राजभास कायदो बदल्ल्यार विरोध

भांगरभूंय | प्रतिनिधी

कोंकणी संमेलनांत साबार थाराव : दरेका म्हालांत जाय सरकारी मुळाव्यो कोंकणी शाळा

भांगरभूंय । प्रतिनिधी

एरणाकुलम : राजभास कायदो बदलपाचो यत्न लेगीत केलो जाल्यार ताका विरोध करपाचो थाराव केरळांत आयोजीत केल्ल्या 26 व्या अखील भारतीय कोंकणी साहित्य संमेलनाच्या समारोप सुवाळ्यांत घेतलो. ह्या वेळार साबार थाराव मांडलें. तातूंतले कांय फुडें दिल्ले प्रमाण.

थाराव नं. 1- कोंकणी ही गोंय राज्याची राजभाशा. 1987 वर्सा राजभास कायदो गोंयचे विधानसभेंत पारीत जालो. फाटल्या तीन वयर दसकांत राजभाशा कायद्यांत दुरुस्ती करून मराठी भाशेचो आस्पाव करचो, तशेंच रोमी लिपीचो शाळांनी उपचारीक शिक्षणांत आस्पाव जावचो म्हूण मागण्यो जातात आनी विधानसभेचे कांय वांगडी ते मागणेक धरून खाजगी थाराव मांडटात. गोंय सरकारान ठाम भुमिका घेवन राजभास कायद्यांत बदल जावचो ना ही भुमिका घेतल्या. हें संमेलन गोंय शासनाचें अभिनंदन करता. गोंयच्या संस्कृतीक, समाजीक, अर्थीक, अस्मितायेच्या विशयां कडेन संबंदीत राजभास कायद्या कडेन सगल्या राजकी पक्षांनी खंबीर रावचें आनी कायद्याच्या बदलाचो कसलोय यत्न जाल्यार ताका विरोध करचो अशी शिटकावणी आनी मागणी हें  साहित्य संमेलन करता.

सुचक: अनंत अग्नी, अनुमोदक: अभिजीत पागी

थाराव नं. 2- गोंयांत पेडणें, बार्देस, दिवचल, सत्तरी, फोंडें, सांगें, केपें आनी काणकोण अश्या आठ म्हालांनी कोंकणी माध्यमांतली एकूय सरकारी मुळावी शाळा अस्तित्वांत ना. पेडणें, सांगें आनी धारबांदोडें ह्या म्हालांनी जाल्यार कोंकणी माध्यमांतली एकूय मुळावी शाळा ना.

गोंय सरकारान राष्ट्रीय शिक्षण धोरण आनी राजभास कायद्याक धरून शिक्षणीक पांवड्यार कोंकणी माध्यमाच्यो मुळाव्यो शाळा दरेका म्हालांत सुरू करच्यो आनी वांगडाच कोंकणी माध्यमांतल्या मुळाव्या शाळांक अर्थीक अनुदान दिवन शिक्षणीक साहित्य आनी सुविधांच्या निर्मिती खातीर पालव दिवचो, असो थाराव हें 26 वें अखिल भारतीय साहित्य संमेलन पारीत करता.

सुचक: प्रशांत नायक, अनुमोदक: मंगलदास भट

थाराव नं 3 – गोंय, कर्नाटक, महाराष्ट्र आनी केरळ राज्यांनी रावपी कोंकणी समाजाचें सांस्कृतीक, साहित्यीक, भाशीक आदान- प्रदान जावचे नदरेन ह्या चारूय राज्यांनी आपलेमदीं एक समजिकायेची कबलात करची आनी ह्या चारूय राज्यांनी शिकपी कोंकणी आवयभास आशिल्ल्या भुरग्यां मदीं एकचार आनी भावचार वाडीक लागचे खातीर धोरण आंखचें. ते खातीर गोंय शासनान फुडाकार घेवचो अशी मागणी हें 26 वें अखील भारतीय साहित्य संमेलन थारावा वरवीं करता.

