भांगरभूंय | प्रतिनिधी
राजधानी दिल्लींत सुमार सत्तावीस वर्सां उपरांत आतां भाजपाची वाट सुरू जाल्या. आम आदमी पक्षाच्या भ्रश्टाचार विरोधी आंदोलनांतल्यान निर्माण जाल्लें भूत सोऱ्याचे आसूं, बाटलेंत एकदाचें बंद केले उपरांत राजधानी दिल्लीचो फाटल्या दोनेक दसकांत पुरायपणान विद्रूप जाल्लो चेरो बदलून उडोवपा खातीर भारतीय जनता पार्टी प्रधानमंत्री नरेंद्र मोदी हांच्या फुडारपणा खाला कशी कामाक लागल्या हाचें चित्र सद्या दिसूंक लागलां. सोपूत सुवाळ्या उपरांत फाटले चार दीस मुख्यमंत्री आनी तांचें मंत्रीमंडळ दिल्लीतल्या रस्त्यांरूच मुखेलपणान दिसत आसा. नवें सरकार अधिकाराचेर आयले उपरांत विधानसभेचें पयलें अधिवेशन सद्या सुरू आसून, आम आदमी पक्षाच्या दिल्लीतल्या आतां मेरेनच्या गैरकारभाराची आनी घोटाळ्यांचोय पर्दाफाश करपी ‘कॅग’ चो अहवालूय सभाघरांत सादर जाल्ल्यान फुडल्या कांय दिसांत आम आदमी सरकाराचो अजून कांय घोटाळ्यांक कंठ फुटलो जाल्यार ताचे कोणाक अजाप दिसचें ना. पूण आयज नव्या सरकाराक गरज आसा ती राजधानी दिल्लीचो चेरो रोखड्यांत रोखडो कसो बदलूंक येतलो हे खातीर झुजा पांवड्यार काम करपाची. दिल्लीच्यो मुख्यमंत्री जाल्ल्यो रेखा गुप्ता हांचें काम तशें विचार करीत जाल्यार निश्चीतपणान सोंपें ना, पूण केंद्रांतल्या मोदी सरकाराची प्रतिमा आंतरराष्ट्रीय पांवड्यार अजून लेगीत पर्जळूंक जाय आसत जाल्यार दिल्लीचो ‘मेकओव्हर’ करपाक सर्वोच्च प्राधान्य दिवप ही काळाची गरज आसा.
मुख्यमंत्री रेखा गुप्ता हांच्या रुपांत राजधानी दिल्लीची नवी नियंत्रण ‘रेखा’ मुक्रर करपाचें काम प्रधानमंत्री नरेंद्र मोदी हांणी केलां आनी भाजपाच्या नियंत्रणांतल्यान दिल्ली आतां वच्ची ना हाची दक्षताय तांकां घेवपाची आसा. दिल्लीच्या सरकारी खजिन्यांत कसो खडखडाट आसा हाची म्हायती मुख्यमंत्री रेखा गुप्ता हांणी जाहीर केल्या आनी ह्या वर्सा सरकारी महसुलांत सुमार देड हजार कोटींचो उणाव अपेक्षीत आशिल्ल्याचो वित्तीय विभागाचो अदमास आशिल्ल्यान नव्या सरकाराक आपल्या जाहीरनाम्यांतल्या येवजण्यांची पुर्तताय करतना खूबशो कसरती करच्यो पडटल्यो. प्रतिकूल परिस्थितीतूय राजधानी दिल्ली नियंत्रणांत दवरप हेंच राज्य सरकाराचें आनी प्रधानमंत्री नरेंद्र मोदी हांचें लक्ष्य उरतलें.
अशे परिस्थितींतूय बायलां खातीर दर म्हयन्याक 2500 रुपया मजत पावोवप हाका रेखा गुप्ता सरकाराचें प्राधान्य आसतलें हातूंत दुबाव ना. मंत्रीमंडळाचे पयलेच बसकेंत आयुषमान विमो येवजणेक मंजुरी दीत नव्या सरकारान अरविंद केजरीवाल आसूं वा आतिशी हांकां कसलीच कागाळ करपाक सुवात दवरली ना. यमुना न्हंयेची नितळसाण जाल्यार सरकार अधिकाराचेर येवचे पयलींच सुरू जाल्या. भाजप सरकाराक पयल्या दोन अडेज वर्सांत होच धडाको कायम दवरून देशाची राजधानी आशिल्ल्या ह्या शाराचो चेरो बदलचो पडटलो तेन्नाच खंय तरी तांकां थाकाय मेळटली आनी तें काम सोंपें आसा हें निश्चितूच ना. 27 वर्सा उपरांत महत्प्रयासान दिल्लीची मेळयिल्ली गादी परतून हातांतल्यान वच्ची न्हय हे खातीर नेमकें कितें करूंक जाय हें भाजपाक कोणे सांगपाची गरज आसा अशें दिसना.
