राजकी म्हासंग्रामा खातीर आमने सामने !

भांगरभूंय | प्रतिनिधी

शांतलो राजकी म्हासंग्राम म्हणून जाचे कडेन पळयतात ते लोकसभा वेंचणुके खातीर केंद्रातलो सत्ताधारी भारतीय जनता पक्ष आनी मुखेल विरोधी पक्ष आशिल्ल्या काँग्रेसीच्या फुडारपणा खालची ‘इंडी’ आघाडी आतां वातावरण निर्मणे खातीर सज्ज जाल्या. लोकसभा वेंचणूक आतां म्हयनो- देड म्हयन्यांत जाहीर जावपाक शकता. ताका लागून दोनूय आघाड्यांचेर वातावरण निर्मणी खातीर यत्न जावप अपेक्षितूच आसा. भाजपान विरोधकांक हे बाबतींत बरेंच फाटीं उडयलां तरी तांणी सध्या अयोध्येंतल्या राम मंदीर उक्तावण सुवाळ्याचेर चड लक्ष दिवन विरोधकांची सामकी कोंयडी करपाचो विडो उखल्ला. जाल्यार राहूल गांधी हांची मकरसंक्रातीच्या म्हुर्तार सुरू जाल्ली भारत जोडो न्याय यात्रा आतां काँग्रेसी खातीर निमाणो आदार थारल्या. लोकसभा वेंचणुकेचे फाटभुंयेर यात्रेच्या माध्यमांतल्यान लोकां मेरेन पावपाचो काँग्रेसीचो हो निमाणो यत्न म्हणून तिचे कडेन पळयतात. आतां 22 जानेवारीक जावपी राम मंदिराच्या उक्तावण सुवाळ्याचो झगझगाट राहूल गांधी हांचे यात्रेक कितलो मेरेन न्याय दितलो, असो जायत्या जाणांक दुबाव आसा. राम मंदीर उक्तावण सुवाळ्या विशीं काँग्रेसीन जी भुमिका घेतल्या ती लेगीत कोणाक पटपा सारकी ना हेंवूय ताचें फाटलें कारण आसपाक शकता. अर्थांत लोकसभा वेंचणुके खातीर कांय प्रमाणांत काय जायना वातावरण निर्मणी करपाक हे यात्रेक लागून काँग्रेसीक येस मेळटलें हें न्हयकारपाक जायना.
14 राज्यांतल्यान वचपी राहूल गांधी यात्रा 20 मार्चाक मुंबय पावून सोंपतली. त्याच वेळार चड करून लोकसभा वेंचणुकेच्यो तारखो जाहीर जाल्ल्यो आसतल्यो आनी काँग्रेस पक्षा कडेन लोकां मेरेन पावपा खातीर ते तुळेन चड वेळ आसचो ना हें मतींत घेवन तांकां यात्रेचेरूच चड लक्ष दिवचें पडटलें. तांकां तातूंत कितलें मेरेन येस मेळटा हाचेर खूब कितें निंबून आसतलें. आतां काँग्रेसीचें नेतृत्व जरी राष्ट्रीय अध्यक्ष ह्या नात्यान मल्लिकार्जून खर्गे हे करतात तरी ह्या पक्षाचे खरे फुडारी राहूल गांधी हेच आसात हें तांचे नवे यात्रेंतल्यान लोकां सामकार आयलां. अश्या यात्रांचो उद्देश हो निमाणे राजकी लाव उठोवप होच आसता आनी राहूल गांधी हांची ही यात्राय, त्या पक्षाच्या फुडाऱ्यांनी तिचे फाटल्यान तसो विचार ना अशें लाख सांगलें तरी लोकसभा वेंचणुकेचेर दोळो दवरून ती आयोजीत केल्या हें लिपून उरलें ना. काँग्रेस पक्षांत राहूल गांधी हांचो शब्द निमाणो आनी निर्णायक आशिल्ल्यान हे यात्रेचेर तांची बरीच मदार आसा. वेंचणुकेचो माहोल तयार करपाक जरी थोडें येस मेळ्ळ्यार तें हे यात्रेचें येस थारतलें. राम मंदीर उक्तावण सुवाळ्याचे फाटभुंयेर देशांतलें वातावरण सध्या पुराय राममय जाल्ल्यान राहूल गांधी हांचे यात्रेक लोक कितलो न्याय दितले हे लागींच्या तेपार चड स्पश्ट जातलें. राहूल गांधी हे यात्रेंत सदचे भशेन प्रधानमंत्री नरेंद्र मोदी हांचेर नाळ पेटयतलो. तांची शेलक्या उतरांनी संभावना करतलो हें तशें अपेक्षीत आसलें तरी देशा सामकार ज्यो कांय समस्या आसात ताचेर उलोवन त्यो सुटाव्यो करपा खातीर किदें करपाक जाय हे जो मेरेन तो लोकांक सांगना तो मेरेन ताका कोणूय गंभीरपणान घेतलो अशें दिसना.