सुचक: टायटस नोरोन्हा, अनुमोदक: दिलीप नायक

थाराव नं. 4 – गोंय सरकार कोंकणी साहित्याक पोसवण दिवपा खातीर साहित्य प्रकाशन येवजण चालीक लायता. हे येवजणेचो लाव फकत गोंयच्याच लेखकांक मेळटा. गोंय हें कोंकणी भाशेचें मूळपीठ. हे येवजणेचो फायदो गोंयची प्रकाशन संस्था उजवाडा हाडटल्या हेर राज्यांतल्याय लेखकांच्या साहित्या खातीर विस्तारीत करचो, अशें हें 26 वें अखील भारतीय साहित्य संमेलन गोंय शासना कडेन मागता.

सुचक: मॅल्वीन रॉड्रिगीस, अनुमोदक: दिनेश मणेरकार

थाराव नं. 5 – गोंयचो कोंकणी सिनेमा आंतरराष्ट्रीय मळार लेगीत पर्जळपाक लागला, हें मतींत घेवन सिनेमाची निर्मणी, वितरावणी आनी प्रदर्शना खातीर अर्थीक पालव तशेंच हेर सगळ्या तरांचो तेंको, तशेंच तंत्रगिन्यानाची पुरवण दिवपा खातीर गोंय सरकारान गोंय सिनेमा उदरगत म्हामंडळ स्थापन करचें, अशें हें 26 वें अखील भारतीय साहित्य संमेलन मागता.

तेच प्रमाण नवी पिळगी उत्कृश्ट लघुपटांची निर्मणी करता. तांचें प्रदर्शन करपा खातीर सिनेमा थिएटरांनी फिचर फिल्मां आदीं तें दाखोवपाची सक्ती सरकारान करची. तरणे पिळगे खातीर सिनेमा प्रशिक्षण विद्यालय स्थापन करचें, अशें हें 26 वें अखील भारतीय साहित्य संमेलन मागता.

सुचक: प्रशांती तळपणकार, अनुमोदक: साईश पाणंदीकार

थाराव नं. 6 – कर्नाटक राज्यांत 2007 वर्सा सावन कोंकणी विशय तिसरी भास म्हूण शिकोवपा खातीर शासनान मेकळीक दिल्या. आतां मेरेन कर्नाटक राज्यांत चार- पांच हजार विद्यार्थी कोंकणी विशय घेवन धावी यत्ता पास जाल्यात. कर्नाटकांत माध्यमीक पांवड्यार कोंकणी भास घेवन सद्याक शिकपी भुरग्यांची संख्या 260 इतली आसा. ह्या शाळांनी कोंकणी भास शिकोवपी शिक्षकांचो पगार मंगळुरूचें विश्व कोंकणी केंद्र दिता. कर्नाटक शासनान कोंकणी विशय शिकोवपी शिक्षकांचो पगार, शिक्षणीक साहित्या खातीर लागपी अर्थीक पालव दिवन कोंकणी विशयाच्या प्रसारा खातीर कर्नाटक शासनान धोरण आखचें, असो थाराव हें 26 वें अखील भारतीय साहित्य संमेलन पारीत करता.

सुचक: नंदगोपाल शणै, अनुमोदक: हेन्री पेरनाल

थाराव नं. 7 – कोंकणी साहित्य हेर भाशांनी पावतलें जाल्यार अणकार म्हत्वाचो. ते खातीर, कोंकणी साहित्य प्रादेशीक भाशांनी आनी इंग्लीश भाशेंत अनुवादीत करूंक सरकारान राजभाशा संचालनालय वा गोवा कोंकणी अकादेमी वरवीं प्रकाशकांक आनी लेखकांक अनुदान दिवचें अशी मागणी करपी थाराव हें 26 वें अखील भारतीय कोंकणी साहित्य संमेलन पारीत करता.

सुचक – दिनेश मणेरकार, अनुमोदक – डॉ. रमिता गुरव हे सगले थाराव कार्याध्यक्ष चेतन आचार्य हांणी वाचले. ह्या वेळार साहित्यकार अध्यक्ष माधव बोरकार, सचीव स्नेहा सबनीस, संमेलनाचे येवकार अध्यक्ष सदानंद भट, संमेलन कार्याध्यक्ष आनंद कामत, भांडारी एच्चेम पेरनाळ आनी हेर मानेस्त हाजीर आशिल्ले. सदानंद भट येवकार दिलो.