भांगरभूंय | प्रतिनिधी
लेखक, कवी म्हूण तुमी तुमचे सृजनशीलतायेक वाट दाखोवंक शकतात. पत्रकारितेंत तर कोंकणींक चड म्हत्व आनी गरज आसा.
खंयचीय भाशा आसूं तिचे भितर करीयर करपाची तांक आसता. तातूंत तीं राजभाशा आसत जाल्यार तिका चड मान आसता. इंग्लीश भाशेक मान मेळ्ळा कारण ती विकसीत करपाक दरेक मनशान यत्न केलो म्हूण. तांची लोकसंख्याय चड आसा. सगल्या कोंकणी मोगींनी आपले भाशे विशीं असोच एकवटान मोग दाखयलो जाल्यार तातूंत खूब रोजगार वाडपाक शकता. तुमी वाचलां वा आयकलां आसतलें, की लोकसभेंत भाशा अनुवादा खातीर कांय कोंकणीभाशकांक नेमल्यात. फुडाराक अणकार करप्यांक खूब संद मेळूं शकता. भाशे भितर करियराच्यो कितें संदी आसात, ताचेर पेडणें काॅलेजीच्या कोंकणी विभागाची दीपा रायकार हांचे लागीं भासाभास जाली. राजभाशा म्हणटकच ती तुमकां येवपाकूच जाय. ती शिकोवपाचें काम शिक्षक करतात, म्हूण ताका पयलें प्राधान्य दितात.
दीपा सांगतालें, कोंकणी भाशेंत उंचेलें शिक्षण घेतलें काय तुमकां शाळा ते विद्यापीठा मेरेन शिकोवपाक मेळटा. ते विशींच्यो जायराती दिसाळ्यांनी येतात. तुमी चडांत चड गूण घेवन पास जावप गरजेचें. मागीर नेम बदल्ले तरी कांय फरक पडना. तुमी शाळांनी शिकयतात, तरी तुमचे गूण, पदवेक लागून तुमी उंचेल्या पांवड्याचेर शिकोवं शकतात. संगणकाचेर देवनागरी, इंग्लीश टायपिंग आयल्यार फायदो. ते खातीरुय शिक्षण आनी हेर मळांचेर जायत्यो नोकऱ्यो आसात.’
भाशा शिकतना ती उलोवप, आयकप आनी बरोवप म्हत्वाचें. ह्या तीन माध्यमांतल्यान ती शिकप जाता. वाचतकच ती चड कळूंक लागता. आपले भाशेंत कितलेंय साहित्य आसतलें तरी हेर भाशांतलें अणकार करपाची संद आसता. जर तुमी मराठी, कन्नड, हिंदी, इंग्लीश लेखकांचीं पुस्तकां घेतलीं तरी तुमी खूब काम करपाक शकतात. सुरवातीक तुमकां पयशे मेळचे नात. पूण नांव जातकच पयशे मेळपाक शकतात. साहित्य अकादेमी आनी हेर साहित्य संस्था पुस्तकांचो अणकार करून घेतात, ते बरें मानधनूय दितात. घरा बसून तुमी आॅनलायनूय हो वावर करूंक शकतात. कोरोना उपरांत ह्याच न्हय, तर हेर प्रकारांकूय मागणी आयल्या.
तुमी कोंकणींत युट्यूबर, ब्लाॅगर जावंक शकतात. हाका मात तुमचें निरीक्षण, अणभव आनी शैली हांचो कस लागता. तुमच्या गांवांतल्यो गजाली नवे पिळगेक खबर आसच्यो नात. हजारांनी वाचकांक ती म्हायती नवी आसतली. 1970, 1980 च्या दशकांत जें कितें जालें तें पसून नवे पिळगेक खबर ना. कांयजाणांक रामायण, महाभारत पसून खबर ना. अशीं जायतीं उदाहरणां आसात. तुमी हें सगलें कोंकणींत वाचक, पळोवप्यां मेरेन पावोवपाक शकता. स्टार्ट अपा भितर तर जायते विशय घेवं शकात. तुमचो विशय बरो आसल्यार आपरोजगाराची वाट मेकळी जावं शकता. लेखक, कवी म्हूण तुमी तुमचे सृजनशीलतायेक वाट दाखोवंक शकतात. पत्रकारितेंत तर कोंकणींक चड म्हत्व आनी गरज आसा.
आयज सगल्या सुवातींचेर कोंकणीचें गिन्यान आशिल्ले मनीस जाय पडटात. सोशल मिडिया उक्ती आशिल्लयान करियराच्यो संदी वाडल्यात. युट्यूब, रील, ब्लाॅगर आसूं तुमकां तुमचें म्हणणें बरोवचें पडटा. ताका कन्टेंट रायटर म्हणटात. बरेच खेपो माध्यम वापरपी भाशेलागीं तितलोसो येना. ताका लागून फाॅलोव्हर वाडनात. योग्य कन्टेंट रायटर आसल्यार तुमकां संद आसा. नव्या शिक्षणीक धोरणांत मायभाशेक चड म्हत्व दिलां, ताचो लाव तुमी घेवं शकता.
इफ्फी खातीर कोंकणी सिनेमांची निर्मिती जाता, थंय तुमकां खूब संद आसा. ती कसली तें सांगपाक हांगा सुवात पावचीना. गायक, लेखक, पटकथा लेखक, संवाद लेखक, अभिनेते, दिग्दर्शन….!! संशोधकांची गरज आसा. हें काम तुमकां वेळ- काळ पळयनासतना करचें पडटलें. हांगा खूब हार्डवर्क जाय. ताचे भायर बँक आसा. आमचे तरणाटे ते बाबतींत फाटीं. तुमकां म्हायती जाय जाल्यार प्रियांका परब (विद्यापीठ) हांचे कडेन 86696 09124) संपर्क करू येता. नाजाल्यार पेडणें काॅलेजींत दीपा रायकार (90112 53801) हांकां मेळचें. भाशेंत रोजगार खूब आसा, ते फक्त सोदपाक जाय.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
