राजकारणांतलें सोंवळें, देव आनी खेव…

भांगरभूंय | प्रतिनिधी

मुखेल म्हणल्यार आयज सोंवळीं न्हेंसून देवाचेर मोग कोण दाखयता? जो देवा मुखार उबो रावून सोपूत घेता आनी आपलें सादतकच सोपूत तोडटा तो!!!

राजकारण्यांक राजकारणाचे चुलीर कितें ना कितें तरी शिजयत दवरचें पडटा. हे चुलींतलोय इंगळो आपलें अस्तित्व शेणयतकच ताचो गोबोर जाताच. हे खातीर चुलींत लांकडां सारीत रावचीं पडटात. हें आमकां गोंयांतच न्हय तर जंय जंय राजकारण आसा, थंय थंय दिश्टी पडटा. हालींसराक भगभगपी प्रस्न कुशीक दवरून ताचेर धांपण घालपा खातीर हे राजकारणी धर्माचेर राजकारण करतना दिसतात. ते ज्या मार्गार चलतात, त्या मार्गार भौसाची गर्दी नासतना शेणटले हातूंत दुबाव ना.
गोंयचेंच उदाहरण घेवपाचें जालें जाल्यार, आमचे कांय वेंचीक राजकारणी लोकांक आपले वटेन ओडपाक कसलीं कसलीं कारस्थानां करतात हें स्पश्ट दिश्टी पडटात. हालीं तर एका बिगर- हिंदू फुडाऱ्याक हिंदू धर्माचो खुबूच मोग जाल्लो दिश्टी पडटा. तो सोंवळें न्हेंसून देवळांनी पुजा करता, महाकुंभांत वचून आपलीं पापां धुता आनी आपूण आपल्या धर्मा परस ‘चड हिंदू’ अशें सांगता. कितल्या लोकांक हें खरें दिसता खबर ना. पूण येदें व्हडलें विधान करपा फाटल्यान ह्या राजकारण्याचो कितें ना कितें तरी हेत आसतलोच न्हय? अशा राजकारण्यांचो लिपिल्लो हेत सगळ्यांकच कळटा अशें ना. ताचोच फायदो घेवन ते लोकांक आपूण ‘तुमचोच’ म्हूण दाखोवपाचो यत्न करतात.
बिगर-हिंदू व्यक्तीन हिंदू धर्माच्या कार्यावळींनी वांटो घेवप चूक न्हय. दरेककल्यान आपल्या धर्मा बरोबर दुसऱ्या धर्मांचोय रेस्पेद करपाक जाय. मान राखपाक जाय. जो धर्मनिरपेक्ष भावनेन आपल्या जिणेचीं पावलां मारता, तो खंयच्याय धर्माचें प्रार्थना थळ दिसलें म्हणटकच आपले परीन पांय पडटा, ताचो मान राखता. ताका कसलींच नाटकां करपाचीं गरज पडना. सहज काळजा मेरेन हात पावता आनी त्या त्या धर्माच्या देवांक आमी काळजांत सुवात दितात. ही आमच्या, कसलोच सुवार्थ नाशिल्ल्या, गोंयकाराची खाशेलताय. पूण हाचे सारक्या उरफाटे आमचे कांय वेंचीक राजकारणी वागतात. तांकां भौस दिसता तेन्नाच तांचो हेर धर्मांच्या देवां खातीर ‘आशिल्लो?’ मोग जागो जाता.
आपल्या मतदारसंघांत अमूक धर्माचे लोक चड आसात म्हूण ‘राजकी धार्मीक नाटकां’ करप समा न्हय. हातूंतल्यान कांयच निश्पन्न जायना, वयल्यान विचार आशिल्ल्या लोकां कडल्यान हांसून घेवपाचो प्रकार तो… आपूण ज्या धर्माचो मनीस म्हूण जल्माक आयला, ताचोय अभिमान बाळगप आनी त्या धर्माचो मान राखप गरजेचो. मागीर जुवानपणांत ‘मनीस तस्करी’ करपाक कुप्रसिद्ध जाल्लो जाण्टे पिरायेचो व्यक्ती जर दुसऱ्याच्या धर्माचेर आनी धर्मगुरुंचेर बेश्टेच आरोप करतात, जाल्यार ताच्या विधानांचो आनी आरोपांचो निशेध करपाचेंय धाडस अशा फुडाऱ्यांनी दाखोवप गरजेचें. तें दाखयलें ना जाल्यार फक्त सत्तेंतल्यान भायर पडटलो ह्या भंयान सोंवळें न्हेंसला हें सिद्ध जातलें.
