भांगरभूंय | प्रतिनिधी
अंदूंच्या हंगामांत घरच्या मैदानार पयले खेपे खेळपी पंजाब किंग्साक राजस्थान रॉयल्सा कडल्यान 50 धांवड्यांनी हार घेवची पडली. मुल्लांपूर स्टेडियमार पंजाबान टॉस जिखून पयलीं राजस्थानाक बॅटींग करपाचें आमंत्रण दिलें. राजस्थानान यशस्वी जयस्वालाचो (67) अर्द शेंकडो आनी रियान परागाच्या म्हत्वाच्या धांवड्यां नेटार 4 विकेटी व्हगडावन 205 धांवड्यो केल्यो. ते उपरांत मोखीचो फाटलाव करपी पंजाबान 43 धांवड्यांचेर 4 विकेटी व्हगडायल्यो. नेहल वडेहरा आनी मॅक्सवॅल हांणी आपल्या पंगडाक जैत मेळोवन दिवपाचो यत्न केलो. पूण, तांचे यत्न उणें पडले. नेहावालान 62 जाल्यार मॅक्सवॅलान 30 धांवड्यांचें योगदान दिलें. पंजाबाक 20 ओव्हरींनी 9 विकेटी व्हगडावन 155 धांवड्यो करप शक्य जाल्यो. अंदूच्या हंगामांतली पंजाबाची ही पयली हार थारली.
जयस्वाल आनी मुखेली संजू सॅमसनान राजस्थानाक बरी सुरवात करून दिली. दोगांयनी पयले विकेटी खातीर 89 धांवड्यांची भागिदारी केली. सॅमसनान 26 बॉलांनी 38 धांवड्यांचें योगदान दिलें. जयस्वालान 45 बॉलांनी 67 धांवड्यो केल्यो. तिसरे सुवातेर बॅटिंगेक आयिल्ल्या परागान 25 बॉलांनी तीन चवके आनी तीन सक्यांचे मजतीन 43 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
