भांगरभूंय | प्रतिनिधी
मडगांव : मडगांवच्या आदल्या हॉस्पिसिओ लागसार स्कूटर आडवी घालून राशीद अली आनी तांच्या भावाक मारपेट केल्ली. ह्या प्रकरणांत पुलिसांनी सोळा अनवळख्यां आड गुन्यांव नोंद केल्लो. तांतल्या स जाणांक अटक केल्या, अशी म्हायती पुलीस अधीक्षक टिकमसिंग वर्मा हांणी दिली.
पुलिसांनी दिलले म्हायती प्रमाण – दुचाकी चलयतना लागिल्ल्याच्या कारणाक लागून ही मारपेट जाल्ली. दुचाकी वेल्यान फाटल्यानच्यान येवन दोगां दुबावितांनी राशीद अली हाचे स्कूटरीक ती मोखली. मगीर आपल्याक गाडी लायिल्ल्याचें कारण दिवन ताका बडयलो. राशीद अली मारा पसून वाटावपाक भलायकी केंद्राचे इमारतींत लिपलो आनी पुलिसांक फोन केलो. दुबावितांनी ताचो फाटलाव केलो. तशेंच आनीक कांय वांगड्यांक आपोवन हाडले. उपरांत मडगांव भलायकी केंद्रांत वचून थंयचो उजो पालोवपी सिलिंडर काडून राशीद अलीचे तकलेर घालो. ह्या वेळार तांणी स्क्रु ड्रायव्हरानूय ताचेर हल्लो केलो. तातूंत राशीद अली हांचे तकलेक आनी आंगार घावे जाल्यात. भावाक मारपेटा पसून वाटावपाक गेल्ल्या राशीदचो भाव शाकीद अली हाकाय त्या तरणाट्यांनी बडयलो. दोनूय जखमींचेर दक्षीण गोंय जिल्लो हॉस्पिटलांत उपचार केलें. राशीद हाका टाके घालचे पडले.
पुलीस अधीक्षक टिकमसिंग हांणी दिल्ले म्हायती प्रमाण, फातोड्डें पुलिसांनी ह्या प्रकरणांत राशीद अली हांचे कागाळी प्रमाण १६ अनवळख्यां आड गुन्यांव नोंद केल्लो. उपरांत सीसीटीव्ही फुटेज आनी हेर पुराव्यांच्या आदारार स जाणांक अटक केल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
