भांगरभूंय | प्रतिनिधी
पणजी: रस्त्यांच्या कुशीक बेवारस सोडून दिल्ल्या बेवारस गाडयांची वळख पटोवपा खातीर गोंय पुलीसांनी सर्वेक्षण सुरू केलां. वापरी नाशिल्ल्या कितल्योश्योच गाडयो रस्त्या कुशीक पडून आसात. ताका लागून पार्कींगचो जागो आडावन उरता. अशा कांय गाडयांचो वापर तात्पुरतो स्टोअररूम म्हूण केल्लो दिसून येता.
मोटार वाहन कायदो, 1988च्या कलम 127(1) प्रमाण 10 वरां परस चड काळ बेवारस सोडून दिल्ली गाडी बेवारस मानतात. अशा गाडयांच्या धनयाक 15 दिसांच्या काळा भितर गाडयो काडपाचो आदेश दिला. त्या उपरांत कायदेशीर कारवाय करून अश्यो गाडयो जप्त करून तांची पावणी करपाची प्रक्रिया सुरू करतले.
गोंय पुलीसांनी रस्त्यां कुशीक सोडून दिल्लीं वाहनां काडपा खातीर लोकांनी सहकार्य करपाची मागणी केल्या, जेणे करून सुरळीत येरादारी, रस्त्यावयली सुरक्षा आनी भौशीक सुवातेचेर नितळसाण राखपाक मजत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
