भांगरभूंय | प्रतिनिधी
नवे पिळगेच्यो, नव भारताच्यो गरजो समजून घेवपी, शिक्षण दिवपी कला अकादेमी 2028 मेरेन राजपाटणांत कित्याक जावची ना?
एका तेंपार राजपाटण पणजेंतली गोवा कला अकादेमी कलेच्या शिक्षणाचें केंद्र आशिल्ली. कला अकादेमींतल्यान संगीत, नाटक, नाच, वाद्यांचें शिक्षण घेवपी वंडरगर्ल वर्षा उसगांवकार, कलाकार पंकज त्रिपाठी हांचेवरी हजारांनी विद्यार्थी देस- विदेसांत आसात. नवे कला अकादेमीच्या निर्मणेचें, स्वयंपूर्णेचें ते मार्ग जावचे.
कला अकादेमींत साहित्यिक, निर्माते अदुर गोपाळकृष्ण हांणी पुस्तक प्रकाशन केल्लें. तेन्ना तांणी कला अकादेमी गोंयचेंच न्हय देसांतल्या फिल्म सोसायटीचो मध्यबिंदू जावची, अशें मार्गदर्शन केल्लें. नामनेचे नृत्य कलाकार पं. गोपीकृष्ण हांकां आर्गां ओंपपाक ब्लॅक बाॅक्सांत कलामोगींच्या आग्र्यान पायजणां विरयत नाचय जाल्लो. ‘ओ तारा’ म्हणीत शाहरुख खान तेच कला अकादेमींत आयिल्लो. हांगाच शिक्षकांनी रेवाडो घालून आदले मुख्यमंत्री प्रतापसिंह राणे हांकां शिरकायल्लें…. ती कला अकादेमी आयज 40 – 43 वर्सांच्या हुमऱ्यार आसा. फाटलीं तीन वर्सां पावस लागीं येता तेन्ना तिची उजवाडा येवजण इबाडटा, आवाज येवजणेंतले तंत्रीक दोश उक्ते जातात. बोवाळ घालपी पांच पंचवीस, तांकांय स्पेस जाय म्हणून हें जाता व्हय? दोन- तीन म्हयन्यां भितर जाप मेळटलीच. त्यो सोदतना नवे कला अकादेमीची, कलेचे उदरगतीची बुन्याद राजपाटणांत घालपाचो विचार सरकारान करचो. बुन्यादीचो फातर बसोवपाची मोख 19 डिसेंबर, 2026 आसची. ते पासत दोन बसका मुखेल करुन कलाकार, आर्किटेक्ट, इंजिनियरांच्यो दक्षीण आनी उत्तर जिल्लो पावंड्यार जावच्यो. ते बसकेंतल्यान ‘मोगरा फुलला’ गीतांवरी नवी कला अकादेमी कशी आसची ह्या विशयाची मांडणी जावची. एकादरे जादूगाराचे पोतयेंतल्यान रेडिमेड प्लॅनय मेळटले.
नवी कला अकादेमी भारतीय संगीत, साहित्य, फिल्माच्या फुडाराचें दायज जावचें अशें सपन केळोवचें. नवे कला अकादेमीक भारतरत्न लता मंगेशकार हांचें नांव दिवचें. ‘पुरुष’ नाटक जायरातीविणें अकस्मात जाल्लें व्हय? पुण्या- मुंबय उबाळाच्या ल्हारांनी हुलपता तेन्ना कलाकारांक गोंयांत येवचें दिसलें तातूंत अजाप तें कसलें? बशी भरून पुण्या, मुंबय, नागपूर, गुजरातांतल्यान कलाकार नाटकांकय गोंयांत येतात, फिल्मोत्सवावरी. कला अकादेमीतल्यान रेड कार्पेटार चलपी कलाकार गोंयकारच जाल्या आसूंये. देसांतल्या मुखेल टिव्हीच्या आदल्या संपादप्यांची गोंयांत घरांय आसात, कांय मोडपाचे वाटेरय आसत. तेय कांपाल वाॅक वे चेर येतात समेस्तांवरी. दांरां कितलींशींच. हनुमानावरी झोपय मारुन तांकां आमचें दायज गिळपाचो हावेस आसल्यार मेकळेपणान, उतरांनी सांगपाची धिटाय दाखोवची. नामनेचे आर्किटेक्ट चार्लस कुर्रैया हांचे भारतांत विखुरिल्ले गोंयकार विद्यार्थी कला अकादेमीचे नवनिर्मणेची वाट दाखयतले, अशी आस्त बाळगुया.
कला अकादेमीत पयलें नाटक खंयचें जाल्लें? पयली नाचाची कार्यावळ कोणाची आसली? कितले दीस लागले चार्लस कुर्रैया हांकां कला अकादेमीचे प्लॅन, प्लॅनिंग करपाक? बुन्यादी फातर कोणे घाल्लो हो इतिहास खणचे परस कांपाल ‘वाॅक वे’ चेर येवपी ल्हारां, अकादेमीचो पाचवो ताल्ल वाठार पळोवचो. ल्हारां, गिमाच्या दिसांनी सांजवेळा अचकित येवपी वारो, बदलिल्ले कामगार अकादेमीची भलायकी इबाडटात व्हय? ‘इथे ओशाळला मृत्यू’ सारक्या नाटकांतल्यान कला अकादेमीचे स्टेजीर वचपी कला आनी संस्कृतीमंत्री गोविंद गावडे हांचे परस कला अकादेमीचें दुखणे कोणाक बरें कळटलें? श्री. गावडे सांजवेळा सीआयडी वरी कला अकादेमीत येवन वतात. सीसीटीव्ही कॅमेराय अकादेमीच्या वाठारांत आसात.
