भांगरभूंय | प्रतिनिधी
कोंकणी राजभाशा जाली खरी, पूण ती चालीक लागूंक जाय आशिल्ली. आनी चालीक लागपाची पूर्वतयारी म्हणजे सरकारी कर्मचाऱ्यांक प्रशिक्षण दिवपाची गरज आशिल्ली.
आंतोन दा पियेदाद मोरायश नांवाची व्यक्ती आमगेर मळ्यांत आंतऱ्यापयऱ्यान येताली. तेन्ना कांय जाण कोंकणी भाशा मंडळाचो पणजेचो फांटो चलयताले. मोरायशबाब दो. भिकाजीक (म्हज्या बापोलभावाक) मेळपाक येतालो. ते जें उलयताले ताचो संदर्भ म्हाका समजनाशिल्लो. उलयताले कोंकणीच, पूण गजाली वेगळ्या पांवड्या वयल्यो. तेन्ना हांव सवेंत-सातवेंत.
मोरायशबाब मोटे पोटतिडकीचो. गोंयांत सगल्यांक कोंकणी येवंक जाय आनी तांणी कोंकणीच उलोवंक जाय; दुसरी भाशा आमकां नाका अशें ताचें ठाम मत. एक दीस रातचो आनीक दोगांक घेवन आयलो. आमी निकते जेवन उठिल्ले. देट्ट्यांतल्यान भितर सरतनाच आवाज आयलो: “भिकाजी, भायर सर.” हांव आवाज वळखलों. फुडलें दार उकतेंच आशिल्लें. साला मेरेन पावसर आनीक एकदां तोच साद.
म्हाका कळ्ळें, किदेंय तरी आगळें घडलां. भिकाजी सालांत पावनाच फुडें मोरायशबाबान मोट्या आवेशान म्हणिल्लीं कांय उतरां अजून कानार सादतात. “…आमी निशेध मारुया आनी भायर करुया..” जें घडिल्लें ताचे फाटली भुमिका, फाटभूंय आनी (कोंकणी-मराठीचें) राजकारण समजुपा पलतडी म्हजी (अल्प)बुद्द आशिल्ली. 11-12 वर्सांच्या भुरग्यांक आज कळटा तें आमकां तेन्ना 15-16 वर्सांचेर कळटालें.
जाल्लें अशें: पणजे अखील भारतीय कोंकणी परिशदेचें अधिवेशन भरिल्लें, आनी सभापती गोपाळ आपा कामत (मगो) हांकां कसलें तरी मानाचें स्थान दिल्लें. म्हणून मोरायशबाबाचें चाळवल्लें. भिकाजी ताच्या सांगातान भायर सरलो.
म्हजी अल्पबुद्द म्हाका स्वस्थ बसूंक दिना जाली. बापायक विचारलें, “पापा, किदें जालें रे?” आसूं तें, तुका लागना आनी समजुचेंय ना. “पूण निशेध म्हणजे किदें तें तरी सांग.” निशेध म्हणजे protest. म्हाका इंग्लीश मातशी येताली म्हणून protest म्हणजे ‘झगडीं, वाद’ असलें किदेंय तरी आसा अशें मनाक समजायलें.
असो हो कोंकणीच उलोवपी मनीस म्हाका जायतीं वर्सां मेळत रावलो. 1987 वर्सा राजभाशा विधेयक पास जाल्लें तरी प्रशिक्षण सुरू जावपाक राण्याचें सरकार पडून ‘पिडिएफ’ सरकार येवन चर्चील आलेमांव राजभाशा मंत्री जावचो पडलो. मोरायशबाबाक आयतीच संद चलून आयली. सरकारी कर्मचारी आसून लेगीत ताणें ‘कोंकणी वर्गांचो समन्वयक’ असो हुद्दो मेळयलो.
एक दीस मोरायशबाब पणजेंत वाटेर मेळ्ळो. “कोंकणी शिकयता मरे?” म्हजेर वीज कोसळ्ळी. “हांव? हांव सो?” “ना. तें कांय ना. तुवें शिकोवंकूच जाय. हांगाच दों बोश्कांत वर्ग सुरू करतां. यो बस. वाहन आसा.” अशें म्हणून ताणें म्हाका जिपींत बसयलो…
दामोदर घाणेकार
8459998914
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
