भांगरभूंय | प्रतिनिधी
अठरावे लोकसभेचें पयलें अधिवेशन हालींच जालें. दुसरें आनी सामकें म्हत्वाचें अर्थसंकल्पीय अधिवेशन सुरू जावपाचें आसा आनी नव्या सत्रांतूय आपली भुमिका कितें आसतली हाची झलक राहुल गांधी हांच्या फुडारपणा खाला विरोधक ‘इंडी’ आघाडीन पयल्या सत्रांत दाखयल्या. ताका लागून समंजस विरोधकांच्या भुमिकेंत राहुल गांधी आनी ताची ‘इंडी’ आघाडी सभाघरांत सरकारा मुखार वचपाची शक्यताय लागीलागीं नाच्च.
नवे लोकसभेचें पयलें अधिवेशन फकत स ते सात दिसांचेंच आशिल्लें आनी तातूंतले तीन दीस तर नव्या वांगड्यांचो सोपूतविधी आनी सभापतींची वेंचणूक हांतूनूच गेले. उरिल्ल्या तीन-चार दिसांच्या कामकाजाचेर हे वेळार पयलेच फावट विरोधकांक आपलो शेक गाजोवपाची संद चलून आयिल्ली, पूण विरोधी पक्ष फुडारी पदाचें पुरायपणान वजें पडिल्ल्यान राहुल गांधी हांणी आपले अपरिपक्वतायेक लागून ती व्हगडायली, अशें म्हणूं येता.
राहुल गांधी हांचेर विरोधी पक्ष फुडारी पद लादलें अशें म्हणप चुकीचें थारचें ना. एक गजाल म्हणल्यार ह्या घटनात्मक पदाची जापसालदारकी आपूण सांबाळटलों हाची तांकां खरें म्हणल्यार खात्री नाशिल्ली, पूण काँग्रेसीच्या सुप्रीम फुडाऱ्यांक हें पद हेर कोणा कडेन गेल्ले नाकाच आशिल्लें. आठ ते धा दिसांच्या यत्ना उपरांत काँग्रेस फुडाऱ्यांनी तांकां एकदां पटोवन मैदानाचेर सोडलो, पूण कितें तरी वेगळें करून दाखोवपाच्या बोवाळांत तांचें व्हडा प्रमाणांत हांशें जालें.
विरोधी पक्ष फुडारी ह्या नात्यान तांणी सभाघरांत कितें उलोवचें आनी कितें उलोवचें न्हय हाचें मात्तूय भान दवरूंक नाशिल्ल्यान राष्ट्रपतींच्या अभिभाशणा वयले चर्चे वेळार ते खंयच्या खंय व्हांवत गेले आनी तांचो पयलो दुस्मान नरेंद्र मोदी हांकां ताका उजरावपाची आयतीच संद मेळ्ळी.
हेतू अर्थातच बरो आशिल्लो आनी बळिश्ट विरोधकां कडल्यान तशीच अपेक्षा आशिल्ली, पूण विरोधी पक्ष फुडारी ह्या नात्यान राहुल गांधी आपली रणनिती योग्य तरेन चालीक लावपाक शकले नात आनी तें आपलो रस्त्या वयलो वादविवाद सभाघरांत घेवन आयिल्ल्याचें चित्र दिसलें. सभापती ओम बिर्ला हांणी हे विशीं जें उलोवप केल्लें तें खूब म्हत्वाचें थारपाक शकता. पयल्या सत्राच्या निमाण्या तीन दिसांत आनी खास करून प्रधानमंत्री नरेंद्र मोदी हे चर्चेक जाप दितना सभाघरांत विरोधकांनी जो बोवाळ घालो, तें विशीं मुखेलपणान सभापतीन आपलें मत उक्तायलां आसूंक जाय. रस्त्यार जावपी वादविवाद आनी संसदेच्या पवित्र सभाघरांत जावपी वाद हातूंत फरक आसपाक जाय अशें सभापती ओम बिर्ला जेन्ना म्हणटात तेन्नाच तांकां तातुंतल्यान कोणाक संदेश दिवपाचो आसा हें कळटा. विरोधी पक्ष फुडारी राहुल गांधी हांणी वेंचणूक प्रचारा वेळारचे वाद कुशीक दवरून एके नवे भुमिकेंत सरकाराक तोंड दिवपाची गरज आसतना वेंचणुकेच्या प्रचाराच्या थाटांत देड -दोन वरां भाशण ठोकप हें देशाकूय अनपेक्षीत आशिल्लें. संसदेच्या सभाघरांत प्रधानमंत्री नरेंद्र मोदी हांचेर उलयतना तांचो थेट एकेरी उल्लेख करपाचें टाळिल्लें जाल्यारूय तें खुब कितें जोडपाचें, पूण आतां बळिश्ट विरोधी पक्षा कडेन सरकाराची गांठ आसा अशें पद्दतीची प्रधानमंत्री नरेंद्र मोदी हांकां शिटकावणी दिताले अशें दिसतालें.
