भांगरभूंय | प्रतिनिधी
श विदेशांत शिक्षण घेवन भारताक उदरगतीची वाट दाखोवपी गोंयचे पूत विज्ञानिक डॉ. रघुनाथ माशेलकार. तांणी २०२० वर्सा मेरेन भारत महासत्ता जातलो असो अदमास गोंयांत उक्तायल्लो. अमेरिकेंत बदलपी वातावरणाचो लाव भारताक जातलो. भारत महासत्तेचे दिकेन पाविल्ल्यान तें शक्य जालां. डॉ. माशेलकार हांणी उक्तायल्ल्या तेंपार देश महासत्ते मेरेन पावपाक कळाव जाला आसत, पांच वर्सां चड लागल्यां पूण महासत्ता पयस ना.
विदेशांत खूब तेप व्हडा अधिकारी पदार वावर केल्लेय देशाची अर्थनिती सांबाळपाक फुडें आयल्यात. ते देशाक महासत्ते कडेन व्हरपाक नव्या अर्थतंत्रांतल्यान गिरायकां मेरेन वचपाची तयारी करुंक लागल्यात. भारताक महासत्ते मेरेन व्हरपाक देशाक मेळिल्ल्यो अस्तुरी अर्थमंत्री निर्मला सीतारमण हांचो व्हड वांटो. जापसालदारकेन वावुरतना देश विदेशाचो विस्वास जोडप तेंय एके अस्तुरेक सोंपें न्ही. निर्मलाताई ते करुंक शकल्यो, तातूंतल्यान भारताची अर्थनिती बदलता, महासत्तेचो खीण लागीं आयला हें आतां दिसूंक लागलां.
राजकारणांत अर्थकारणाक म्हत्व आसा. अस्तुरी देश विदेश निती अर्थकारणांत सामील जाता ताची नसाय जातलीच पूण ती आतां फाटीं कशी सरतली? देशाच्यो अर्थमंत्री अर्थशास्त्राचें शिक्षण घेतिल्ल्यो, वक्तृत्वाची कुशळटाय तांचे लागीं आसा. विदेशांतल्यान तांची बळिश्ट भारतीय अस्तुरी म्हणून तोखणाय जाल्या. वर्सानवर्स विदेशनितींतय तांचें बळगें वाडटा. भारताक मेळिल्ली दुसरी अस्तुरी अर्थमंत्री अर्थकारणा कडेन पळयतना स्त्रीशक्तीक अर्थकारणांत हाडपाचे यत्न जाल्यात.
पंतप्रधान नरेंद्र मोदी हांच्या केंद्रीय मंत्रिमंडळाच्या मुखेल मंत्र्यांच्या पंगडांत तांचो आसपाव आसा. आपल्या खात्याची जापसालदारकी सांबाळून बदलपी कायदे, धोरणां, निर्णयांक तेंको दिवपाक त्यो सदांच मुखार. अर्थकारणा इतलोच राजकारणाचोय अभ्यास त्यो करतात हाची जाणवीकाय तांच्या भाशणांतल्यान जाता.
राजकारणांत पावल दवतना, दवरतकच उंचेल्या पावंड्या मेरेन पावपाक वाचन गरजेचें. मुखेल दिसाळीं भोव- माध्यमी जाल्यांत, खबरो दिसभर मेळटात. त्यो दुसरे दिसा वाचपाक पाववनात तेन्ना संपादकीय, विचारमंथन, विचारांक खावड घालपी लेख राजकारण्यांनी वाचचे. तंत्रज्ञान, उदरगतींतल्यान जाल्ले बदल, फाल्यां खातीर सांगपी आयज उणे जातात तेन्ना कालच्या विचारांची पुस्तकांनी जाल्ली बांदावळ उपेगाची. निर्मलाताईचें अर्थकारण सादूरतायेंतल्यान, देश विदेशांची नितीचो अदमास घेतिल्ल्यान, साहित्य सांगातांतल्यान, अधिकाऱ्यां कडेन भासाभास केल्ल्यान सुदारलां पिराय, मनीसपण, समाजीक बदलांची सावळी आयज भारतीय अर्थकारणाचेर दिसपाक लागल्या. एक कामगार फुडारी जेन्ना विरोधी पक्षाचे फुडारपण करतात तेन्ना ते कालचेवरी आसात, तांचो भेस, भास बदलूंक ना? कामगारनिती कालचेपरस फाल्यांची कशी आसतली? कामगार उद्येगपती, आमदार, मंत्री जाल्यात? तातूंत अस्तुरी खंय आसा? अस्तुरेकय ते नितीचो विसर पडूंये. निर्मलाताई बदलांक आपणायत गेल्यो तरी नीत विसरुंक ना, कामगारशक्तीच्या गरजांक अर्थसंकल्पांत फुडारांत चड सुवात मेळटली हाची जाणवीकाय जाता.
