भांगरभूंय | प्रतिनिधी
पणजी ः कोयर नश्ट खातीर राज्य सरकार यत्न करीत आसा. पूण आयज लेगीत कांय लोक रस्त्यार उक्ते सुवातेर कोयर उडयतात. रस्त्यार कोयर उडोवपी मनशा कडल्यान व्हड दंड घेवन ताची गाडी जप्त करतले अशें मुख्यमंत्री डॉ. प्रमोद सावंत हांणी सांगलें. शेनवारा तांणी राज्यभरांतल्या पंच, सरपंचांक ‘स्वच्छता ही सेवा’ मोहिमेची ऑनलायन पद्दतीन म्हायती दिली.
कोयर वेवस्थापन करपा खातीर राज्य सरकारान वेगवेगळे प्रकल्प उबारल्यात. केंद्र सरकारानय ह्या दर्जेदार प्रकल्पांची दखल घेतल्या. पंचायत, पालिका वरवीं घरां-घरांनी वचून कोयर एकठांय करतात. तरी लेगीत कांय जाणांची मानसिकताय अजूनय बदलना. अशे लोक रातच्या वेळार पोतयेंत कोयर भरून रस्त्यार उडयतात. हाचे आड आतां खर कारवाय जातली. हे संबंदी हांवें पुलीस खात्याक आदेश दिला अशें मुख्यमंत्र्यान सांगलें.
आतां रस्त्याचेर कोयर उडयतना कोणूय दिसलो जाल्यार त्या मनशाचो फोटो काडून पुलिशेंत कागाळ करची. अशा मनशाचेर दंडात्मक कारवाय जातली. ‘स्वच्छता ही सेवा’ ही मोहीम 2 ऑक्टोबर मेरेन चालू उरतली. ह्या काळांत पंचायत, पालिकांनी घरांतली रद्दी, पोरणें फर्निचर आनी हेर कोयराची वस्तू एकठांय करपा खातीर खाशेली मोहीम सुरू करची. ह्या कोयराची विक्री करून मेळिल्ले पयशे कोयर उखलपी लोकांच्या कल्याणा खातीर वापरचे. पंच, सरपंच, नगरसेवकांनी फुडाकार घेवन आपलो वाठार निवळ दवरपाचो यत्न करचो.
कंत्राटदारांची नोंदणी गरजेची
राज्यांत हॉटेलांतलो, उद्देगीक वाठारांतलो वा हेर खंयच्याय सुवातेर कोयर एकठांय करपी कंत्राटदारांनी घन कोयर वेवस्थापन म्हामंडळा कडेन नोंदणी करप गरजेचें. हाका लागून कोयर खंयच्यान आयलो, खंय गेलो आनी कसो विलो लायलो हाची म्हायती मंडळाक एकठांय करपाक मेळटली अशें मुख्यमंत्र्यान स्पश्ट केलें.
सरकारी कार्यालयांक इनामां
2 ऑक्टोबर मेरेन सरकारी कार्यालयांतलो कोयर काडपाची सुचोवणी दिल्या. हातूंत सगळ्यांत निवळ आनी वेवस्थीत आशिल्ल्या तालुका पांवड्यावेल्या सरकारी कार्यालयांक इनामां दिवपाचो आमचो विचार आसा अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