कला अकादेमी खातीर नवी सुवात सोदात अशे दोन लेख 2024 वर्सां विज्ञानिक, पर्यावरणमोगी डाॅ. नंदकुमार कामत हांणी बरयिल्ले. कला अकादेमीत ‘पुरुष’ नाटकावेळार घडिल्ले घडणुकेची खबर वाचली आनी तांच्या लिखाणाचेर परतून एकदां नदर मारली. कला आनी संस्कृती मंत्र्यां कडेन उलयतकीच कला अकादेमीचे इबाडिल्ले भलायकेची तांकां जाणवीकाय आसा, हें कळ्ळें. कला अकादेमीतलीं उणेपणां तें निवळायतले हें होल्मलें. मुखेल थेटराचें बुकिंग जालां, पापा पिग्स येतलो, तियात्रां, नाटकां, गॅदरिंगां जातलीं, वर्स, देड वर्स थेटर आसा तशेंच फुडेंय वतलें. ताचे वांगडा नवे कला अकादेमीची बुन्याद घालची राजपाटण पणजेंत सुचोवणी केली.
कांपाल वाॅक वे, वाडपी कसिनो, बोटी तशेंच मुखा वयल्या वेऱ्यां दोंगरार जाल्लें युद्ध महाविद्यालय मांडवी न्हंयेंतली, न्हंयचे देगे वयली भोंवतण बदलपी. न्हंय रुंदावल्या, रुंदावता, अंदता हाचो अभ्यास भूर्गभशास्त्री, पर्यावरणशास्त्रींनी करपाची गरज आसा. तीन म्हयन्यां भितर तो अभ्यास करतना पणजेंतलें फार्मासी म्हाविद्यालय, नॅशनल थेटर, थेटरा भोंवतणची भूंय कोणाची? तें थळाव्या आमदारांच्या आदारान सोदल्यार सरकार ती घेवंक शकता. नवे कला अकादेमीची बुन्याद राजपाटणांतल्या दुसऱ्या मार्गा वयले भुयेंत वा कला अकादेमीत पयलीं ओपन एअर थिएटर आशिल्ले सुवातींत घालची अशी सुचोवणी संस्कृती मंत्र्यांक केली. कला अकादेमीच्या कांपाल वाॅक वे वाठारांतल्या चाफ्याच्या झाडांवरी वंय दयानंद बांदोडकर ग्रावंडाकय घालात, काँक्रीट उणें करुया हे सुचोवणेकय येवकार मेळटलोच. ग्रीन झोन, ग्रीन स्पेसीस स्मार्ट सिटींत जातात ताचीं मुळां घट आसचीं 50 वर्सांच्या फुडारा खातीर.
गोंयचे तशेच गोंयां भायले गोंयकार आर्किटेक्ट अभिजीत साधले, सुशांत खेडेकार, डीन डिक्रूज, जेर्राड डिकुन्हा, मंगेश प्रभुगांवकार, रेश्मा वागळे- सुखठणकार, साधना बांदेकार, तुलयो डिसोझा, ब्रायन सुवारीश, राया शंखवाळकार, गिरीश बांदेकार, अमीत सुखठणकार, राजेश कामत, आशिश रेगे हांकांय विश्वासांत घेवचें. त्या विश्वासांतल्यान नवे पिळगेच्यो, नव भारताच्यो गरजो समजून घेवपी, शिक्षण दिवपी कला अकादेमी 2028 मेरेन राजपाटणांत कित्याक जावची ना? मुंबयचे पुननिर्मणेची पावलां वेगीं पडटना तिसरी मुंबय करपाच्या वावराक महाराष्ट्र लागला, गोंय फाटीं कशें रावतलें?
पर्यावरण, सैम संवर्धनशास्त्र उदरगतीच्या अभ्यासाक उर्बा दिवपी. सैमाची जतनाय घेवपाक मांडवीचे कांपाल वाॅक वे तले देगेर कांदळवनाची (मँग्रूव्हज, खारफुटी) वणत उबारुया. केंद्र सरकारा मुखार पुराय येवजण दवरल्यार पयशांची पुरवण जातली. नवे गरजे प्रमाण ओपन एअर थेटर, ब्लॅक बाॅक्स, आर्ट आनी साहित्य गॅलरी, लायब्ररी कला अकादेमीच्या नव्या प्रकल्पांत आसची. कला शिक्षणाचें नवें केंद्र पयलींच्या शिक्षण खात्यांच्या पणजेतल्या बिल्डिंगेत जाल्यार ? ‘सादूर रावात, भितर कामकाज चालू आसा’, अशे सांगपी तकटे भितर लायल्यात, भायरय लावचे. ते बिल्डिंगेक कलेची संजीवनी मेळत व्हय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
