राजकी शिगमो सुरू

भांगरभूंय | प्रतिनिधी

आखेरेक चार राज्यां आनी एका केंद्रशासीत प्रदेशांतले विधानसभा वेंचणुकेची घोशणा जाली. 9 एप्रीलाक केरळ, आसाम आनी पुदुच्चेरींत तर तामिळनाडूंत 23 एप्रीलाक, अस्तंत बंगालांत 23 आनी 29 एप्रीलाक मतदान जातलें. फोंडें आनी हेर कडल्योय पोटवेंचणुको 9 एप्रीलाक जातल्यो. सगल्यांचो निकाल मात एकूच दीस म्हणल्यार 4 मेक जातलो. हातूंत केरळ आनी अस्तंत बंगाला कडेन भारतीयांचें लक्ष आसतलें. भाजप आनी समर्थक पक्ष, तशेंच हिंदुत्वनिश्ठ संघटनांनी ह्या दोन राज्यांचेर चड लक्ष केंद्रींत केलां. पुराय दक्षीण भारतांत भगवें ल्हार हाडपाक ते रातदीस जिद्दीन वावुरतात. दक्षिणेंतलीं राज्यां सोडल्यार हेर कडेन विरोधी पक्ष वांटून गेल्ल्यान वा तो भाजपांतूच विलीन जाल्ल्यान निकालाचें दालें भाजप वटेन चड बागवलां, हें मान्य करचेंच पडटलें. जंय भाजपा नाशिल्ली थंय आतां ती दिसपाक लागल्या. ह्या राज्यांनी 17 कोटी 40 लाख मतदार आसात. तर वट्ट जागे 824 आसात. थंयच्या निकालाचेर राजकारणाची फुडली वाट थारतली.
आसामांत सध्या भाजपा आघाडी सत्तेर आसा. तर केरळांत लेफ्ट डेमोक्रॅटिक फ्रंट (एलडीएफ), तामिळनाडूंत द्रवीड मुनेत्र कळहम (डीएमके) आघाडी, अस्तंत बंगालांत तृणमूल काँगेस तर पुदुच्चेरींत एनडीए (भाजपा- अण्णा द्रमूक) आघाडी. 10 वर्सां पयलीं केरळांत भाजपाक एक जागो मेळिल्लो. आयज 140 मदलो एकूय ना. तामिळनाडूंत (234) कांयच नाशिल्लें थंय चार आसात. तर अस्तंत बंगालांत 294 तले 77 जागे आसात. 10 वर्सां पयलीं थंय भाजपाक फक्त 3 जागे मेळिल्ले. हें खेप अस्तंत बंगालात जैत मेळटलें, अशी भाजपाक आस्त आसा. केरळांत काँग्रेसीच्या संयुक्त लोकशाय आघाडेक संद मेळूं येता. कारण सध्याचें एलडीएफ सरकार सेगीत दोन खेपे सत्तेर आसा. तामिळनाडूंत एक फावट द्रमूक आनी दुसरे फावट अण्णाद्रमूक पक्ष जिखतात. द्रमूक बळिश्ट दिसता, पूण थंय अॅण्टी इन्कम्बन्सी मुद्दो आसतलो.
अस्तंत बंगालांत बरींच वर्सां सत्तेर आशिल्ल्या तृणमूल काँग्रेसीक धपको बसतलो, अशें कांय जाणकार सांगतात, पूण भाजपाक जैत मेळटलें हाची खात्री तांकां ना. केरळांत धर्माचो मुद्दो कायम आसता. लव जिहाद, हिंदूंचेर अत्याचार अशें थंय फाटले खेपूय उलयताले, आतांय उलयतात. ते खरे काय फट तें मतदारांकूच चड खबर आसा. सुशिक्षीत केरळांत धर्मीक, संस्कृती मुद्दे चड बळिश्ट थारतात काय बेरोजगारी, म्हारगाय तें 4 मेक पळोवया. तामिळनाडूंत उद्देग, रोजगार, केंद्र – राज्य संबंद हाचेर मतदान जातलें. हिंदी, शिक्षणीक धोरण, केंद्रीय निधी, प्रादेशीक अस्मिताय हे मुद्देय थंय म्हत्वाचें थारत आयल्यात. अस्तंत बंगालांत हिंसाचार, भ्रश्टाचार, केंद्र आनी राज्य मदलो संघर्श, हिंदुत्व, बांगलादेश घुसखोरी हे मुद्दे आसात. तृणमूल हारता अशें थोड्यांक दिसता आसले तरी थंय ममता बॅनर्जी नांवाची खमकी अस्तुरी जैताचे खिंडींत वाट आडावन उबी आसा आनी फाटले खेपे तिणें एकहाती यशस्वी लढत दिल्ली, हें विसरून उपकारचेंना.
लोकसभा वेंचणूक 2029 त जातली. ताचे पयलीं एक देश, एक वेंचणूक करपाचोय केंद्राचो विचार आसा. सध्याच्यो चार राज्यांच्यो वेंचणुको ते खातीरची नांदी थारूं येता. एसआयआर उपक्रमा खाला मतदार वळेरेंत एकूय अपात्र व्यक्ती उरची ना, अशें वेंचणूक आयोगान काल सांगलें. कांय कडेन मतदारसंघांची फेररचणूक जाल्या. म्हणटकच हाचो निकालाचेर परिणाम जावं येता. आतां मोबायल फोन मतदान केंद्राचेर व्हरपाक मेळचो ना. कालच्यान लागू जाल्ली आचारसंहिता खरपणान पाळटले, अशें आयोगान म्हणलां. ह्या वेंचणुकांनी राष्ट्रीय विरुद्ध प्रादेशीक पक्ष असो संघर्श जातलो. तातूंत कोण जिखता, तें पळोवया.