बऱ्याच वर्सां आदीं एका राजकीय फुडाऱ्यान आपूण ‘किरिस्तांव हिंदू’ अशें विधान करून वाद निर्माण केल्लो. ह्या वादाक लागून तो आपल्याच मनशांचे नदरेंतल्यान पडिल्लो. राजकारणी मतां मेळटा जाल्यार जाय तेन्ना जाय तो धर्म आपणावक फाटीं रावचे नात. मुळांत तांचो स्वताचो ‘राजकीय धर्म’ आसता लोकांक पिशांत काडपाचो, फटींगपणां करपाचो, लोकांक पिशांत काडपाचो आनी समाजा मदीं फूट घालपाचो. आमचो समाज कांय परीन तांच्या जाळ्यांत फसतात अशें म्हणल्यार अतिताय जावची ना. फक्त अशा भामट्यांक ‘पालखेंत’ घालून नाचयना जाल्यार पुरो. कित्याक तर ती सुवात सर्वोच्च आसा. देवाच्या नांवाचेर राजकारण करपी अशा सकयल्या पातळेच्या व्यक्तींक देवाची दिवली पेटोवंक लेगीत दिवंक जायना.
2017 चे विधानसभा वेंचणुके आदीं उत्तर गोंयचो एक किरिस्तांव आमदार फोंडें म्हालांत एका ‘बाबा’च्या मेहलांत धार्मीक कार्यावळीक आयिल्लो. थंय ताका ह्या बाबाचे चडशे अनुयायी आपल्या मतदारसंघांतलेच आसात हें दिश्टी पडलें. घडये ताका तें सगळें खबर आसूंक जाय आनी तेच खातीर तो हे कार्यावळीक वेळार हजर राविल्लो. हे कार्यावळीक राज्यांतले ‘रती महारती’ राजकारणी हजर आशिल्ले. तांच्या सगळ्यांच्या मुखार ह्या आमदारान आपल्या भाशणांत ह्या बाबाची खुबूच तुस्त तोखणाय केली आनी ताणेंच आपल्याक जिखून हाडिल्लो अशें विधान केलें.
हो ‘बाबा’ ताच्या प्रचाराक भोंविल्लो काय कितें तें खबर ना. पूण आमदारान तशें विधान करतकच ह्या बाबानूय तोंडार हांसो फुलोवन आपणें ‘चमत्कार’ केल्ल्याचें लोकांक भासोवन दिलें. वादळ थांबोवपाचो, पावस झडोवपाचो आनी उजो पालोवपाचो चमत्कार ह्या बाबाक कळटा काय खबर ना. पूण सुवार्थी आनी भ्रश्ट राजकारणी ताच्या पांयां मुखार नथमस्तक जातना दिसतात. ते ओगीच न्हय!!! ह्या बाबा कडेन आपल्या अनुयायांचीं मतां आसात… तो सांगता त्या उमेदवाराक तीं मतां पडटात…
हालींसराक धर्मा विशीं उलयले, बरयलें जाल्यार राजकारणाक वेंग मारून आशिल्ल्या लोकांच्यो भावना दुखतात. गोंयांत भावना दुखिल्ल्याच्यो कागाळी खूब जाल्यात आनी अशा वेळार हे सगळे एकठांय येवन पुलीस यंत्रणेचेर दबाव घालतात. बारीक समाजाचेर जेन्ना अन्याय जाता, गोंयचेर जेन्ना अन्याय जाता वा हिसपा भायर म्हारगाय वाडटा तेन्ना अशे तरेची ‘महायुती’ दाखोवपाची गरज आसा अशें तांकां दिसना काय? जाती धर्माच्या नांवान लोकांक खुबळावन घालतना ताचो परिणाम आमच्या भावकीचेर कितें जातलो हाचोय कोण विचार करिना.
मुखेल म्हणल्यार आयज सोंवळीं न्हेंसून देवाचेर मोग कोण दाखयता? जो देवा मुखार उबो रावून सोपूत घेता आनी आपलें सादतकच सोपूत तोडटा तो!!! आमचे कडेन वेगळीवेगळी कुशळटाय आशिल्ले राजकी फुडारी आसात. देवा कडेन उलोवपाचीय कुशळटाय तांकां आसा. अशे हे फुडारी लोकां मदीं आयज ‘एक्सपोज’ जाल्यात. पूण देवाच्या उतरा कडेन ‘डीफॅक्शन’ करपी ह्या सुवार्थी फुडाऱ्यांच्या कृत्यांचेर तांच्या कार्यकर्त्यांच्यो धार्मीक भावना दुखनात. कित्याक? देवा कडेन उलोवन, देवाकूच फटोवपी फुडारी आमकां चलतात? अशा फटीच्या आनी सुवार्थाच्या भावनांच्या इंगळ्यांचो गोबोर जावप गरजेचो. तो जालो ना जाल्यार धर्माच्या नांवार फुडारी आपलें सादयत रावतले आनी आमच्या गोंयचें घट्टण करतले…

संजय बोरकार
9921343430