भांगरभूंय | प्रतिनिधी
केंद्रांतल्या राजकी लोकशाय आघाडी सरकारान शिक्षणा विशीं नवें राष्ट्रीय धोरण जाहीर केल्यार तीन वर्सांचो काळ जावन गेलो. यत्ता पयली सावन राष्ट्रभाशा हिंदीचो विशय सक्तीचो करपाचे तरतुदीक लागून दक्षीणे कडलीं कांय राज्यां आनी अस्तंत बंगाल सारक्या राज्यांत ताका विरोध जावप अपेक्षितूच आशिल्लें. पूण महाराष्ट्रा सारक्या राज्यांतूय हें धोरण राजकी चुलीर शिजोवपाचो जो यत्न चल्ला तो थोडो अनपेक्षितूच आशिल्लो. महाराष्ट्रांतल्या राजकारण्यांचो खरोच मराठी वाटावपा खातीर विरोध आसा काय राजकी सुवार्थ सादून घेवपाक आयिल्ली संद आतां व्हगडावची न्हय अशें तांकां दिसता, हो संशोधनाचो विशय थारुये. राष्ट्रीय शिक्षणीक धोरण आपले राजकी चुलीर शिजयत दवरूनच तातूंतल्यान आपल्या राजकी सोयी प्रमाण कितलो मेरेन सुवार्थ सादूं येतलो हाचो विचार करूनच नव्या धोरणांतल्या त्रिभाशा सुत्राक विरोध करतात हें आतां स्पश्ट जालां. राजकी पटलार आपलें अस्तित्व घाताक आयिल्ल्यान कांय राजकी पक्षांक आपलें अस्तित्व शाबूत दवरपाचें आसत जाल्यार अशी संद परतून येवची ना हाचो साक्षात्कार जालो आनी नव्या शिक्षणीक धोरणाचें आयदन आपले चुलीर दवरून ताका वेगळें फोण्ण मारपाचो यत्न सुरू जाला. मुंबय म्हानगरपालिका वेंचणूक तोंडार आयिल्ल्यान अशी भुमिका घेवप म्हणल्यार राजकी फायद्याचेंच थारतलें हें जाणून ताका अशी फोण्ण दिली की ताका लागून देवेंद्र फडणवीस हांच्या सरकारांत चलबिचल जाली आनी हिंदी सक्ती संबंदी खूबशें नमतें घेवपाची वेळ तांचेर आयली.
दक्षीणेंतलें तामीळनाडू आसूं वा केरळ सारक्या राज्यांनी सुरवाते सावनूच थंयचीं सरकारां नव्या शिक्षीक धोरणांतल्या ह्या तरतुदीं आड उबीं राविल्लीं आनी तें जावप सभाविकूच आशिल्लें. अस्तंत बंगालांतूय ममतादिनीन आवाज काडीत आमचेर हिंदी लादची न्हय अशी शिटकावणीच दिली. सर्वोच्च न्यायालयांतूय हो वाद पावलो. पूण राज्य सरकारांकूय शिक्षणीक धोरण राबयतना प्रादेशीक अस्मिताय सांबाळपाचो अधिकार आशिल्ल्याचो निवाडो आयिल्ल्यान राज्यांतल्या प्रादेशीक पक्षांच्या सरकारांक ताका लागून घटाय मेळ्ळी. आतां महाराष्ट्रांत भारतीय जनता पक्षाच्या फुडारपणा खाला सरकार आशिल्ल्यान थंय ह्या तरतुदी वेल्यान वाद जावपाची शक्यताय तशी उणीच आशिल्ली. तशें पळोवंक गेल्यार उद्धव ठाकरे मुख्यमंत्री आसतना हे तरतुदीक सरकारान मान्यताय लेगीत दिल्ली. पूण फाटल्या वर्स देडवर्सांत महाराष्ट्रांतले राजकी परिस्थितीक वेगळेंच मोडण मेळ्ळां आनी उद्धव बाळासाहेब ठाकरे आसूं वा शरद पवार वट्ट राजकी सर्तींत खूबशे फाटी पडले. महाराष्ट्र नवनिर्माण सेनेचे राज ठाकरे हांणी भाजपा कडेन लागींपण सादून कितेंय साद्य जावपाची पारखणी वर्सभर केली पूण तांकां तातूंत येस येवंक नाशिल्ल्यान योग्य संदीची वाट पळोवपा बगर तांचे कडेन दुसरो पर्याय नाशिल्लो, आनी निमाणें हिंदी विशय सक्ती वा त्रिभाशा सुत्रान तांकां ती संद मेळ्ळी. हेच फाटभुंयेर उबाठाची शिवसेना आनी राज ठाकरे हांची महाराष्ट्र नवनिर्माण सेना एकठांय येवंक लागिल्ल्याचें संकेत फाटल्या कांय दिसां सावन मेळूंक लागल्यात आनी निदान मराठीच्या नांवान इतलो तरी राजकी सुवार्थ सादपाची मेळिल्ली संद व्हगडावपाचो मुर्खपणा करप ना हाचेर तांचें एकमत जालें.