एक देश एक वेंचणूक हें विचारमंथन जावपाक सोडिल्लें अस्त्र आसा. वेंचणूक कायदे, वेंचणूक आयोगाची नवी बांदावळ जावची, आत्र्या पय़ऱ्यान जावपी वेंचणुकांचेर जो खर्च जाता ताका कातर लागची. वेंचणुकेपासत विशेश मनीसबळ बांदप ही मोख दवल्ल्यार फुडलीं पंचवीस वर्सां तिगपी वेंचणूकनिती जातली. शिक्षणांतल्यान अर्थकारणांत उंचायेर पाविल्ले अस्तुरेक वेंचणुकेचीं दारां उक्तीं जातलीं जाल्यार वेंचणुकेतलें अर्थकारण शिकप, कायद्यांचो अभ्यास करप आनी आपल्या विचारांचीं जोड दिवप म्हत्वाचें. दुसऱ्यांचे आयकून, विचार घेवन साहित्य सरस्वतीक ओंपिल्ल्याचीं पुस्तकां वाचल्यार गिन्यान मेळटा.
वास्तवांत चलप, वचपाचो धर्म निर्मलाताईन आपणायलो. दायज, परंपरांची जतनाय घेतना वारें बदलता, नवीं ल्हारां येतात त्या ल्हारांचो आवाज बारीकसाणेन वाचन केल्यार आयकूंक येता. दुसऱ्यांच्या विचारांतल्यान बारीकसाण घेवपाची तांक निर्मलाताईंक प्रधानमंत्री पदा मेरेन पावोवपी. तांच्या अर्थकारणाची नीत राजकारणांत येवपी अस्तुरेन शिकपाक जाय. पन्नास हजारांचे पन्नास कोटी मेरेनेचे पाविल्लें वेंचणुकेचें अर्थकारण अस्तुरेक कळ्ळ्यार, समाजनिती तिणें वळखल्यार, भलायकी बरी आसल्यार तिचेवांगडा येवपी आसतलेच. भलायकेक गिराण वंश परंपरेनय लागता ताची जाणवीकाय तिका आसची मुखेल करुन राजकारणी, गिरेस्तांक. हालीं मोबायलार तिचेंय वाचप कांय वेळार अती जाता, सुरवेकसावन निमणे मेरेन खबर, काणी, लिखाण वाचल्यारुच लिपिल्लो अर्थ कळटा. माथाळो वाचून कितें घडलें तें कळपाचे, माह्यती मेळपाचे दीस उणे जातात. रकाद, मॅसेजी धाडप अचूक उतरांनी कितलें, कोण करतात? अस्तुरेक तें समजून घेवचें पडटलें.
म्हायती परस मत, विचार मांडपी हजार जातले तेन्ना सांगाती, दुस्मानांची वळख अस्तुरेक आसची. राजकारणांतल्या अर्थकारणांत अस्तुरेचो आसपाव जाता तेन्ना तिचें अर्थकारण एका राजकी पक्षाचें? तिणें पक्षांतर केलां? पक्षनिश्ठ निर्मलाताईच तें सोदतल्यो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
