भांगरभूंय | प्रतिनिधी
मोहनदास लोलयेंकारः 50 टक्के बस तिकेट सवलत घेवपी गोंय हे एकसुरें राज्य
भांगरभूय । प्रतिनिधी
काणकोणः 1970- 80 च्या दसकांतली विद्यार्थी चळवळ आनी 50 टक्के बस सवलत आंदोलन खंयच्याय राजकी पक्षाच्या तेंक्या बगर येसस्वी जालें. तेन्नाचें सरकार संवेदनशील आशिल्लें. खाजगी बस लॉबी स्ट्राँग आशिल्ली. यच्या सरकाराचेर टिका केल्यार सरकारांतले मंत्री, मुख्यमंत्री ती टिका वैयक्तीक घेतात आनी सूड घेवपाक सोदतात. त्या काळार ‘सेटींग’ नाशिल्लें. 50 टक्के बस तिकेट सवलत घेवपी गोंय हें एकसुरें राज्य आसा, अशें मोहनदास लोलयेंकार हांणी सांगलें.
लोलयेंच्या मनोशोभा कलाघरांत आयोजीत केल्ले ‘गांठवळ’ हें विद्यार्थी चळवळीचे माळेक सुरवात केले उपरांत संकल्प गांवकार हांणी घेतिल्ले मुलाखतींत विद्यार्थी चळवळीचे फुडारी मोहनदास लोलयेंकार उलयताले.
त्या वेळार वयले चडशे विद्यार्थी हे मध्यमवर्गीय कुटुंबांतले आशिल्ले. तांकां बस तिकेट परवडा नाशिल्ली. त्या वेळार पुराय गोंयांत स ते सात म्हाविद्यालयां आशिल्लीं. खाजगी बस घनी 50 टक्के बस तिकेट सवलत दिनाशिल्ले. तेन्ना विद्यार्थ्यांक कायदो हातांत घेवचो पडलो. सरकाराची 25 टक्के तिकेट सवलत चालू आशिल्ली, मात विद्यार्थ्यांनी केल्ल्या आंदोलनाक लागुनूच ती 50 टक्के सवलत मेळपाक शकली. आयज लेगीत 50 टक्के बस तिकेट सवलत आसा आनी आयज लेगीत बस तिकेट सवलत दितना खाजगी बसकार 1970 ते 80 च्या दसका भशेन किटकीट करतात. मात आयचे विद्यार्थी सगळें सोंसून घेतात. तांचें रगत सळसळना. तांकां तिडक येना, ही शोकांतिका आसा, अशें लोलयेंकार हांणी सांगलें.
आयच्या पालकांक आपलो भुरगो ऑलरावंडर जावचो अशें दिसता. आयच्या सारको विद्यार्थ्यांचेर चेपण नाशिल्लें. विद्यार्थी स्वता आपले करिअर घडयताले. आंदोलन करतना सगळ्या विद्यार्थ्यांचो एकामेकाचेर विस्वास आशिल्लो. आमकां आंदोलन करतना कोणूच गुरू नाशिल्लो. विवीध पुस्तकांनी आमकां प्रेरणा दिली, अशेंय लोलयेंकार हांणी सांगलें.
सुरवेक ज्येश्ठ स्वातंत्र्यसैनीक मनोहर आनी शोभा प्रभुदेसाय हांकां आर्गां ओंपलीं. उद्देजक दत्ता दामोदर नायक हांचे हस्तुकीं संकल्प गांवकार आनी मोहनदास लोलयेंकार हांकां यादस्तीक चिन्न भेटयलें. कार्यावळीचें प्रास्तावीक संदेश प्रभुदेसाय हांणी केलें. ह्या वेळार जाल्ले चर्चेंत अविनाश भोसले, अमोल नावेलकार, दिलीप बोरकार, गार्गी सातोस्कार, डॉ. वेरेंकार, प्रशांत नायक, प्रशांती तळपणकार, रोहिदास गांवकार, प्रभव नायक, संजय कोमरपंत आनी हेरांनी वांटो घेतलो. हे कार्यावळीक अॅड. क्लोफांत कुतिन्हो, जिवन मयेंकार, सुशीला मेंडीस, सतीश पैंगीणकार, तियोतिनो डिकॉस्टा, सुकूर फर्नांडीस आनी हेर मानेस्त उपस्थीत राविल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
