राजस्थाना मुखार बंगळुरूचें खर आव्हान

भांगरभूंय | प्रतिनिधी

इंडीयन प्रिमीयर लिगेंत (आयपीएल) आयज राजस्थान रॉयल्स आनी रॉयल चॅलेंजर्स बंगळुरू ह्या पंगडां मदीं अॅलिमिनेटर मॅच जातली. लिगेच्या दुसऱ्या टप्प्यांतल्या मॅचींनी राजस्थान रॉयल्साचें प्रदर्शन सामकें खालावलें, जाल्यार दुसरे वटेन रॉयल चॅलेंजर्स बंगळुरून आपल्या अखेरच्या मॅचींनी जबरदस्त प्रदर्शन करून प्ले ऑफांतली सुवात निश्चीत केली.

आयचे नॉकआवट मॅचींत फास्ट बॉलर ट्रॅण्ट बोल्ट राजस्थान रॉयल्सा खातीर फायदेशीर थारुये. आयपीएलाच्या अखेरच्या मॅचींतलें ताचें प्रदर्शन पळयलें जाल्यार ताची इकॉनोमी रेट लीग सुरवातीच्या मॅचीं परस उत्कृश्ट जाता. विकेटी लेगीत चड घेता.

नॉकआवट मॅचींनी खेळपाचो अणभव बंगळुरूच्या फकत तीन बॅट्समनांक आसा. मुळाव्या पांवड्या मॅचींतलो आपलो फॉर्म नॉकआवटांत कायम राखपाक तांकां अपेस आयलां. बोल्ट हाचो फायदो घेवपाक शकता. रजत पाटीदारान बंगळुरू वतीन नॉकआवटांत फकत दोनूच मॅची खेळ्ळा. पूण, ताणें 177चे स्ट्रायक रेटीन 170 धांवड्यो केल्यात.

विराट कोहलीची सुरवातीचे स्ट्रायक रेटीचेर बरीच टिका जाल्ली. पयल्या स मॅचींनी 95 बॉलांनी 131चे स्ट्रायक रेटीन 124 धांवड्यो केल्यो. पूण, फाटल्या आठ मॅचींनी ताणें 117 बॉलांनी 187चे स्ट्रायक रेटीन 219 धांवड्यो केल्यात. सुरवातीच्या मॅचींनी ताची स्ट्रायक रेटी पंगडाचे हारीचें कारण लेगीत थारिल्ली. फाटल्या आठ मॅचींनी ताणें सगल्या बॉलरां आड आक्रमक बॅटींग केल्या. दावखुऱ्या स्पिनरां आड तो साबार खेपे बाद जाला. पूण, फाटल्या आठ मॅचींनी तांकां लेगीत सोडूंक ना.

राजस्थान रॉयल्साचो स्पिनर युजवेंद्र चहलाचो फॉर्म फाटल्या दोन हंगामा कडेन तुळां केली जाल्यार खालाविल्लो. डॅथ ओव्हरींतलो ताचो प्रभाव लेगीत उणो जाला. जयपूरांत बंगळुरू आडचे मॅचींत ताणें चार ओव्हरींनी 34 धांवड्यो दिवन दोन विकेटी घेतिल्ल्यो. बंगळुरूचे बॅट्समन चहला आड सहज बॅटींग करता. खास करून कॅमरून ग्रीन आनी ग्लॅन मॅक्सवॅल हांणी ताच्या आड वळेरेन 246 आनी 177चे स्ट्रायक रेटीन धांवड्यो केल्यात. पूण, ताणें मॅक्सवॅलाक पांच खेपे बाद लेगीत केला. कोहलीन ताच्या आड 127चे स्ट्रायक रेटीन धांवड्यो केल्यात. फाफ ड्युप्लेसीस आनी दिनेश कार्तिक हे चहला आड खेळटना संघर्श करता. ताणें दोगांकूय तीन-तीन खेपे बाद केल्यात.