रस्त्यार उडयिल्ल्यो गाडयो

भांगरभूंय | प्रतिनिधी

ह्या बेवारशी गाडयांचो आंकडो वाडिल्ल्यान आयज शारांनी पार्किंगांक जागो मेळना जाला.

गोंयांत मनशां इतल्योच गाडयो आसात, हें कोणाक सांगल्यार खरें दिसचें ना. दिसाक उणेच 10 तरी सादे अपघात जातात आसतले. भितरलो एक तरी गंभीर. वर्साक उण्याच तिनशे तरी लोकांक रस्त्या वयल्या अपघातांनी मरण येता. म्हणल्यार म्हयन्याक 25 जाले. हो आंकडो ल्हान न्हय. मरप्यां मदीं चडशे तरणाटे आसतात, ही सगल्यांत हुस्क्याची गजाल. हाचे भायर जखमी जावपी हजारभर तरी लोक आसतले! तरीय गोंयांत गाडयो वाडत आसात. लोकां कडेन पयसो जाला, सोंपेंपणी रीण मेळटा, भौशीक येरादारी भरवंशाची ना म्हूण गाडयो वाडटात…. कितेंय कारण आसूं, पूण नोकरेक लागतकच स म्हयने जावचे पयलीं गोंयकार गाडी (दुचाकी) घेताच. थोडे काॅलेजींत आसतनाच गाडी घेवन भोंवतात. गाडयो दवरपाक घरा भायर जागो नासल्यार उपकारता, पूण गाडी ही जायच. मागीर ती रस्त्या कुशीक उबी करतात आनी कांय फावटी हेर लोकांक ताचो त्रास जाता. पूण आयकता कोण?
दक्षीण गोंय जिल्होधिकाऱ्याचो कालूच एक आदेश भायर सरला. शारांत मेळटा थंय उब्यो दवरिल्ल्यो बेवारशी गाडयो स म्हयन्यां भितर काडात. नाजाल्यार त्यो जप्त करतले. म्हणटकच येता त्या दसऱ्याक रस्त्यांचे कडेक दवरिल्ल्या ह्या गाडयांचें खेत्र जातलें, अशी आस्त. ती इतलेच खातीर की तरातराचें आदेश, निदेश भायर सरतात, पूण कांय म्हयन्यां उपरांत ते खंयचे कडेन नाच्च जातात. वास्को 60, मडगांवां 55 बेवारशी गाडयो आसात खंय, तांचेर कारवाय करची, असो आदेश आसा. फक्त ह्याच शारांनी न्हय, तर हेर शारांनीय, गांवांनी पसून वर्साचीं वर्सां रस्त्या कुशीक पार्क केल्ल्यो गाडयो पळोवपाक मेळटात. हाचें फाटलीं कारणांय हजार. गंभीर अपघात जाल्ली गाडी श्रद्धाळू मनीस परत वापरी ना. खास करून त्या अपघातांत कोण मेल्लो आसल्यार. अपघातांत कोण दिव्यांग जाल्लो आसल्यारूय ती गाडी वापरिनात. थोडे अपघातांत गाडयेक ‘अपशकुनी’ मानून ती कावलाक काडटात. थोडे पयशेकार पोरणी गाडी रस्त्यारूच उडोवन नवी वापरतात. ह्या बेवारशी गाडयांचो आंकडो वाडिल्ल्यान आयज शारांनी पार्किंगांक जागो मेळना जाला. एका वास्कोंत कारवाय जाल्यार 60 नव्या गाडयांक पार्किंग मेळटलें.
