भांगरभूंय | प्रतिनिधी
युवा बॅट्समन यशस्वी जैस्वालान काल इडन गार्डन्स गाजयलें. फकत 13 बॉलांनी जलद अर्द शेंकडो नोदयल्या उपरांत लेगीत ताच्या बॅटांतल्यान चवक्या-सक्यांचो पावस चालूच उरलो. जेसन रॉय शुन्याचेर बाद जाल्या उपरांत यशस्वीन कोलकाता नायट रायडर्साच्या बॉलरांची बॉलींग फोडून काडली. ताकाच लागून राजस्थान रॉयल्सान सोंपें जैत जोडलें. कोलकातान दिल्ली 150 धांवड्यांची मोख राजस्थानान 13.1 ओव्हरींनी 1 विकेट वगडावन मेळयली. मुखेली संजू सॅमसनान ताका योग्य अशी साथ दितना 69 बॉलांनी नाबाद 121 धांवड्यांची भागिदारी केली. राजस्थान रॉयल्सान 13.1 ओव्हरींनी 9 विकेटी राखून जैत जोडलें.
यशस्वीन पयलेच ओव्हरींत 26 धांवड्यो करून आपलो इरादो स्पश्ट केलो. मुखेली नितीश राणान धाडस दाखयलें आनी यशस्वीन 6,6,4,4,2,4 असो स्कोर केलो. हर्षित राणाचे दुसरेच ओव्हरींत जेसन रॉय (0) शुन्याचेर बाद जालो. पूण, यशस्वीन अखेरच्या दोन बॉलांचेर ताची लेगीत बॉलींग फोडून काडली. यशस्वीन 13 बॉलांनी अर्द शेंकड्याची नोंद केली. आयपीएलाच्या इतिहासांतलो हो जलद अर्द शेंकडो थारलो. ताणें लोकेश राहुल (14) आनी पॅट कमिन्स (14) हांचो विक्रम मोडलो. ते उपरांत लेगीत यशस्वीची आक्रमक बॅटींग चालूच उरली. ताणें आनी सॅमसन हांणी आठ ओव्हरींनी 100 धांवड्यो पुर्ण करून दिल्यो.
यशस्वीन पावर प्लेंत 62 धांवड्यो केल्यो आनी ताणें डॅव्हिड वॉर्नराच्या विक्रमा कडेन बरोबरी सादली. सुरेश रैनान पंजाब किंग्सा आड पावर प्लेत सगल्यांत चड 87 धांवड्यो केल्यात. अॅडम गिलक्रिस्टान दिल्ली आड 74 आनी इशान किशनान हैदराबादा आड 63 धांवड्यो केल्ल्यो.
मजगतीं, सुनील नरेनान आपलेच बॉलिंगेचेर संजू सॅमसनाचो 16 धांवड्यांचेर कॅच सोडिल्ली. ते उपरांत संजून कसलीच संद दिली ना. संजून टी-20त पांच हजार धांवड्यो पुर्ण केल्यो. 11वे ओव्हरींत संजून अनुकूल रॉयाक तीन चवके मारले. संजू आनी यशस्वी हांणी 58 बॉलांनी शेंकड्याची भागिदारी पुर्ण केली. संजून 29 बॉलांनी 2 चवके आनी पांच सक्यां सयत नाबाद 48 धांवड्यो केल्यो. यशस्वीन 47 बॉलांनी 12 चवके आनी पांच सक्यांचे मजतीन नाबाद 98 धांवड्यो केल्यो.
ते पयलीं वेंकटेश अय्यराक (57) सोडलो जाल्यार कोलकाता नायट रायडर्सा वतीन कोणाक व्हड खेळी करपाक जमली ना. राजस्थान रॉयल्साच्या बॉलरांनी बरी बॉलींग घाल्लीच. पूण, ताच्या खेळगड्यांनी जबरदस्त कॅची आनी फिल्डींग करून बॉलरांक बरी साथ दिली.
युजवेंद्र चहलान चार विकेटी घेतल्यो. आयपीएलाच्या इतिहासांत सगल्यांत चड विकेटी घेवपाचो विक्रम आपल्या नांवाचेर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
