भांगरभूंय | प्रतिनिधी
ए का खाजगी वांगड्याचें राजभाशा विधेयक विधानसभेन मंजूर केलें ना म्हणून आमी कोंकणी प्रजेचो आवाज ही संघटणा घडयली आनी देडेक वर्स (555 दीस) गोंयभर शांततायमय आंदोलन चलयलें. उपास, मोरचे, बंद, बी करून आमी आमची मोख साधपाचो यत्न केलो.
एक दोन खेपे अहिंसक मार्गान चलतल्या आंदोलनान हिंसक मोडणांय घेतलीं, पूण अखेरेक आमकां भियेवन केंद्र सरकारान कोंकणी राजभाशा करपाचो निर्णय घेतलो आनी गोंय विधानसभेंत राजभाशा विधेयक चार फेब्रुवारी, 1987 दिसा पास जालें. त्या दिसा गोंयचे राजभाशेचो प्रस्न 555 दिसांच्या आंदोलना उपरांत सदां खातीर सुटलो.
पूण आज कांय शक्ती तो परतून उचकून काडपाचो यत्न करतात. आज कोंकणीचें विधायक कार्य चलता. सगल्या मळांचेर कोंकणी फुलता, फळटा कारण सगले लोक कोंकणीच उलयतात – काल गोंयांत आयिल्लो मानांय आज गोंयांत पाविल्ल्या कामगारा कडेन कोंकणीच उलयता. हे परिस्थितींत राजभाशा कायदो बदलपाची मागणी करप हें तर्काक धरून ना.
कोंकणीची वाटचाल कशी कितें जाली तें पळोवया आनी मुखार सरुया….
तेन्ना (जनमत कौलाच्या काळार) असो एक नारो घुमतालो – गोव्याची मातृभाषा मराठी आणि कोंकणी तिची बोली. म्हणून गोव्याचे विलिनीकरण महाराष्ट्रात झालेच पाहिजे.
आतां,
गोंयची मातृभाशा मराठी आनी कोंकणी तिचें लिखीत स्वरूप.
0
कोंकणीचें लिखीत स्वरूप म्हणजेच गोंयची मातृभाशा मराठी.
0
लिखीत स्वरुपांतली कोंकणी ही गोंयची मराठी.
अशें आसा जाल्यार कोंकणी म्हणजेच गोंयची मराठी. सगलीच कोंकणी ही गोंयची मराठी.
सगलीच कोंकणी ही गोंयची मराठी जाल्यार मराठी म्हणून आनीक वेगळी कशी? म्हणटकच, गोंयांत सगली कोंकणीच, आनी मराठी म्हणून कांय ना.
तशें जाल्यार गोंयचे मराठीचें कितें जालें?
गोंयची मराठी कोंकणींत विरगळून गेली. आनी म्हणून गोंय राज्यांत प्रशासकी मळार – जावं सरकारी जावं नीम सरकारी – सगले कडेन कोंकणीच आसूंक जाय.
मागीर मराठी मराठी म्हणटात ती खंयची भास? ती महाराष्ट्राची राजभास. महाराष्ट्र हें भारत देशाचें एक घटक राज्य आनी ताची राजभास मराठी. आमचें सुपुल्लें गोंयूय बी एक घटक राज्य आनी ताची राजभास कोंकणी.
एका राज्याची राजभास दुसऱ्या राज्याच्या प्रशासकी कारबारांत खंयच्या आधाराचेर मागूं येता? तिच्यान खंयच्याच आधारान तशी सुवात मागूं नजं!! गोंयांत मराठी मराठी म्हणून सकयल वयर जातात ते दुसऱ्या राज्याची राजभास आपली म्हणून सांगतात, आनी तिचे खातीर सरकारा कडेन मागणी करतात.
दुसऱ्या राज्याचे भाशेच्यान आमच्या राज्यांत सुवात कशी कितें मागूं येता? तिच्यान ती मागूं नजं, आनी तिणें तशी मागली जाल्यार गोंय सरकारान तें कानामनार घेवपाची गरज ना.
पोस्टमनांचे नेमणुके विशीं सरकारान जी कडक भुमिका घेतल्या ती प्रशासनाच्या सगल्या मळांचेर घेवची अशें हांव मुख्यमंत्री, डॉ. प्रमोद सांवत हांचे कडेन मागतां.
गोंयच्या गांवांनी टामटीम करून आनी ल्हान ल्हान वेवसाय, धंदे आनी नोकऱ्यो करून लोक आपलो संवसार चलयतात. अश्या कांय गांवांनी दादा लोक निर्माण जातात आनी ते हाका ताका धरून गब्बर जाल्ले आसतात, आनी आपल्याक व्हडले समजतात.
असो एक दादा एक दीस एका टामटीमकारागेर वता आनी ताका आपलीं व्हडपणां सांगता. “आरे, कितें रे, तूं लॅम्बीच घेवन भोंवता, आनी फाटल्यान बायलेकूय बसोवन व्हरता? म्हाका पळय मरे. हांव कितलो व्हड तें पळय. म्हज्यो तीन मोटारी आसात. म्हजे खातीर एक, बायले खातीर एक आनी पुता खातीर एक. पळय मरे हांव केदो व्हडलो तो! आनी तूं तसोच?
ताचें तें ‘हांव व्हड, हांव व्हड’ आयकून त्या टामटीमकाराक ताचो राग येता. “आगा, हेदोळच्यान तुजें ‘हांव व्हड, हांव व्हड’ पुराण हांव आयकतां. तूं जाशीत गा व्हड, पूण तो तुज्या घरा. म्हज्या घरा हांव व्हड.”
म्हज्या घरा हांव व्हड हें खूब मोटें तत्व आसा. हातूंतलें मर्म जण एकल्याक कळप बरें अशें कोंकणी व्याकरणकार सुरेशबाब जयवंत बोरकार म्हणटात.
गोंयांत गोंयकार व्हड. आनी ताची भास कोंकणी ही हांगा सगल्यांत व्हड. हेर भासो जरी कितल्योय व्हड आसल्यो तरी त्यो गोंयांत कोंकणी परस ल्हान (म्हणजे, दुसऱ्या क्रमांका वयल्यान सकयल).
म्हज्या घरा हांव व्हड ह्या तत्वांतलें मर्म कळ्ळें जाल्यार गोंयचो सगलो राजकारबार कोंकणींतूच, आनी फकत कोंकणींतूच जावंक जाय. हें मर्म आमच्या सत्ताधाऱ्यांक कळटलें असो विस्वास हांव धरतां आनी त्या मर्मा प्रमाणें तांचे कडल्यान कार्य घडटलें अशी अपेक्षा करतां.
आपल्या कार्यकाळाचीं स वर्सां डॉ. प्रमोद सांवत हांणी हालींच पूर्ण केल्यांत. तांच्या कार्यकाळाच्या सातव्या वर्सा प्रशासनाचो वावर तांणी मोट्या नेटान आनी सगले कडेन कोंकणीचो वावर कडकसाणीन आनी धिरान करचो. आमच्यो शुभेत्सा.
दामोदर घाणेकार
84599 98914
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