ह्या बेवारशी गाडयांक लागून येरादारीक आडखळ जाताच, अपघाताकूय आमंत्रण मेळटा. पूण ताचे परस म्हत्वाचें कारण म्हणल्यार पावसाच्या दिसांनी तातूंत उदक सांठपाची शक्यताय आसता. तशें जाल्यार ह्यो गाडयो जळारांची पैदास थळां थारूं येतात. सरकाराक तसो दुबाव आसा, म्हणटकच बेवारशी गाडयो जळारां वाडपाक जापसालदार थारल्यात आसतल्यो. कांय हाॅटेलां, हाॅस्पिटलां कडेनूय वर्साचीं वर्सां बेवारशी गाडयो पडून आसात. सरकाराचें, स्वराज्य संस्थांचेंय ताचे कडेन लक्ष कशें गेलें ना? फाटीं पणजेय बेवारशी गाडयो काडपाची घोशणा जाल्ली. लायली काय ती चालीक? कावलां अड्ड्यांनी विलो लावपाक आयिल्ल्यो गाडयो जायते फावटी रस्त्या कडेक पडिल्ल्यो आसतात. सगल्यांचेरूच कारवाय जाय.
गाडयांचो आंकडो वाडिल्ल्यान पार्किंगाची समस्या आतां सगलेच कडेन उबी जाल्या. प्रत्येक शारांत, सरभोंवतणच्या उपनगरांनी नवे प्रकल्प येत आसात. पूण ते बांदपी पार्किंगाची वेवस्था करिनात. हातूंत निवासी प्रकल्पूय आसात. 25- 50 फ्लॅटांची इमारत झेतान उबी रावता. भितर रावप्यांच्यो गाडयो रस्त्यार. तांची कोणाक आडखळ जावं वा ना जावं, पूण संबंदीत बिल्डराक कायद्यान दंड जावपाक नाका? फ्लॅट घेवपीय गाडयो दवरपाक जागो आसा काय ना, ताची चवकशी करिनात. आयज दरेका कुटुंबांत उण्योच चार गाडयो (दुचाकी धरून) आसतात. म्हणटकच पार्किंगाचेर, बेवारशी गाडयाचेर झुजा पांवड्याचेर उपाय सोदपाकूच जाय. पालिका, पंचायतींनी प्रकल्पांक परवाने दितना बिल्डरा कडेन पार्किंगा विशीं चवकशी, तपासणी चुकनासतना करची. आसत ते वा तुमी एकमेकांचे बरें मागपी, पूण कायद्याचे बाबतींत फकांडां नाकात! खास करून शारांनी हाचेर बारीक लक्ष जाय.
हालीं पणजी, म्हापशें, मडगांव सारक्या शारांनी पार्किंगा खातीर 50, 100 रुपया शुल्क घेतात. सद्दां चार चाकी घेवन येवपी मनशाचे 2- 3 हजार रुपया जाले. तें चुकोवपाक मागीर संबंदीत गाडयेकार रस्त्या कुशीक गाडी दवरून कामाक चल्लो. पणजे कांय कडेन पार्किंगा खातीर आखिल्ले जागे हालींसराक रिकामी दिसपाक लागल्यात, ताचे फाटलें कारण म्हापालिकेन सोदचें. खरें म्हणल्यार शारांत येवप्याक मुफत पार्किंग करपाक मेळूंक जाय. पूण जागेच ना, म्हणटकच पालिकेची अडचण जाता. मैदानांचेर प्रकल्प, प्रदर्शनां, रिकामो जागो दिसलो काय थंय निवासी प्रकल्प उबो जालोच म्हूण समजा. 2047 वर्सा विकसीत गोंय करपाक सरकार वावुरता. ते येवजणेंत गाडयो उब्यो करपाक जागो दवरल्यार बरो. गाडयो येतना, वतनाय येरादारीक आडखळ जावंक जायना. फाटल्या 25 वर्सांत कितल्यो गाडयो वाडल्यात, ताचो अभ्यास केल्यार फुडल्या 25 वर्सांनी तातूंत कितली भर पडटली, ताचो अदमास येरादारी, बांदकाम, पंचायत खात्याक येतलो. तांची वेवस्था करपाचे नदरेन पावलां उडोवप सोंपें जातलें.