भांगरभूंय | प्रतिनिधी
मायणा कुडटरी पुलिसांचो चालका आड गुन्यांव
मडगांव: वेर्णें सावन मडगांवचे दिशेन वचपी दुचाकी चालकान नुवें बायपास रस्त्यार भात सुकोवपा खातीर घालीत आशिल्ल्या दोगांक धपको दिवन पळ काडलो. हातूंत दोगांकूय दुखापत जाली. मायणा कुडटरी पुलिसांनी दुबावीत चालक लक्ष्मण कुमार सिंग (रा. वेर्णें, मूळ झारखंड) हाचे आड गुन्यांव नोंद केला.
मेळिल्ले म्हायती प्रमाण नुवें बायपासार फ्रान्सिस्को फर्नांडीस (रा. नुवें) आनी रेमेतीन फर्नांडीस (रा. कोन्सुआ, वेर्णें) हे रस्त्याचे कुशीक सर्व्हीस रस्त्यार भात सुकोवपा खातीर घालताले. त्याच वेळार वेर्णें सावन मडगांवचे दिशेन हिरो होंडा स्प्लेंडर दुचाकी घेवन गतीन येवपी दुबावीत लक्ष्मण कुमार सिंग हाणें फ्रान्सिस्को आनी रेमेतीन हांकां धपको दिलो.
हातूंत रेमेतीन हाका किरकोळ दुखापत जाली. पूण फ्रान्सिस्को हाका गंभीर दुखापत जाली. अपघाता उपरांत दुबावीत लक्ष्मण कुमार सिंग हाणें घडणूक थळा वेल्यान पळ काडलो. ह्या प्रकरणांत मायणा कुडटरी पुलिसांनी दुबावीत लक्ष्मण कुमार सिंग हाचे आड गुन्यांव नोंद केला. सहाय्यक पुलीस उपनिरिक्षक सुरेश वेळीप फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
