राजकारण

भांगरभूंय | प्रतिनिधी

‘दाबोळी’चेर मुख्यमंत्र्याचो विरोधकांक थोमणो

वेंचणूक लागीं पाविल्ल्यानूच दाबोळीचो मुद्दो : मुख्यमंत्री डॉ. सावंत

भांगरभूंय । प्रतिनिधी

पणजी : वेंचणूक लागीं पाविल्ल्यानूच विरोधी पक्ष दाबोळीचो मुद्दो परत परत खणून वयर काडटात. फक्त दाबोळी विमानतळाच्या प्रस्नाचेर वेंचणूक जिखपाक मेळची ना. गोंयाक दोनूय विमानतळांची गरज आशिल्ल्यान दाबोळी विमानतळ केन्नाच बंद जावचो ना, अशें मुख्यमंत्री डॉ. प्रमोद सावंत हांणी स्पश्ट केलां. 

दाबोळी विमानतळ नौदळ ताब्यांत घेवपाचे तयारेंत आशिल्ल्यान बेगिनूच तो बंद जातलो, अशी शक्यताय उक्तायतात. दाबोळी विमानतळा विशीं सरकारान सात दिसांनी धोरण स्पश्ट करचें, ना जाल्यार आंदोलन करपाची शिटकावणी गोवा फॉरवर्डचे अध्यक्ष विजय सरदेसाय हांणी दिल्या. दाबोळी विमानतळ हो वापरा बगर (घोस्ट अ‍ॅरपोर्ट) रावपाचो भंय काँग्रेस विधीमंडळ फुडारी युरी आलेमांव हांणी उक्तायला. दाबोळीची चर्चा दिल्लीकूय पाविल्ल्यान खासदार विरियातो फर्नांडीस हांणीय संसदे भायर व्हिडियो काडून दाबोळी बंद जातलो, अशें विधान केलां. बिरेस्तारा सगले कडेन दाबोळी विमानतळा विशीं चर्चा सुरू आशिल्ली. 

वेंचणूक लागीं पाविल्ल्यान विरोधी विवीध विशय निर्माण करतात. दाबोळी विमानतळा वयल्यान सध्या राजकारण सुरू आसा. दाबोळी विमानतळा विशीं संरक्षण मंत्री राजनाथ सिंह हांचे कडेन म्हजी चर्चा जाल्या. गोंयाक दोन विमानतळांची गरज आसा. दाबोळी विमानतळाचो वापर नौदळ तशेंच नागरी विमान येरादारी खातीर चालूच उरतलो. संरक्षण मंत्र्यांनी हें आस्वासन दिल्ल्यान दाबोळी केन्नाच बंद जावचो ना, अशें मुख्यमंत्र्यांनी म्हणलें. 

‘दाबोळी’ बंद जावचो ना : मुख्यमंत्री

कोणाच्याच चेंपणाक लागून विमानतळ बंद करपाचो निर्णय केंद्र सरकार घेवचें ना, अशें आस्वासन मुख्यमंत्री ह्या नात्यान हांव दिता, अशें मुख्यमंत्री डॉ. सावंत हांणी म्हणलें. जीएमआर कंपनी दाबोळी बंद जावचे खातीर चेंपण हाडिल्ल्याची म्हायती येरादारी मंत्री मॉविन गुदिन्हो हांणी दिल्ली. हाचेर मुख्यमंत्र्यांनी हें स्पश्टीकरण दिलें. खासदार विरियातो फर्नांडीस हांणी संसदे भायर दाबोळी विशीं केल्लें विधान  बेजबाबदारपणाचें आशिल्ल्यान राजकी लावा खातीरूच तांणी विधान केल्ल्ल्याचो आरोप मुख्यमंत्र्यांनी केलो.