भांगरभूंय | प्रतिनिधी
मुख्यमंत्री : स्वयंपूर्ण गोंया खातीर पंचायतींचें योगदान म्हत्वाचें
भांगरभूंय । प्रतिनिधी
दिवचल : स्वयंपूर्ण, आत्मनिर्भर गोंय खऱ्या अर्थान येसस्वी करचे खातीर ग्रामीण वाठारांतल्या पंचायतींचें योगदान म्हत्वाचें आसा. तांणी गांवांतल्या शेतकारांक उर्बा दिवन 10 टक्के लागवडी खातीर सरकाराच्या येवजण्यांचो लाव मेळोवन दिवचो. हरीत-धवल क्रांती वांगडाच कोयर मुक्त गांव ही आमची संकल्पना आसा. कोयराचे बाबतींत सरकार गंभीर आसा. रस्त्या कुशीक कोयर उडयतात तांची धडगत ना. गांवचे उदरगतींत सगळ्यांचें योगदान म्हत्वाचें आसा. सगळे घटक एकठांय आयले जाल्यारूच ग्रामीण उदरगत, आत्मनिर्भर आनी स्वयंपूर्म गांव जावप शक्य आसा, अशें मुख्यमंत्री डॉ. प्रमोद सावंत हांणी सांगलें.
आमोणें पंचायत वाठारांत नुतनीकरण केल्ल्या पंचायत इमारत कार्यालयाचें उक्तावण, वेदांता कंपनी वतीन मैदाना खातीर बुन्यादी फातर तशेंच शाळे खातीर प्रयोगशाळा, नितळ भारत अभियाना वतीन उबारिल्ली सुसज्ज कोयराची शेड तशेंच विद्यार्थी भोवमान सुवाळो, अश्या विवीध कार्यावळींच्या उक्तावण सुवाळ्यांत मुख्यमंत्री डॉ. सावंत उलयताले.
वेदांतान आमोणें गांवा वांगडाच गोंयच्या विवीध वाठारांत सिक्षण, भलायकी, मुळाव्यो सुविधा, खेळां मळार भरीव योगदान दितना समाजीक दायित्व पत्करपाचो प्रामाणीक यत्न केला. आमोणें गांवांत नवे नवे खेळगडे तयार जावचे, हे खातीर खेळां प्रकल्प, भुरग्यांच्या मनाचेर नाविन्याची आनी नवें नवें शिकपाचो हांवेस निर्माण जावचो, हे खातीर शाळेंत ल्हान पिरायेचेर संशोधनाचेर प्रशिक्षण दिवप तोखणायेचो उपक्रम आसा. आमोणें गांवांत 40 कोटी रुपया खर्च करून बांद बांदल्यात. शेतां कातीर वरदान थारिल्ल्या ह्या गांवांत एकूय जमीन पडीक उरची ना, हाची खबरदारी पंचायतीन घेवची, अशें मुख्यमंत्र्यान सांगलें.
आमोणें गांवांत व्हड प्रमाणांत शेतजमीन आसा. खूबशे शेतकार शेतां पडीक दवरतात. तांणी ती जमीन दुसऱ्यांक लागवडी खातीर दिवची. जांकां शक्य ना तांणी ती आपल्याक दिवची, आपूण स्वता शेतां कसपाक उत्सूक आसा, अशें मुख्यमंत्र्यान सांगलें.
ह्या वेळार सरपंच सागर फडते, गौरवी गांवस, कृष्णा गांवस, रोहिदास कानसेकार, हेर पंच, भाजप गटाध्यक्ष रामा नायक, मंडळ अध्यक्ष गोपाळ सुर्लीकार, वेदांता कंपनीचे सरतेश सरदेसाय तशेंच हेर पंचायत वांगडी ह्या वेळार हाजीर आशिल्ले. ह्या वेळार दिवली पेटोवन विवीध कार्यावळींची सुरवात मुख्यमंत्र्यांचे हाजिरेंत केली. वेदांता वतीन विद्यार्थी भोवमान पुरस्कार मुख्यमंत्र्यांचे हस्तुकीं भेटयले.
आमोणें गांवांत खेळा, शिक्षण, भलायकी, मुळाव्यो सुविधा अश्या वेगवेगळ्या मळांचेर समाजीक बांदिलकी सांबाळून काम करपाक खोस जाता. थंय आशिल्ल्या शाळांक प्रयोगशाळा दितना भुरग्या मनांचेर नाविन्याची आवड निर्माण जावची आनी संशोधन दिश्टी वाडची हे खातीर आमचें यत्न आसात, अशें सपतेश सरदेसाय हांणी सांगलें. सरपंच सागर फडते हांणी आमोणें गांवांतल्या विवीध येवजण्यांची म्हायती दिली. मुख्यमंत्री डॉ. सावंत हांच्या पुराय आदारान तशेंच वेदांता कंपनीचे मजतीन खूबश्यो येवजण्यो मार्गाक लायिल्ले खातीर मुख्यमंत्र्यांक परबीं दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
