भांगरभूंय | प्रतिनिधी
भांगरभूंय । प्रतिनिधी
पोरणे गोंयः गोंय विधानसभेंत राजभास कायदो पास करून लेगीत तो चालीक लावपा विशीं राज्य सरकारान सापत्नपणाची वागणूक चलयल्या असो आरोप करून रिव्होलुशनरी गोवन्सान ह्या कायद्याची पुरायणपणान अंमलबजावणी करून कोंकणी तिच्या हक्काची सुवात दिवपाची मागणी केल्या. 1987 वर्सा राजभास कायदो पास करून लेगीत तो चालीक लावपा कडेन सरकार बिलकूल लक्ष दिना अशें आरजीचो फुडारी मनोज परब हांणी पणजे एके पत्रकार परिशदेंत सांगलें
सरकारी अधिसूचोवण्यो राजपत्रांत कोंकणी भाशेंत प्रसिद्ध करनात. सरकारी खात्यांनी कोंकणी भाशेंत अर्ज मेळनात. राजभास कायद्याच्यो अजून कोंकणीत अणकारीत केल्लो ना हाचो निशेध करप तितलो थोडो अशें परब हांणी सांगलें. राजभास कायदो खात्याचे संचालक राजू गांवस हांची आरजीच्या शिश्टमंडळान भेट घेवन कायद्याची अंमलबजावणी करपाची मागणी आमी केल्या अशी म्हायती तांणे दिली.
गोंय लोकसेवा आयोगाच्या लेखी परिक्षा, मुलाखती कोंकणीत घेवपाक जाय तशेंच सरकारी बेवसायट कोंकणीत मेळपाक जाय. गोंय विद्यापिठाच्यो पोस्ट आनी अंडर ग्रेज्युएट परिक्षा कोंकणीत घेवपाची आमची मागणी आसा अशें परब हांणे सांगलें. सगळे सरकारी कायद्यांचो कोंकणी अणकार करपाक जाय. विद्यार्थ्यांक कोंकणी भाशेंतल्या परिक्षा दिवपाचो पर्याय दिवपाक जाय, ग्रामसभेचें इतिवृत्त कोंकणीत बरोवपाची वेवस्था करपाक जाय अशेंय तांणे सांगलें. पत्रकार परिशेदक विश्वेश नायक आनी अजय खोलकार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