दिल्ली ही देशाची राजधानी जरूर आसा. पूण हें शार फाटलीं तिनेक दसकां केंद्र आनी राज्य सरकार हांचे मदल्या झगड्याचें एक कारण जालां, आनी आयज दिल्लीच्या ओबडधोबड रुपाचें तेंच एक मुखेल कारण आसा हाचेर कोणाचेंच दुमत आसूंक शकना. आम आदमी पार्टीच्या फाटल्या धा बारा वर्सांचे राजवटींत जाल्यार केंद्र आनी राज्य सरकार हांचे मदलें राजकी झगडें इतलें तेंगशेर पाविल्लें की राजधानी शाराच्या विकासाच्या मार्गांत खूबशीं विघ्नां ताका लागून निर्माण जालीं. देशाचे आंतरराष्ट्रीय प्रतिमेक सोबसारकें राजधानीचें शार केंद्रांतल्या मोदी सरकाराक जाय आशिल्लें. पूण राजधानींत जाल्यार अरविंद केजरीवाल हांणी खंयचेय परिस्थितींत केंद्राक सहकार्य न करपाचोच विडो उबारिल्लो. सहाजिकूच दिल्लीत जो विकास आनी प्रगती अपेक्षीत आशिल्ली ती फाटल्या कांय वर्सां सावन दिसली ना. दिल्लीची गादी जिखप ही ह्या वेळार भाजपा खातीर प्रतिश्ठेची गजाल आशिल्ली. नरेंद्र मोदी हांणी ह्या जल्मांत निदान दिल्लींत सरकार स्थापन करपाचीं सपनां पळोवची न्हय अशा एका वेगळ्याच अहंकारांतल्यान सांगपी केजरीवाल हांकां ताचें मोल मेजचें पडलें. केंद्रांत आनी दिल्लींत एकाच पक्षाचीं सरकारां आसचीं हाचेर भाजपान नाका तितलो भर दिवपाचें एक कारण म्हणल्यार अरविंद केजरीवाल आनी कंपनींचो आडमुठेपणां. हाचे आदीं दिल्लींत शीला दीक्षित सुमार पंदरा वर्सां दिल्लीच्यो मुख्यमंत्री आशिल्ल्यो. तांच्या काळांत सुरवातेक केंद्रांत अटल बिहारी वाजपेयी हांचें सरकार आशिल्लें. पूण त्या काळांत दोनूय सरकारां मदीं केन्ना किजिलां जाल्ल्याचें पळोवंक ना. दोनूय सरकारां मदीं बरो समन्वय आनी सहकार्य आशिल्ल्यान वितुश्ट येवपाचो प्रस्नूच उपस्थीत जालो ना.
अरविंद केजरीवाल हांकां लागूनच दिल्लीची आयची हालत जाल्ल्याचो जो समज जाला तो चुकीचो म्हणूंक येवचो ना. दिल्ली शाराचें इबाडिल्लें सौंदर्य परतून मेळोवन दिवपा खातीर भाजपाच्या मार्गांत आयज केजरीवाल आनी तांचो आम आदमी पक्ष ना ही मोदी सरकारा खातीर ही खूब व्हड थाकाय आसा, आनी फुडल्या तीन चार वर्सांत राजधानी दिल्लीचो चेरो बदलतलो अशी अपेक्षा कोणेय बाळगिली जाल्यार ती अतिशयोक्ती म्हणूंक येवची ना. फाटल्या धा-बारा वर्सांत आम आदमी पक्षान केंद्रा कडेन सदांच संघर्शाची भुमिका घेतिल्ल्यानूच दिल्लीचो विकास आडावलो ही वस्तुस्थिती आसा आनी ती न्हयकारूंक येवची ना.
दिल्लीचेर फक्त थंय रावपी दिल्लीकारांचेंच वजें आसा अशें ना, जाल्यार दिल्ली तशेंच आशिकुशीच्या शारांत हेर खूबशा राज्यांचे लोकूय व्हड संख्येन रावतात हाचो विचार करूनच राजधानीच्या ह्या शाराचो पुरायपणान विकास जावपा खातीर पावलां उबारपाची गरज आशिल्ली, पूण तशें जालें ना. भारतीय जनता पक्षाचेंच सरकार आतां अधिकाराचेर आयिल्ल्यान शाराच्यो विकास येवजण्यो राबोवप तांकां शक्य जावचें ना आनी तातूंतल्यानूच दिल्ली पांचेक वर्सांत आनीक सुंदर जावंक पावतली. रेखा गुप्ता सरकाराचो सद्याचो धडाको पळयत जाल्यार दिल्लीकारांक तांचे कडल्यान खूब अपेक्षा बाळगूंक येतल्यो. केजरीवाल हांच्या 80-85 कोटींच्या शीशमहलांत आपूण रावपाक वच्ची ना अशें सांगून रेखा गुप्ता हांणी दिल्लीकारांच्या काळजांत सुवात मेळयल्या.
नितळ आनी प्रदुशणमुक्त दिल्ली आयज लोकांक जाय. नवें सरकार लोकांच्या अपेक्षांक कितलें मेरेन जागतलें हें फुडारांत दिसून येतलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
