भांगरभूंय | प्रतिनिधी
सिनेमा आनी वेब मालिकेंत आवृत्ती वा भाग (सिक्वेल) येवप ही एक सामान्य घडणूक, पूण, एक लोकगीत? गोंयांतल्या आदल्या काळार घडिल्लें एक क्लासीक लोकगीत, राजन आनी प्रेमा, गोंयांतली मोगाची मनभुलोवपी काणी आशिल्ल्यान ह्या गीताचें सिक्वेल आदल्या गीतान काणी जंय सोडली, थंयच उखलता आनी नवे समकालीन नदरेंतल्यान रसिकांक आदल्या काळाची याद करून दिता. थंय भोंवडावन हाडटा.
राजन आनी प्रेमा हांच्या संबंदीच्या मोगा काणयेच्या पदाचें संजीत हेगडे देसाय हांणी घाल्लें हें एक महत्वाकांक्षी पावल. तांच्या पयल्या गीताक ‘तें म्हाका दिना’ च्या यशा उपरांत आपलें पदार्पणांतूच जाल्लें हें फक्त एकूच जैत न्हय, हें सिद्ध करपाक संजीत उमेदीन भरिल्लो. इश्टाच्या वाडदिसा खातीर जाल्ल्या सृजनशील सत्रांत संजीत हांकां मूळ राजन अनी प्रेमाच्या पदाची याद करून दिली. “अनौपचारीक जॅमिंग सत्रां वेळार हें गीत म्हजे सदांच आवडीचें आशिल्लें. हाचो एक सिक्वेल तयार करचो अशें म्हाका दिसलें. ह्या क्लासिकाक नवें मोडण दिवप हें एक रोमांचक आव्हान जावंक शकता अशें म्हाका दिसलें.”, संजित सांगता.
एकदां ही कल्पना रुजली म्हणटकच हें गीत जिवीत करपाक म्हयनेभर नियोजन केलें. ताची संकल्पना, बरप आनी रचना करपी संजीतान संगीत नियोजक आनी ऑडियो निर्मातो सिंधुराज कामत हाचे वांगडा लागींच्यान काम करून मूळ पदाची सोबितकाय तशीच दवरून नव्या तालार, सुरार, आवाजांत तें बांदलें. गौतमी हेदे बांबोळकार, आरती रामनाथकार, आयान भट हांचे वांगडा स्वता संजीतान ह्या पदाक मेहनत घेवन सजयलें. तालवादक स्मित नायक हाणें गोंयच्यो जिव्यो भावना प्रतिबिंबीत करपी बिट्स जोडले.
राजन अनी प्रेमाचो दृश्य अणभव अदभूत करपा सारको आसा. प्रेमाची भुमिका करपी प्रतिभावान अभिनेत्री सोबिता शाबा कुडतरकार हिणें दिग्दर्शीत केल्लो हो व्हिडियो तिच्या बहुमुखी प्रतिभाची गवाय दिता. प्रेमाची भुमिका ताणेंच केल्या. सोबितान उल्लेखनीय सादरीकरण केलेंच, पूण प्रथमेश राणे डान्स अॅकॅडमी वांगडाच पदांतल्या नाचाचें नृत्य दिग्दर्शनूय केलें.
सिनेमाटोग्राफर आनी संकलक ह्यो दोनूय जापसालदारक्यो हातांत घेवन केआरएफ मिडियाचे कुणाल राज हांणी गोंयची सोबीतकाय सामकी बारीकसाणेन टिपली. ताचो भाव अनुराग राज हाणें छायाचित्रणांत मदत केली. दरेक फ्रेम दोळ्यां खातीर मेजवानीच आसतली, हाची खात्री तांणी दिली. तांचें काम आनीक उंचायेर व्हेलें तें संकलन आनी रंगांच्या ग्रेडींगान. जाका लागून व्हिडियो आदल्यो यादी ताज्यो करपी, तरीय सामको ताचो, जिवो, आकर्शक जालो. प्रेमाचे भुमिकेंत बोलक्या चेऱ्याचें सोबिता आनी राजनाचे भुमिकेंत तेजस कोलवेंकार हांणी अक्षरशा जीव ओतला. तांकां अयान भट आनी सावी गांवस सारकिल्ले तरणाटे प्रतिभेन चार चांद लायल्यात. तांच्या भुमिकांनी काणयेचेर निश्पापपणाचे आनीक थर चडल्यात. तांचे सादरीकरण, नृत्य दिग्दर्शन आनी सुंदर दृश्यां हांकां लागून हो स मिनटांचो व्हिडियो एक मेजवानीच थारता.
संजीत केपेंचो. गोंयचे संस्कृताये कडेन ताचो खोलायेन संबंद आसा हें ह्या गीतांतल्यान स्पश्ट जाता. तो फाटलीं 25 वर्सां अमेरिकेक रावन गुगलांत काम करता आसलो तरी ताचें काळीज गोंयां कडेन घट्ट बांदून उरलां. गोंय आनी परदेशांतल्या इश्ट, कुटुंब, आनी समर्थकांच्या आदारान कलाकारांचो एक प्रतिभावान पंगड एकठांय हाडपाची तांक ताचे कलेचे आवडींतल्यान दिसून येता. तो अमोल काणेकार, रोमा सिलिमखान, संजय वराडकार, श्रीपाद रामनाथ शेटकार, स्वाती आनी संदेश नायक ह्या सारक्या व्यक्तींचे खाशेले उपकार मानता. कारण जांचो आदार हो प्रकल्प साकार करपाक म्हत्वाचो आशिल्लो.
प्रदर्शीत जाल्या उपरांत हें गीत युट्युबाचेर 25 हजारां वयर रसिकांनी (व्ह्यूव्स) पळयलें. समेस्त गोंयकार, कोंकणी भाशेंतल्या निर्मिती खातीर हो एक म्हत्वाचो मार्गदर्शक चिरो. ह्या प्रकल्पाच्या गीतां पसून ते ताच्या अदभूत व्हिज्युअल्सां मेरेन प्रेक्षकांनी दरेका आंगाची तोखणाय केल्या. रेमोन मूळ राजन अनी प्रेमाचें सादरीकरण केल्ल्यान आपणाक प्रेरणा मेळ्ळी हें संजीत मान्य करता. तो म्हणटा, “तांणी केन्ना तरी हो व्हिडियो पळयलो जाल्यार म्हाका खूब आवडटलें. ताचेर ताचें मत आमकां तितलेंच म्हत्वाचें आसतले.”
राजन अनी प्रेमा हांचे वांगडा संजीत हेगडे देसाय आनी ताच्या पंगडान गोंयच्या एका क्लासिक पदाक अभिवादन केलांच, पूण नवे पिळगे खातीर तांच्या दायजाची नवी व्याख्या केल्या. संगीत आनी कथेच्या माध्यमांतल्यान गोंयचे संस्कृतायेचें सार धरून मोगाची, सृजनशीलताय सांगपी ही काणी.
हें पद पळोवंक नाशिल्ल्यां खातीर संजीताच्या युट्युब चॅनलाचेर, [@etlobad](https://youtube.com/@etlobad) मेळटा. मुद्दाम पळयात आनी तुमचे विचारुय मांडात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
