भांगरभूंय | प्रतिनिधी
सद्याचे दिसपट्टे जिणेंत लोकांक वेगवेगळ्या समस्यांक तोंड दिवचें पडटा. वाडपी बेकारी, म्हारगाय, भोंवतणचें असुरक्षित
वातावरण हे परिस्थितींत आनीक भर घालता. लोकां मदीं एक उदासीनताय निर्माण जालां. तातूंत केंद्र सरकारान कर्नाटकाक म्हादय न्हंयेच्यो उपन्हंयो कळसा, भांडुराचें उदक वळोवपाची परवानगी दिली. देखून डबल इंजिन भाजपा राज्य सरकाराचेर सगळ्या वटांनी टिका करपाक सुरवात जाल्या.
उठाव, आंदोलन, चळवळ करपाची लोकांची मानसिकताय उणी जाल्या अशें म्हाका दिसता, पूण हाचो अर्थ आतां आमकां कितेंय करपाक मेकळीक जाल्या असो न्हय. गोमंतभूंयेची सत्ताधिशांनी जतनाय घेवपाची गरज आसा. केंद्र सरकारांत, डबल इंजिनात संघटनात्मक पांवड्यार एकवटीत यत्न जाल्यार ताचो निश्चितपणान फायदो जातलो. सद्या पणजी शारांत गर्देची स्थिती आसा. पणजी स्मार्ट करपाची तयारी नेटान चालू आसा. ‘पणजी आतां म्हातारी जाल्या’ तिका तरणी करपाचे यत्न सुरू आसात. ‘प्रयत्नांती परमेश्वरः’. सामान्य मनशाच्या म्हण्या प्रमाण स्मार्ट सिटी करपाच्या खाशेल्या यत्नांत मान्यताय मेळिल्ल्या कामां विशीं फलक लावप सक्तीचें करचें. कामांक मान्यताय दिल्ली तारीख, मान्यताय मेळिल्ली रक्कम, कंत्राटदाराचें नांव, मोबायल क्रमांक, सगळ्या प्रकाराचें काम आदी विशीं म्हायती आसपाक जाय. अशें फलक चालू आशिल्ल्या दरेका कामाच्या सुवातेर दिसपाक जाय. कामां मंद गतीन चालू आशिल्ल्यान पणजी शारांतलो लोक बेजारला आसतलो. हें वेवस्थेचें अपेस. पूण सामान्य मनशाक हाचे त्रास जाता.
पणजी शाराक सोबीत करपाक स्मार्ट सिटी खाला पणजी म्हापालिकेन कामांची जापसालदारकी खांदार घेतल्या. पूण, नियोजन शून्य येवजण, कामाक लागून फोंडकुलांचें कांय सांगू शकना, ताका लागून ट्रक, टँकरांक वारंवार अपघात जाता.
प्रशासन ठोस उपाय करीना म्हणून पणजेचे लोक आवाज काडटात. पूण त्या लोकांची कोणूच कदर करिना. आदल्या काळांत बांदकाम खातें, नगरपालिका, ग्रामपंचायती कडल्यान काम चलतालें तेन्ना एक खाशेली व्यक्ती नेमताले, तेच प्रमाण सहाय्यक अभियंतो मदीं भोंवडेक येतालो. आतां पळयल्यार कोणाचें कोणाकच पडिल्लें ना. येरादारी नियोजन ना, खंयचे रस्ते बंद, खंयचे वटेनच्यान वचपाचें आदी. दरेका वाठारांत रस्ते खणपाचें काम खूब ल्हवू सुरु आशिल्ल्यान ताचो विद्यार्थ्यांचेर, वाहन चालकांचेरूय परिणाम जाता. पुराय पणजेत धुल्ल पातळ्ळा. हाका लागून ‘एलर्जी’ च्या नागरिकांक समस्यांक तोंड दिवचें पडटा. कोणाकच कांयच फरक पडना. पणजेच्या दुख्खी नागरिकांनी आवाज उठयलो, थळाव्या टीव्ही चॅनलाचेर संवाद प्रसारीत जालो. प्रसार माध्यमांनी लेख, फोटो, खबरो जारी केल्यात आनी अजूनय दितात. राजकी फुडारी दखल घेनात. ‘लोका सांगे ब्रह्मज्ञान आपण कोरडे पाषाण’ अशेंच म्हणचें पडटलें.
वेरें आसा तशेंच
वेरें-रेशमागुस ही म्हजी मायभूंय. तिका मान दिवप म्हजें कर्तव्य. कांय कारणांक लागून म्हजें रावप आल्त पर्वरे आसलें तरी वेरें रेशमागुस सोनारभाट वाड्या कडेन म्हजें वेगळेंच नातें आसा. कांय वर्सां आदीं आमचो मतदारसंघ कळंगूट आशिल्लो, आतां आमी साळगांव मतदारसंघाचे जागृत मतदार जाल्यात. आमच्या मतदारसंघांचे जायते आमदार मंत्री जाले, आश्वासनां दिलीं, पूण वेरें- रेशमागुस गांव जशें आसा तशें उरलें. बेती, वेरें- रेशमागुस गांवांची सुदरणा करपा विशीं मुख्यमंत्री मनोहर पर्रीकार आनी कांय मंत्र्यां कडेन चर्चा केल्ली आनी तीं पुराय करपाचीय आश्वासनां मेळिल्लीं. पूण, खंय कितें जालें तें समजलें ना.
सध्याच्या मंत्रीमंडळांत कांय सुचोवण्यांक मान दिवपी एक मंत्री आसा. ‘चार दीस सासूचे- चार सुनेचे’ हे म्हणी प्रमाण आतां सगळें घडटा. एका सप्तका पयलीं हांव बेती, वेरें-रेशमागुस वचपाक भायर सरलो जाल्यार बेती एसटी डेपो ते बेती, वेरें, रेशमागुस वचपाक अर्दे वर लागले (ट्राफीक जाम). एकल्यान म्हणलें ‘हें सदचेंच मरे, कोणांक पडला?’ हांव ल्हवूच मुखार सरलो तेन्ना हांवें मुद्दाम मुख्यमंत्र्यान उक्तावण केल्ल्या नव्या पुलीस आवट पोस्टाचेर नदर मारली, तर कोणाक कांयच पडिल्लें ना. हांगा पार्किंग ना, स्पीड ब्रेकर नात. फलक आनी कांय सुवातींनी ‘रंबलर्स’ लावप गरजेचें आसा. आतां आमच्या साळगांव मतदारसंघा खातीर आमकां एक तरणाटो आमदार मेळ्ळा. खास करून ताणें ह्या सगळ्या गजालींचो अभ्यास करून नियाळ घेवचो आनी बेगीन सर्जनशील पावलां उबारचीं. हांगा कायम स्वरुपी येरादारी पुलीस नेमपाक जाय.
गजानन बा. नायक भाटकार
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
