भांगरभूंय | प्रतिनिधी
33 टक्के नारीशक्ती वंदन विधेयकाक राज्यांच्या विधानसभांनी मान्यताय घेवपाची प्रक्रिया रोखडीच सुरू जातली. सगल्या राजकी पक्षांनी नारीशक्ती वंदन विधेयकाक राखीवतेक लोकसभेंत, राज्यसभेंत येवकार दिला. ते खातीर राज्य विधानसभांनी नारीशक्तीक वंदन करपाक आडमेळीं आसची ना. लोकसभेची वेंचणूक लागीं पाविल्ल्यान विधेयक बेगीन चालीक लावप म्हत्वाचें. बायलां खातीर राखीव मतदारसंघ खंयचे आसचे, विधेयक केन्ना चालीक लावपाचें तें थारावप हे दोन मुखेल विशय. 2021 च्या जनगणेनेचो तात्पुरतो लोकसंख्या नियाळ जाहीर जाला. त्या नियाळाचेर निंबून विधेयक चालीक लावप, मतदारसंघ राखीवतेचेर केंद्रीय मंत्रीमंडळ निर्णय घेवंक शकता.
नारीशक्तीक ते खातीर चारूय वटांनी चेपण हाडचें पडटलें. राजकी पक्षाच्या प्रदेश संघटणांनी, बायलां विभागांनी प्रधानमंत्र्यां कडेन 33 टक्के राखीवता बेगीन चालीक लावपाची मागणी करची. जे पद्दतीन भारतीय जनता पार्टी आघाडी सरकारान (एनडीए) बायलां राखीवता विधेयक मांडून मंजुरी मेळयली तें पळेल्यार अंमलबजावणी कठीण न्हय. प्रधानमंत्री नरेंद्र मोदी हांकां नारीशक्तीचें म्हत्व कळ्ळां तें तांच्या विधेयका वेळार केल्ल्या भाशणांतल्यान होलमता. मायभास, मातृशक्तीक वंदन करपी प्रधानमंत्र्यां कडेन 2024 त 33 टक्के बायलांक राखीवता बेगोबेग दिवपाची राजकी इत्साशक्तूय आसा. मोदीजींनी केंद्रीय मंत्रीमंडळांत दुडवां खातें वित्त मंत्री निर्मला सीतारमन हांचे वरीं सबळ अस्तुरे कडेन दिलें. आपले करणेन भाजपा उच्च शिक्षण आशिल्ले नारीशक्तीक मानाचें पद दिता हें प्रधानमंत्र्यांनी दाखोवन दिलां. विधेयकाक मान्यताय मेळ मेरेन ते चिंतेस्त दिसताले, संसदेंत बसूनय रावले.
विंगड विंगड सरकारी येवजण्यांचो लाव फाटल्या दोन दसकांनी घेवन 60 टक्के चलयो, बायलां शिक्षण, अर्थीक नदरेन बळिश्ट जाल्यांत. उंचेलें शिक्षण आनी अर्थीक बळग्यांतल्यान बायलां मदीं निर्णयक्षमता आयल्या हाची जाणविकाय सरकाराक आसा. लोकसंख्येंत बायलांचे प्रमाण लागीं लागीं 48 टक्क्यांचेर पावलां. लोकसभेंत, विधानसभेंत अस्तुरी दादल्या आड वेंचणुकेंतल्यान झुजत पावता. अस्तंत बंगालच्यो मुख्यमंत्री ममता बॅनर्जी फाटले विधानसभा वेंचणुकेंत केंद्रातले सत्ते कडेन झुजून जिखल्यो. राज्यसभेंत तांणी शिकिल्ली नारीशक्ती आपल्या राज्यांतल्यान धाडल्या. बायलां राखीवता विधेयक 2024 त चालीक लायल्यार ममताजी भाजपा वांगडा कित्याक येवच्यो न्हय? सगल्या राजकी पक्षांचो विधेयकाक तेंको मेळोवप, विधेयक एकमतान मंजूर जावप हें व्हड जैत. बायलां राखीवतेच्या जैताचे घुडयेचेर भाजपाक वेंचणुकेंत येस मेळटलेंच.
