भांगरभूंय | प्रतिनिधी
चिंतन – 67
तुकाराम महाराज म्हणटात —
तुका म्हणे नको राग धरूं झोंडा।
नुघडितां पीडा होईल डोळे॥
ह्या ओळींत तुकोबा एक सामकी सादी पूण खोलायेन शिकवण दितात — अरे निर्लज्जा, म्हज्या उपदेशाचो राग धरूं नाका. दोळे उगडले जाल्यार फकत तुकाच फायदो जातलो.
आमकां आवडनाशिल्ल्या गजालींचेर आमी मनीस सदांच रागार जातात. कोणेंय आमकां सुदारपाचो सल्लो दिल्यार आमी म्हणटात, “म्हाकाच कित्याक सांगतात?” आनी पयस वतात. पूण खरें म्हणल्यार — राग धरता तो आपल्याच मनाचो कैदी जाता.
पुण्यांतले एके शाळेंत शिक्षकान एका विद्यार्थ्याक वर्गांत खर उतरांनी समजायलें- कारण तो सतत हेर भुरग्यांक त्रास दितालो. शिक्षकान ताका मोगान सांगलें— “तु हुशार, पूण दुसऱ्यांक दुखोवप तुका सोबना.”
पूण त्या भुरग्याक राग आयलो. ताणें शिक्षका कडेन उलोवप बंद केलें. कांय दिसांनी ताचे इश्ट ताचे पासून पयस गेले. मागीर ताका कळ्ळें की शिक्षक चुकीचो नाशिल्लो — ते ताचें बरेंच करताले. चूक ताची स्वताचीच आशिल्ली.
ताणें माफी मागली. शिक्षकान फकत हांसून म्हणलें, “म्हजो राग धरूंक ना, हेंच पळोवन म्हाका खोस जाता.”
अशें कितें तरी 2010 वर्सा संवसारीक नामनेच्या टोयोटा मोटर कंपनींत (जपान) घडलें. तांच्या कांय गाडयांनी ब्रेक आनी एक्सिलरेटर दोश आशिल्ल्याचें दिसून आयलें. लाखांनी गाडयो परतून आपोवच्यो पडल्यो. सगळो संवसार टोयोटाचेर टिका करतालो.
त्या वेळार टोयोटा अध्यक्ष आकियो तोयोदान कितें केलें तें तुमकां खबर आसा? ताणें पत्रकार परिशद आपयली, आनी नम्रपणान संवसारा मुखार माफी मागली.
इतलेंच न्हय, अमेरिकेच्या काँग्रेसी मुखार ताणें आपली चूक मान्य केली आनी सुदारणा करपाचें उतर दिलें. जागतीक कंपनीचो मुखेली आसून लेगीत ताणें अभिमाना बदला नम्रताय आनी जापसालदारकी वेंचली. तोयोडान दोळे उगडले — ताकाच लागून टोयोटा आयज लेगीत संवसारांतली एक विस्वासपात्र कंपनी आसा.
तुमच्या नात्यांत, कामांत, जिणेंत कोणेय सल्लो दिल्यार रोखडेच रागार जावं नाकात. घडये त्या उतरां फाटल्यान मोग, काळजी वा अणभवाचो आवाज आसूं येता.
तुकोबा म्हणटात तशें —
राग सोडात, दोळे उगडात आनी जिणेची तेजस्वी सोबीतकाय अणभवात. रागान मन कुड्डें करता आनी समजुतीन मन उजळटा.
– हभप देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
