भांगरभूंय | प्रतिनिधी
राजकोट, खबरां संस्था: गुजरातांतल्या राजकोट शारांतल्या गेमींग झोनांत शेनवारा (२५ मे) उजो लागलो. हे घडणुकेंत २८ जाणांक मरण आयलें. मरण आयिल्ल्यां मदीं भुरग्यांचोय आस्पाव आशिल्लो. हे घडणुकेक लागून राजकोटांत बरोच बोवाळ जालो. उपरांत राज्य सरकारान घडणुकेची खोलायेन चवकशी करपाचो आदेश दिलो. ह्या उज्याच्या घडणुके उपरांत गेमींग झोनाचो एक शेअरधारक प्रकाश हिराण बेपत्ता आशिल्लो.
उज्याचे घडणुके उपरांत हिराण हाचे कडेन संपर्क केलो. मात ताचो कांयच पत्तो नाशिल्लो. आतां ताचे विशीं धक्को दिवपी म्हायती उजवाडाक आयल्या. उजो लागलो तेन्ना प्रकाश हिराण थळार हाजीर आशिल्लो. तो उजो पालोवपाचो यत्न करतालो अशें सीसीटीव्हीचेर दिसता. मात घडणुके उपरांत ताचे कडेन संपर्क जायनाशिल्ल्यान तो पळून गेलो असो दुबाव पुलिसांनी उक्तायलो.
मरण आयिल्ल्या एकल्याची वळख पटनाशिल्ली. ते उपरांत ते कुडीचे नमुने डीएनए चांचणे खातीर धाडले. उपरांत प्रकाश हिराण हांचे आवय कडेन डीएनएची जुळोवणी जाली. तातूंत प्रकाश हिराण हाची वळख पटली आनी हे घडणुकेंत ताका मरण आयिल्ल्याचें स्पश्ट जालें.
मजगतीं, प्रकाश हिराण हाचो ह्या गेमींग झोनांत सुमार ६० टक्के वांटो आशिल्लो अशें सांगतात.
दोन भागीदारांक पुलिसांनी केली अटक
राजकोटांत टीआरपी गेमिंग झोनांत जाल्ले घडणुकेंत २८ लोकांक मरण आयलें. ह्या प्रकरणांत युवराज हरी सिंह सोळंकी आनी राहुल राठोड ह्या दोग भागिदारांक पुलिसांनी अटक केल्ली. हालींच गेमींग झोन चलोवपी कर्मचारी नितीन जैन हाकाय पुलिसांनी ताब्यांत घेतिल्लो. ह्या तिगांकूय सोमारा (२७ मे) १४ दिसांची पुलीस बंदखण दिल्ली. आतां ह्या प्रकरणाचो मुखेल आरोपी धवल ठक्कर हाका राजस्थानांतल्यान ताब्यांत घेतिल्ल्याची म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
