राजभास चालीक लागना ही खंत

भांगरभूंय | प्रतिनिधी

आर बी एसः काणकोणां राजभास दीस कार्यावळ उमेदीन

भांगरभूंय । प्रतिनिधी

काणकोणः कोंकणी राजभास जावची म्हूण आमच्या कितल्याशाच कोंकणी म्हालगड्यांनी कश्ट घेतले. गोंय सरकारान कोंकणी राजभास चालीक लावन जे म्हालगडे हो संवसार सोडून गेल्यात तांच्या आत्म्याक शांती दिवची, अशें आर बी एस कोमरपंत हाणी सांगलें. तशेंच राजभास चालीक लागना ही खंत उक्तायली. ते कोंकणी लेखक संघ, लायन्स क्लब काणकोण, काणकोण कोंकणी कला केंद्र ह्या संस्थांनी कोंकणी राजभास दिसा निमतान घडोवन हाडिल्ले कार्यावळींत अध्यक्ष ह्या नात्यान उलयताले. 

ह्या वेळार माचयेर मुखेल सोयरे सदानंद काणेकर, कोंकणी लेखक संघाचे अध्यक्ष गौरीश वेर्णेकार, काणकोण लायन्स क्लबाचे अध्यक्ष पंकज नायक गांवकार, काणकोण कोंकणी कला केंद्राचे अध्यक्ष सुरज कोमरपंत, कोंकणी लेखक संघाचे सचीव प्रसाद पागी हाजीर आशिल्ले. ही कार्यावळ  शेळेर काणकोणच्या लायन्स क्लब सभाघरांत जाली.

सदानंद काणेकार हांणी आपल्या उलोवपांत जनमत कौलाच्यो यादी, कोंकणी प्रजेचो आवाजा वेळा वयल्यो यादी तशेंच राजभास आंदोलना वेळा वयल्यो यादी जाग्यो केल्यो.

ह्या वेळार  खास जनमत कौल, कोंकणी प्रजेचो आवाज तशेंच राजभास आंदोलना वेळे वयल्या फोटवांच्या प्रदर्शनाचें मानेस्तांचे हस्तुकीं उक्तावण जालें.

हे निमतान खास कवी संमेलनाचें आयोजन केल्लें. हाचे अध्यक्षपद अध्यक्षपद कवी प्रसन्न पागी हाणी भुशयलें. ह्या कवी संमेलनांत रुपेश देसाय, जयेश गायक, वैजयंती प्रभुगांवकार, वीणा प्रभुगांवकार, प्रसाद पागी, सागर वेळीप, वालेरियन वियेगस, योगिता वेर्णेकार, गौरीश वेर्णेकार हांणी वांटो घेतलो. काणकोण लायन्स क्लबाचे अध्यक्ष पंकज नायक गांवकार हांणी येवकार दिलो. प्रसाद पागी हांणी सुत्रसंचालन केलें. जाल्यार गौरीश वेर्णेकार हांणी उपकार मानले.