प्रधानमंत्री नरेंद्र मोदी हांचें भाशण चालू आसतना सुमार सवाय दोन वरां विरोधकांनी केल्लो सतत बोवाळ तर खंयचेच परिस्थितींत मान्य नाशिल्लो. विरोधी पक्ष फुडारी ह्या नात्यान राहुल गांधी हांणी आपल्या वांगड्यांक थंड रावन एक, दोन फावट आपल्या सुवातेर वचपाची विनवणी केल्ली जाल्यारूय पुरो आशिल्लें. पूण बांयनूच कांय ना जाल्यार बादलेंत कितें येवपाचो प्रस्नूच नाशिल्लो.
सेगीत तिसरे फावट सरकार स्थापन करपी प्रधानमंत्री नरेंद्र मोदी हांचे कडेन फाटल्या वेळार आशिल्लें तशें अपेक्षीत बळगें नाशिल्लें हें खरें, पूण विरोधकांक माथ्यार चडपाक दिवपाचेंच ना अशें थारोवन विरोधकां आड झुजपाची रणनिती सरकारान आपणायल्या अशें दिसून आयलेंच, पूण वांगड्यांचें बरें बळगें आसुनूय हे खेपे विरोधकांच्या पदरांत कांयच पडूंक ना, हाचो दोश मात राहुल गांधी हांच्या माथ्यार मारपाक शकतात. राहुल गांधी आनी प्रधानमंत्री नरेंद्र मोदी हांच्या मदलो रस्त्या वयलो वाद सभाघरांत पावप होच खरें म्हणल्यार सभाघराचो नांवलौकीक मातयें भरवण करपा सारको आशिल्लो. विरोधकांची हीच भुमिका कायम आसतली जाल्यार फुडल्या पांच वर्सांत सभाघरांत कितें दिसतलें हाची फकत कल्पना करूं येता. विरोधकांक आनी खास करून राहुल गांधी हांकां विरोधी पक्ष फुडारी म्हूण स्वता मदीं खूब बदल घडोवन हाडचें पडटलें. हें एका रातींत बदलचें ना, हें समजून घेवपा सारकें आसा, पूण ते खातीर तांणी यत्न तरी करपाक जाय.
बळिश्ट असो विरोधी पक्ष सरकाराक निश्चीतपणान जाग्यार हाडूंक शकता, हातूंत मात्तूय दुबाव ना आनी तितलें बळ आयज विरोधकां कडेन आसा. आतां हातूंतल्या कांय जाणांची मुखामळां विपरीत दिकेन आसात हें मान्य करूनय आयचो खर विरोधी पक्ष सरकाराक तांच्या तालार नाचोवपाक शकता, पूण फकत कामकाज आडावन आनी सभाघरांत बोवाळ घालून, धुमशेणां करून करूनूच सरकाराक धडो शिकोवपाची इत्सा आसत जाल्यार तातुंतल्यान कांयच साध्य जावचें ना हाचें भान विरोधकांकांनी दवरचें पडटलें.
सभापती ओम बिर्ला हांच्या मतान, राष्ट्रीय हिताच्या विशयाचेर पुराय सभाघरांत एकमत आसपाक जाय आनी बळिश्ट विरोधी पक्षान आपले विचार योग्य पद्दतीन मांडपाक जाय. राहुल गांधी हांच्या विरोधी पक्षा कडच्यान फुडाराक जनतेक हीच अपेक्षा आसा. सभापती फुडें म्हणटात, ‘सहमत नाजाल्यार असहमत ह्यो दोनूय गजाली लोकशायेचे अविभाज्य आंग आसात, तातूंत वेगवेगळे विचार आसूंक जाय. विचारांत आशिल्ल्या विवीधतेतल्यान जें मंथन जाता ताचीय रचनात्मक पद्दतीन सरकाराक मदत जाता. जबाबदार विरोधी पक्ष आनी सरकारूय हाचे वयल्यान कितें बोध घेतात हें येता त्या काळांत कळटलें. येता ते अर्थसंकल्पीय अधिवेशन सरकार आनी विरोधकां खातीर एक आव्हान थारतलें. रस्त्या वयले वादविवाद सभाघरांत पावचे नात हाची जतनाय घेतल्यार खूब कितें साध्य जावं येता. भाजपाक लोकसभेच्या उपसभापतीची कित्याक नसाय आसा हें समजना, पूण आमकां ताचेर उपाय काडून फुडें वचचें पडटलें. संसदेचीं सभाघरां फकत अराजक निर्माण करपा खातीर आसात, असो समज विरोधी पक्षांनी पयलीं पयस केलो जाल्यार येता त्या अधिवेशनांत सरकार आनी विरोधी पक्ष हांच्या मदीं समन्वयाचें नवें पर्व जावपाची आस्त बाळगूं येता.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
