भांगरभूंय | प्रतिनिधी
चेन्नय सुपरकिंग्स शुक्रारा गुजरात टायटन्सा आड रातीं कडेन मॅच खेळिल्लो आनी आयज दनपारां परतून मैदानांत देंवतलो. आयचे मॅचींत तो राजस्थान रॉयल्सा आड घरच्या मैदानाचेर खेळटलो.
राजस्थान रॉयल्स जैत जोडून प्ले ऑफांतली सुवात निश्चीत करपाच्या यत्नांत आसतलो. दुसरे वटेन चेन्नय सुपरकिंग्साचें अजून कांय निश्चीत ना. दोनूय पंगडां मदीं अजून मेरेन 28 मॅची जाल्यात. हातूंतल्यो चेन्नय सुपरकिंग्सान 15 आनी राजस्थानान 13 मॅची जिखल्यात. फाटल्या सेगीत चार मॅचींनी राजस्थानान चेन्नयाक हारयला.
चेन्नय सुपरकिंग्साचो मुखेली ऋतुराज गायकवाडान एकल्यानूच बॅटिंगेंत पंगडाचें वजें उखल्लां. 12 मॅचींनी 541 धांवड्यो करून अंदूंच्या हंगामांत सगल्यांत चड धांवड्यो करपाचे वळेरेंत दुसरे सुवातेर आसा. पूण, ताका आडावपाक राजस्थाना कडेन दोन बॉलर आसात. डावाचे सुरवातीक फास्ट बॉलर ट्रॅण्ट बोल्ड ताका आडावपाचें काम बरें तरेन करपाक शकता. टी-20 क्रिकेटींत बोल्टा चारातल्या तीन डावांनी गायकवाडाक बाद केला. तशेंच गायकवाडाक ताच्या आड बरी बॅटींग करपाक जमूंक ना. आठा परस उणे सरासरीन आनी 92 परस उणे स्ट्रायक रेटीन ताणें धांवड्यो केल्यात. बोल्टा खेरीत युजवेंद्र चहलान लेगीत गायकवाडाक घाम काडला. चहलान पांचातल्या तीन डावांनी ताका बाद केला. पूण, चहला आड गायकवाडाची स्ट्रायक रेट 125 परस चड आसा.
बोल्टान पावर प्लेंत बरी बॉलींग केल्या. फाटल्या पांच हंगामांनी सेगीत सात वा ताचे परस उण्यो धांवड्यो प्रती ओव्हरीन दिल्यात. 2020तल्या हंगामांत पावर प्लेंत सगल्यांत चड विकेटी घेवपी बॉलर आशिल्लो. बोल्टान 6.9चे इकोनॉमीन 48 विकेटी घेतल्यात. ताच्या फाटल्यान मोहम्मद शमी आशिल्लो. शमीन 7चे इकोनॉमीन 39 विकेटी घेतल्यात. अंदूंच्या हंगामांत बोल्टान पावरप्लेंत 11 डावांनी सात विकेटी घेतल्यात. अंदूंच्या हंगामांत सनरायझर्स हैदराबादाच्या भुवनेश्वर कुमारान पावरप्लेंत सगल्यांत चड विकेटी घेतल्यात. भुवीन 12 मॅचींनी 10 विकेटी घेतल्यात.
टी-20 मॅचीं खातीर मदल्यो ओव्हरी सामक्यो म्हत्वाच्यो आसतात. कारण पावरप्ले सोंपल्या उपरांत बॉलींग करपी पंगड धांवड्यांची गती उणी करपाच्या यत्नांत आसता.
अंंदूच्या हंगामांत राजस्थान रॉयल्सा वतीन संजू सॅमसन आनी रियाग पराग हाणें मदल्या ओव्हरींनी उत्कृश्ट बॅटींग केल्या. परागान 10 डावांनी 73.5चे सरासरीन अंदूंच्या हंगामांत मदल्या ओव्हरींनी सगल्यांत चड 294 धांवड्यो केल्यात. सॅमसनान सात डावांनी 123चे सरासरीन 246 धांवड्यो केल्यात. राजस्थानान अंदूंच्या हंगामांत मदल्या ओव्हरींनी सगल्यांत उण्यो 18 विकेटी व्हगडायल्यात.
अंदूंच्या हंगामांत पयल्या पांच बॉलांचेर महेंद्रसिंग धोनीन सगल्यांत जलद धांवड्यो केल्यात. ह्या हंगामांत पयल्या पांच बॉलांक तोंड दितना 36 बॉलांनी 82 धांवड्यो केल्यात. ताची स्ट्रायक रेट 227 परस चड आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