राम मंदीर उक्तावणाचो घाट हो राजकी लाव घेवपा खातीर घातला असो आरोप करतना भारतीय जनता पक्षाक ताचो चड फायदो जातलो, हें काँग्रेस फुडारी एके वटेन मानून घेतात. आनी स्वताच्या राजकी लावा खातीर उक्तावण सुवाळ्याचेर बहिश्कार घालपाचोय निर्णय काँग्रेस पक्ष घेता जाल्यार लोकां मेरेन वचून राहूल गांधी तांचे कशें समाधान करपाक शखतले, हो प्रस्न आसा. राम मंदीर उक्तावण सुवाळ्यांत वांटेकार जाल्यार अल्पसंख्यांक मतदाराचो राग ओडून घेवपाची भिरांत काँग्रेसीक सतयता, आनी तातूंतल्यान बहिश्काराचो निर्णय घेतल्यार मागीर भाजपा ताचो राजकी फायदो घेता अशें सांगपाचे धोल बडोवन कांयच अर्थ ना. वेंचणुकेच्या वातावरण निर्मणे खातीर कांय प्रमाणांत हे यात्रेचो फायदो निश्चितूच जातलो तरी ‘इंडी’ गटबंधनांतल्या हेर घटक पक्षांक हे यात्रेंत वांटेकार करून घेवपाक काँग्रेसीक अपेस आयिल्ल्यान ताचो फटको तांकां बसतलो अशें म्हणपाक जाता. भारत जोडो न्याय यात्रेक घडये येस मेळ्ळेंच जाल्यार हेर घटक पक्षांक ताचे स्रय मेळपाक शकता ही भिरांत आशिल्ल्यान घडये काँग्रेसीक घटक पक्षांचो वांगड नाका पूण ताचो फायदो जावपाचे सुवातेर लुकसाण जावपाचो धोको आतां चड दिसता. भाजपा कडेन दोन हात करपा खातीर आतां मेरेन विरोधी आघाडेक खूब किदें करपाक जातालें पूण गठबंधनाच्या अध्यक्षपदार मल्लिकार्जून खर्गे हांची निवड करपा बगर गाडी अजून कांय फुडें सरकना आनी ती अजून फुडें वचपाची शक्यताय नाशिल्ल्यान तिचो फुडार किदें हाचो अदमास आतांच करपाक जाता.
राहूल गांधी हांची भारत जोडो यात्रा नव्यान सुरू जावचे पयलीं ह्या सगल्या समस्यांचेर समाधान करपी तोडगो काडचो अशी गठबंधनांतल्या मुखेल घटक पक्षांची मागणी आशिल्ली. ते खातीर वयले साराक यत्न जाले पूण सगल्याचेंच समाधान करप अशक्य जालें आनी वाटाघाटी निर्फळ थारल्यो. ‘इंडी’ गठबंधनातल्या अठ्ठावीस घटक पक्षांतल्या फक्त धा पक्षांचे प्रतिनिधी आभासी बसकेक हाजीर राविल्ल्यान काँग्रेस पक्षाचेर कोणाचो भरवसो उरलो ना काय ताचे फाटल्यान आनीक कसलीं कारणां आशिल्लीं हें कळपाक मार्ग ना. तरी भाजपाक मात ताचे वयल्यान विरोधी गठबंधनाचें आभासी रूप लोकां सामकार हाडपाची आनीक एक संद मेळ्ळी. आभासी गठबंधन, आभासी निर्णय अशेंच कांयशें चित्र हाका लागून सामकार आयिल्ल्यान विरोधी आघाडीचें लुकसाण ताका लागून जावपाक शकता. ममता बॅनर्जीची तृणमूल काँग्रेस आसूं वा अखिलेश यादवाच्या समाजवादी पक्षान हे बसके कडेन फाट केल्ल्यान एक वेगळोच संदेश लोकां मेरेन गेलो आनी ताका लागून जाल्लो समज वा गैरसमज पयस करपाचें काम काँग्रेस फुडाऱ्यांक करचे पडटलें. आतां हे फुडारी राहूल गांधीचे यात्रेंत वांटेकार जातले काय घटक पक्षांच्या फुडाऱ्यांची मनधरणी करत रावतले हें कळना. समाजवादी पक्षान जो आक्रमक पवित्रो घेतला तो पळयल्यार उत्तर प्रदेशांत भाजपाक आडावपाचो आशिल्लो नाशिल्लो विचार काँग्रेसीक सोडून दिवचो पडटलो अशेंच चित्र दिसता. विरोधकांचो एकवट ही काळाची गरज आसतना ते आघाडेर समर्पीत भावनेंतल्यान कोणाचीच काम करपाची तयारी दिसना. हातूंतल्यान विरोधकांक लोकसभा वेंचणुकेंत तांच्या सामकार कसलें ताट येतलें हाची कल्पना आतांच आयल्या इतलेंच म्हणपाक जाता.

वामन प्रभू
9823196359