भांगरभूंय | प्रतिनिधी
मुख्यमंत्री: कुशळटाय मळार शेकड्यांनी नोकर्यो उपलब्ध
दिवचल: राजकी शिफारशीचेर नोकर्यो मेळटल्यो म्हणून सपनां पळोवं नाकात. तशेंच सरकारी नोकरे खातीर लोकप्रतिनिधिच्या फाटल्यान लागूं नाकात. ताचे बदला उपलब्ध साधन कुशळटाय उदरगत वरवीं रोजगार मेळाव्यांत हजेरी लावन नोकर्यां खातीर यत्न करात. सरकारी येवजण्यां वरवीं नोकरदार न्हय, जाल्यार उद्देजक जावन हेरांक नोकरी दिवपाचें सपन पळयात. तुमच्या घरा मेरेन नोकरी येवची ना. ते खातीर कांय यत्न करप गरजेचें, अशें मुख्यमंत्री डॉक्टर प्रमोद सावंत हांणी दिवचले रोजगार मेळाव्यांत मार्गदर्शन करतना सांगलें.
सरकारी विद्यालयाच्या सभाघरांत विशेश रोजगार मेळावो आयोजीत केल्लो तेन्ना ते उलयताले. माचयेर दिवचलचे आमदार डॉक्टर चंद्रकांत शेटये, आमदार प्रेमेंद्र शेट, उद्देजक हरीश मेलवाणी तशेंच संचालक एस. एस. गांवकार आनी हेर हाजीर आशिल्ले.
राज्य सरकार राज्यांत विवीध सुवातांचेर रोजगार मेळावे करतात. मात थंय विवीध मळावेल्या उपलब्ध तरणाट्यांचो आंकडो उणो आसता. तरणाट्यांक रोखडीच नोकरी मेळपाची संद ह्या रोजगार मेळाव्यांतल्यान मेळतूच आसता. मात ते सुवातेर हाजीर नाशिल्ल्यान उपलब्ध आशिल्ल्या रोजगारा पसून लोक पयस उरतात. मागीर सरकाराक दोश दितात, अशें मुख्यमंत्र्यानी मुखार म्हणलें.
दिवचले आयोजीत केल्ल्या ह्या रोजगार मेळाव्याक 46 कंपन्यांनी वाटो घेतिल्लो. 352 सुवातो नोकरी खातीर उपलब्ध आसात. मात ह्या मेळाव्यांत फकत शंबर जाणूच हाजीर रावले. हे चित्र योग्य न्हय. तरणाट्यांनी कुशळटाय विकसीत करतना सुरवातेक मेळटा ती नोकरी आपणावन सरकारी वा हेर नोकरे खातीर यत्न करचे. ह्यान फुडें मात्सो तरी अणभव आशिल्ल्यांकूच नोकरेंत आसपावन घेवपाचो निर्णय सरकारान घेतला. तशेंच राज्यांतल्या विवीध आयटीआयतल्यान 15000 तरणाटे प्रशिक्षीत जाल्यांत. तांकां विवीध मळांचेर नोकर्यांची संद उपलब्ध आसा, अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