विधेयक 2024 त लोकसभे खातीर चालीक लागलें ना जाल्यार केंद्र सरकाराक काँग्रेस लक्ष्य करतली. तृणमल काँग्रेस, आम आदमी पार्टी काँग्रेसी बरोबर आसतल्यो. धा वर्सां उपरांत केंद्र सरकारांतल्या कांय प्रस्थापितांक लोकसभा वेंचणुकेंत धपको बसतलो. एनडीएच्या पयल्या पांच वर्सांत जी उदरगत जाली ना ती फाटल्या साडेचार वर्सांनी जाल्या. ताचो लाव सरकाराक मेळचो ना अशें न्हय, पूण पक्ष फोडाफोडीचें राजकारण म्हारग पडूं येता. सगलेच मंत्री, खासदार जिखचेनात हें कळिल्ल्यान कांय खासदारांक उमेदवारी दिवप ना हें भाजपान थारयलां. पिराय, शिक्षण हे मुद्देय प्रधानमंत्री मतींत घेतात अशें तांचे चलणुकेंतल्यान होलमता.
मजगतीं, केंद्रीय मंत्रीमंडळांत केल्ल्या बदलांतल्यान तें दिसून आयलां. फाटल्या स म्हयन्यांनी केंद्र सरकारांत नवे मंत्री येतले असो बोवाळ चलिल्लो. मंत्रीमंडळांतलीं कांय म्हत्वांचीं खातीं एकाच मंत्र्या कडेन उरिल्ल्यान खात्यांत अपेक्षे प्रमाण कामकाज जावंक ना. खूबशा खात्यांची फेररचणूक जाल्या, पूण नवे कायदे जावनूय ते फक्त कागदार उरल्यात. निमाण्या खिणाक भाजपा शिस्तीन, लिपचोरयां फुडें वता तरी भितरलें राजकारण जांच करूंक शकता. महाराष्ट्रा वरीं राज्यांत लोकसभा वेंचणुकेंत जिखपा खातीर 33 टक्के बायलां राखीवता विधेयक 2024 वर्सा चालीक लावप गरजेचें. स्त्रीमुक्ती चळवळींतली महाराष्ट्रांतली स्त्रीशक्ती नेटान राजकारणांत येता. गोंया वरीं राज्यांत 50 टक्क्यां परस मतदारसंघांनी अस्तुरेची मतदारसंख्या चड आसा. गोंयांत उच्च शिक्षण घेतिल्ल्यो आवयो, सुनो, धुवो आसात, साक्षरतायेंत गोंय उंचेले सुवातेर आसा.
उत्तर प्रदेश, मध्य प्रदेश, कर्नाटक, राजस्थानांतूय नारीशक्तीच्या सबळीकरणाचें वारें व्हांवता. मागीर 33 टक्के बायलां राखीवता विधेयक 2024 त कित्याक नाका? देशाच्या स्वातंत्र्याच्या अमृतकाळांत एनडीए सरकारान एक अस्तुरी राष्ट्रपती दिल्यो. बायल लोकसभा अध्यक्ष, राजस्थान, मध्य प्रदेश, दिल्ली, गुजराताक मुख्यमंत्री, सभापती, विरोधी पक्ष फुडारी भाजपान दिल्यात. काँग्रेस युती आनी भाजपा आघाडीचे सर्तींत बायलां आड बायलांय झुजल्यांत. राखीवता येतकूच बायल आड बायल सर्त आसतलीच तेन्ना बायलांनी राजकारण खेळचेंय पडटलें. जिखपाची तांक पळोवन उमेदवारी मेळोवपाचो वावर बायलेक करचो पडटलो. वेंचणुकेंत देंवतकूच वैयक्तीक टिका जावची न्हय हें स्त्रीशक्तीन मतींत दवरचें. देशाचे घटनेचो अमृतकाळ लागीं आसतना स्त्रीशक्तीक 33 टक्क्यांनी संसदेंत पयलीं धाडप ही काळाची गरज.
भारताचे नारीशक्तीच्या हातांत देशाच्या गृह मंत्रीपदाच्यो चाव्यो आयल्यार बदलिल्ले घटनेंत स्त्रीशक्ती जळींमळीं दिसतली. बायलांच्या समानतायेच्या युगाक आरंभ घटनेच्या अमृतकाळांत जाल्यार भाजपाची मनुवादी प्रतिमा बदलतली. जाय फक्त इत्साशक्त तिवूय राजकी, बायलांक शारिरीक, मानसीक घटाय दिवपाची कायद्यांतल्यान.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
