राखून दवरुया भांगराळें गोंय

भांगरभूंय | प्रतिनिधी

स्वयंपूर्ण गोंय भांगराळे उरतलें जाल्यार समेस्त गोंयकारा, तुकाय बदलां वांगडा रावपाची गरज आसा.

समेस्त गोंयकारांक,
गोंय राज्य दिसाचीं परबीं. गोंयांक राज्य पावंडो मेळ्ळ्यार 38 वर्सां जालीं. राजभास कोंकणी पासत राज्य पावंड्या मेरेन पावप शक्य जालें. राज्य पावंड्याचे मुखेल शिल्पी आदले मुख्यमंत्री प्रतापसिंह राणे हांचें सरकार. राजभास विधेयकाक मान्यताय मेळोवपा पासत वावुरिल्ले खासदार शांताराम नाईक. तेन्नाचो काँग्रेस पक्ष सत्तेर ना. आदले आमदार अॅड. उदय भेंब्रे हांचे वरी अपक्ष आमदारांनी केल्लो वावर मोलादिक.
समेस्तांनी राजभास कोंकणी आंदोलनातल्यान गोंयांक राज्य पावंड्या मेरेन वचपाक बळगें दिलें. राज्य पावंड्याचो विरोधक आशिल्लो महाराश्ट्रवादी गोमंतक पक्ष आयज सरकारांत आसा जाल्यार राज्याक विरोध करपी आदले केंद्रीय कायदोमंत्री रमाकांत खलप काँग्रेस पक्षांत.
संघप्रदेस तेंपार उदरगतीचीं पावलां मारपा पासत ल्हान- सान निर्णय घेवपाचो जाल्यार केंद्र सरकाराचेर गोंय सरकाराक निंबून रावचें पडटालें. राज्य पावंड्याक समेस्तांनी विरोध केलो ना. 40 वो वर्सदीस फुडल्या वर्सां मनयतना समेस्तांची याद दवरुन चाळीसूय मतदारसंघांनी राज्योत्सवाच्यो ल्हान कार्यावळी जावच्यो. राज्योत्सव मनोवपा पासत गोंय कला अकादमीची सुवात आयजय आसा, आरंभय तेच सुवातींत जाल्लो घोग्यांनी पडपी पावसांत.
उदरगतींत गोंय मुखार वतना चुकोय जाल्या आसत, फाटल्यान मात्शें पळोवन त्यो सुदारपाक येतात. उदरगत आडावप शक्य ना, देसा बराबरीन गोंयांकय फुडें वच्चें पडटा, गोंयकारांच्या फुडाराचें चिंतून. चाळीस वर्सां पयलीं वा उपरांतची लोकसंख्या, बांदकामां, कायदे, उद्येग, शिक्षण आनी हेर मळांच्या उदरगतीचो नियाळ केल्यार नकारात्मक चित्र दिसत. तेच नकारात्मकते कडेन सकारात्मकतेन पळोवन फुडलीं पावलां माल्ल्यार, नियोजन आनी मोख दवरुन वावर केल्यार गोंय देसांतलें उत्कृश्ट राज्य जावंक शकता.
गोंयचे उदरगतींत खण उद्येजकांचो व्हड वांटो आसा, आयज त्याच उद्येजकांनी आपल्या वेवसायाची दिका बदलल्या. गोंयचे उदरगतीक आयजय ते तेंको दितात. तांची देख घेवन शेंकड्यांनी वेवसाय, उद्येजक घडल्यात. तेंपा प्रमाण माथ्याक कुरपणे घालत देसाबराबर गोंय राविल्ल्यान अंदिल्लो, चिड्डिलो समेस्त गोंयकारय व्हड जाला. विश्वांतल्या गोंयकारांक एकठांय हाडपाची मोख अंदूच्या राज्योत्सवादिसा दवरुया.
नवे वाटेर वतना आडमेळीं येतात. आडमेळ्यांतल्यान उदरगती कडेन वतना आदल्याक वेंरोय वता थंय पळोवचें, बेगीन लक्ष दिल्यार लुकसाण जावचें ना, मनीसजीण वाटावतली. राज्यांतले अपघात, दुयेंतीचे प्रमाण उणे जावचें, तंत्रगिन्यानांतल्यान गोंय समृद्ध जावचें, उद्येगीक मळार झगझगचें हे खातीर नियोजन करचें पडटलें. स्वयंपूर्ण गोंय भांगराळे उरतलें जाल्यार समेस्त गोंयकारा, तुकाय बदलां वांगडा रावपाची गरज आसा.

सुहासिनी प्रभुगांवकार
9881099260