राजस्थानान हातांतली मॅच वगडायली

भांगरभूंय | प्रतिनिधी

इंडियन प्रिमीयर लिगेचे (आयपीएल) 26वे मॅचींत लखनौ सुपर जायण्ट्सान राजस्थान रॉयल्साक 10 धांवड्यांनी हारयलो. ह्या जैता उपरांत लखनौ सुपर जायण्ट्स गुणतकट्यांत तिसरे सुवातेर पावलो.

राजस्थानान मोख ल्हान आसा म्हणून लखनौक गृहीत धरलो. यशस्वी जैस्वाल आनी जॉस बटलर ह्या ओपनरांनी सुरवातीच्यो 10 ओव्हरी खेळून काडल्यो. पूण, तांणी लेगीत मॅच सामकी हलकी घेतली. ताका लागून 156 धांवड्यांचो फाटलाव करतना राजस्थानाक संघर्श करचो पडलो. देवदत्त पडिक्कल आनी रियान पराग हांणी अखेरच्या ओव्हरींनी शॉर्ट मारले. पूण, ते मेरेन उशीर जाल्लो. देवदत्त अखेरचे ओव्हरींत बाद जालो आनी राजस्थानान मॅच वगडायली.

लखनौन दिल्ले 155 धांवड्यांचे मोखीचो फाटलाव करतना राजस्थान रॉयल्साक 6 विकेटी वगडावन 144 धांवड्यो करप शक्य जाल्यो.

ते पयलीं राजस्थान रॉयल्सान रॉयल्सान टॉस जिखून पयलीं फिल्डींग करपाचो निर्णय घेतलो. पूण, सुरवातीच्या कांय ओव्हरींनी राजस्थान रॉयल्साच्या फिल्डरांनी लोकेश राहुलाच्यो दोन सोंप्यो कॅची सोडल्यो. राजस्थानाच्या बॉलरांनी धांवगती आडावन धरिल्ली. पूण, विकेटी मेळिल्ली जाल्यार ताची पकड आनीक घट जातली आशिल्ली. सेट जाल्ल्या राहुल आनी कायल मायर्स हांणी ल्हवल्हव हात मेकळे करपाक सुरवात केली. लोकेश बरी बॅटींग करपाक लागलो. ताणें धांवगती वाडोवपाचो यत्न केलो. 11वे ओव्हरींत जेसन होल्डरान येस मेळोवन दिलें. लोकेश 22 बॉलांनी चार चवके आनी एक सक्याचे मजतीन 39 धांवड्यो करून कॅच बाद जालो.

राजस्थानाचो मुखेली संजू सॅमसनान रोखडोच ट्रॅण्ट बोल्टाक परतून बॉलींग करपाक हाडलो. ताणें आयुष बदोनीक (1) बोल्ड करून राजस्थानाक दुसरें येस मेळोवन दिलें. बोल्टान 4-1-16-1 असो स्पेल घालो. पूण, मायर्स वेगळ्याच मुडांत आशिल्लो. ताणें 40 बॉलांनी अर्द शेंकडो पुर्ण केलो. दीपक हुड्डा (2) परतून अपेशी थारलो. आश्विनाच्या बॉलाचेर सको मारपाच्या यत्नांत हेटमायराक कॅच दिवन तंबूंत परतलो. आश्विनान तेच ओव्हरींत लखनौक आनीक खर धपको दिलो. ताणें मायर्साक बोल्ड केलो. मायर्सान 42 बॉलांनी चार चवके आनी तीन सक्यांचे मजतीन 51 धांवड्यो केल्यो.युजवेंद्र चहल मात बरोच म्हारग पडलो. ताणें चार ओव्हरींनी 41 धांवड्यो दिल्यो.

राजस्थानान डॅथ ओव्हरींनी बरी बॉलींग घाली. मार्कस स्टॉयनीस आनी निकोलस पुरन हे बीग हिटर खेळपट्टीचेर आसून लेगीत लखनौक मोठी धांवसंख्या उबारपाक जमली ना.

19वे ओव्हरींत पुरनान एक सको आनी दोन चवके मारले. 20वे ओव्हरींत संदीप शर्मान स्लोव्हर बावन्सराचेर स्टॉयनीसाक (21) बाद केलो. अखेरेक लखनौक 7 विकेटी वगडावन 154 धांवड्यो करप शक्य जाल्यो.