नव्या शिक्षणीक धोरणाचें तपलें आपले राजकी चुलीर दवरून ताका फोण्ण दिली जाल्यारूच कितेंय साद्य करूंक मेळटलें हाचेर एकमत जाले उपरांत उद्धव आनी राज ठाकरे एकठांय आयल्यार महाराष्ट्रांतल्या राजकारणाक नवें मोडण मेळूंक शकता ही आस्तूय बळावत गेली आनी पांच जुलय दिसा एकठांय मोर्चाचें आयोजन करपाचेरूय म्होर मारली.
हिंदीची पयले यत्ते सावन सक्ती वा त्रिभाशा सुत्र लागू जायत जाल्यार महाराष्ट्रांत मराठी फाटीं पडटली अशी भिरांत उक्तावन लोकांक भावनीक उलो मारप आनी ह्या ना त्या कारणां वेल्यान आतां मेरेन व्हगडायिल्ली राजकी प्रतिश्ठा कांय प्रमाणांत काय जायना परतून मेळोवप होच ताचे फाटलो उद्देश आसा. हातूंत कोणाचोय खरेंच मराठी वाटावपाचो उद्देश आसलोच जाल्यार ताकाय येवकार दिवचोच पडटलो, पूण सगल्यांचो जावपाचो तो परिणाम जालो आनी राज्य सरकाराकूय आपल्या निर्णया पसून एक दोन पावलां फाटीं घेवचीं पडलीं. महाराष्ट्र राज्य विधानसभेचें पावसाळी अधिवेशन काल सोमारा सावन सुरू जाल्ल्यान अधिवेशनांतलें कामकाज शांततायेन जावचें हे खातीर घडये सरकारान हिंदी भाशा आनी त्रिभाशा सुत्राच्या अंमलबजावणी विशीं काडिल्ले दोनूय आदेश रद्द केल्ले आसुये. म्हळ्यार ताका जाता तो विरोध पळयत जाल्यार आनी आपली राजकी पोळी भाजून घेवपा खातीर सुरू आशिल्लो आटापिटा लक्षांत घेत सरकारान घेतिल्ल्या ताज्या निर्णयाक येवकारूच दिवचो पडटलो. डॉ. नरेंद्र जाधव हांचे अध्यक्षताये खाला एक समिती आतां नेमतले. समितीच्या अहवाला उपरांतूच योग्य तो निर्णय घेवपाचें सरकारान थारायिल्ल्यान कांय काळ तरी आपल्या राजकी विरोधकांच्या बोमाड्यांतलो वारो काडून घेवपाक तांकां येस आयलां.
महाराष्ट्र राज्य सरकारान त्रिभाशा सुत्रा विशींचे दोनूय निर्णय फाटीं घेतिल्ल्यान उबाठाची शिवसेना आनी राज ठाकरे हांच्या महाराष्ट्र नवनिर्माण सेनेचे एकठांय येवपूय आतां लांबणेर पडलां, आनी मराठी परस ताचीच रुखरूख खूबशा जाणांच्या मनांत उरल्यार अजाप दिसपा सारकें कारण ना. पांच जुलयचो तांचो मोर्चाय रद्द जाला. मुंबय म्हानगरपालिकेचे वेंचणुकेंत भाजप आनी तांच्या इश्ट पक्षांक शह दिवपा खातीर उबाठा आनी राज ठाकरे खातीर हाचे परस आनीक बरी संद नाशिल्ली हें स्पश्टूच आसा. पूण शिक्षणीक धोरण राजकी चुलीर आपल्याक जाय तशें शिजोवन ताचेर ताव मारपाची संद मात तांच्या हातांतल्यान गेली. म्हानगरपालिकेची वेंचणूक दोळ्या मुखार दवरून एकठांय येवपाचो एखादो नवो फॉर्म्युला तांकां आतां सोदचो पडटलो. गोंयांत मात राष्ट्रीय शिक्षणीक धोरणांतल्या तरतुदी वेल्यान अजून तरी तसो वाद उप्रासूंक ना ही तशी थाकाय दिवपी गजाल आसा. अर्थांतच ऐच्छिक भाशा म्हणून दोन देशी भाशांची निवड करपाची मेकळीक आशिल्ल्यान ताचेर वाद निर्माण जावपाचो प्रस्नूच उप्रासना. राष्ट्रीय शिक्षणीक धोरणाची हांगा कितली मेरेन अंमलबजावणी जाता हाचेर अजून स्पश्टताय दिसून येना हेंवूय तितलेंच खरें आसा. शेजारच्या महाराष्ट्रांत राष्ट्रीय शिक्षणीक धोरणाच्या अंमलबाजवणे वेल्यान सुरू जाल्लें वादळ सरकारान वेळारूच दोन पावलां फाटीं सरून तात्पुरतें थंड केलां. ठाकरे भाव परतून एकामेकांक टाळी दितले काय ना हें पळोवपा खातीर आतां कांय काळ आमकां वाट पळोवची पडटली.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
