भांगरभूंय | प्रतिनिधी
राज्यपालांच्या वैयक्तीक खर्चांतल्यान चलतली येवजण
भांगरभूंय । प्रतिनिधी
पणजीः गरीब आनी बेवारस लोकां खातीर जेवणा खाण्याची सोय करपी संस्था खातीर राज्यपाल पी. एस श्रीधरन पिल्लय हे राजभवन अन्नदान येवजण सुरू करतले. हे येवजणे खातीर सरकारी निधी न्हय तर राज्यपाल आपलो स्वताचो निधी दितले. केरळाचे राज्यपाल राजेंद्र आर्लेकार हस्तुकी हे येवजणेचे फाल्यां उक्तावण जातलें.
आयतारा सकाळीं राजभवन पोरण्या दरबार सालांत राजभवन अन्नदान येवजणेचो शुभारंभ जातलो. जे मानधन राज्यपालान बरयल्ले पुस्तकांतल्यान आयल्यात त्या मानधनाचो वापर हे येवजणे खातीर करतले. तशेंच हे निमतान डायेलेसीस आनी कांक्र दुयेतींक अर्थिक मजतीचे वांटप जातले.
राज्यपाल पिल्लय कार्यवळीचे अध्यक्षस्थानार आसतले. मुख्यमंत्री डॉ. प्रमोद सावंत हांचे हस्तुकी धनादेशाचें वांटप जातले. उपरांत राजेंद्र आर्लेकार हांचे हस्तुकी राजभवन अन्नदान येवजणेचें उक्तावण जातलें. हे येवजणे खाला स्ट्रीट प्रोव्हीडन्स हे संस्थेक पयलो धनादेश आर्लेकार हांचे हस्तुकी भेटयतले.
हे विशीं उलयतना स्ट्रीट प्रोव्हीडन्सचे संस्थापक डोनाल्ड फर्नांडीस हांणी सांगलें, जे वेळार सरकार आमच्या आलाशिरो घरांक मजत दिना तेन्ना गोंयचे राज्यपाल हे आपल्या वैयक्तीत निधीतल्यान आमका आर्थिक मजत दिता ते पळोवन सन्मान दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
