भांगरभूंय | प्रतिनिधी
पणजी: जिल्हो पंचायत वेंचणुके खातीर काँग्रेसीन आनी गोवा फॉरवर्ड पक्षान केल्ले युतींत कसलीच नैतिकताय ना. दोनूय पक्षांनी फक्त स्वताचें राजकी अस्तित्व तिगोवपा खातिरूच युती केल्या. हातूंत सगल्यांत व्हड लुकसाण जालां तें आरजीपीचें अशें आम आदमी पक्षाचे कार्यकारी अध्यक्ष वाल्मिकी नायक हांणी सांगलें.
बुधवारा पणजेंत जाल्ले पत्रकार परिशदेंत ते उलयताले. ह्या वेळार अमीत पालेकार आनी श्रीकृष्ण परब हाजीर आशिल्ले.
नायक हांणी म्हणलें, विरोधी पक्षाची युती जातली अशी चर्चा सुरू जाले उपरांत आमी ह्या युतींत नाशिल्ल्याचें स्पश्ट केल्लें. आमकां ह्या युतीचें कितें जातलें हे पयलींच खबर आशिल्लें. आमी नोव्हेंबरांतूच ह्या युतीचो फुडार सांगिल्लो. काँग्रेस निमाण्या दिसां मेरेन सुवातो वांटप करची ना हेंवूय आमकां खबर आशिल्लें.
विधानसभा वेंचणुकेंत उमेदवारां कडल्यान सोपूत घेवन लेगीत तांच्या आमदारांनी पक्षांतर केलें. जिल्हो पंचायत वेंचणुकेंत लोक हे विशीं जाप विचारतले म्हूण काँग्रेसीक युती करची पडली.
हे वरवीं तांणी हेर विरोधी पक्ष आपले बराबर आसात हेंवूय दाखोवपाचें आसा. गोवा फॉरवर्ड पक्षाच्या एकसुऱ्या आमदाराक फुडले विधानसभा वेंचणुकेंत भाजपा प्रदेशाध्यक्षा आड लडपाचें आसा. तांकां ही लडत सोंपी वच्ची ना. भाजप विजय सरदेसाय हांकां हारोवपा खातीर पुरायपणान यत्न करतलो. हाका लागून विजय हांकां लेगीत युतीची गरज आशिल्ली. दोनूय पक्ष स्वताच्या सुवार्था खातीर एकठांय आयल्यात. ह्या युतीचें कितें जातलें हें आयज सगल्यांनी पळयिल्ल्याचें नायक हांणी सांगलें.
अमीत पालेकार हांणी म्हणलें, जिल्हो पंचायत वेंचणुके खातीर फक्त आप गंभीरपणान काम करता. आमी 50 पैकीं 42 सुवातांचेर उमेदवार दवरल्यात. उरिल्ल्या 8 सुवातांचेर आमी उमेदवार पळोवन तेंको दिवपा विशीं निर्णय घेतले. आमचे 80 टक्के उमेदवार हे 35 वर्सां परस उण्या पिरायेचे आसात. बायलां खातीर आरक्षीत नाशिल्ल्या सुवातांचेर लेगीत आमी 6 बायल उमेदवार उब्यो केल्यात. आमी जिखून येवपाचे तांकी परस उमेदवाराची विस्वासार्हता पळयल्या.
जाल्यार लग्न लेगीत करूं…
जिल्हो पंचायत वेंचणुकेच्या युतीच्या प्रेम प्रकरणांत खरें प्रेम करप्याक कांय गजाली शिकूंक मेळ्ळ्यांत. विधानसभा वेंचणुकेंत गोंयच्या विकासा खातीर आमी प्रेम प्रकरण करून बरें लग्न करपाक तयार आशिल्ल्याचें अमीत पालेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
