयले सुवातेर आसा. दुसरे वटेन रायन रिकल्टन आनी रोहित शर्मा ही जोडी 164चे स्ट्रायक रेटी सयत चवथे सुवातेर आसा. यशस्वी जयस्वालान मुंबय आड दोन शेंकडे मारले आसले, तरी 8तल्या 5 डावांनी तो 15 धांवड्यांचे भितर बाद जाला.
फाटले मॅचींत अर्द शेंकडो मारपी सूर्यकुमार यादवाक रोहिता भशेन सादूर रावपाची गरज आसा. संदीप शर्मा, जोफ्रा आर्चर, रवी बिश्नोई आनी रवींद्र जडेजा ह्या चवगांनी सूर्यकुमाराक प्रत्येकी 3 खेपे बाद केला. विशेश म्हणल्यार संदीप आनी जडेजा आड सूर्याची स्ट्रायक रेट 100चे सकयल आसा, ताका लागून ताका मदले ओव्हरींनी सामको सादरतायेन खेळचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
