भांगरभूंय | प्रतिनिधी
शिरोडेंच्या खड्डे पडिल्ल्या रस्त्यांची जाल्ली स्थिती बदलपाची आरजी कार्यकर्त्यांची मागणी
फोंडें: शिरोडें मतदार संघांतल्या खड्डे पडिल्ल्या रस्त्यांची जाल्ली स्थिती बदलपाचे मागणे खातीर आरजी कार्यकर्त्यांनी शुक्रारा सकाळीं बांदकाम खात्याच्या रस्तो विभागाचे कार्यकारी अभियंते देवेंद्र वेलिंगकार हांचे कडेन निवेदन दिलें. पावसा पयलीं रस्त्याची दुरुस्ती करिना जाल्यार लोकांक घेवन कार्यालयांत येवपाची शिटकावणी आरजी कार्यकर्त्यांनी दिल्या.
शुक्रारा सकाळीं आरजी कार्यकर्ते शैलेश नायक, विश्वेश नायक आनी हेर कार्यकर्त्यांनी रस्तो विभागाचे कार्यकारी अभियंते देवेंद्र वेलिंगकार हांची भेट घेवन चर्चा केली. माध्यमांतल्यान संघांत व्हडा प्रमाणांत आशिल्ले खड्डे पडिल्ले रस्ते दुचाकी चालका खातीर धोको दिवपी थारता. खड्ड्यांत दुचाक्यो कोसळून चालक जखमी जावपाचे प्रकार वाडटात. हाका लागून पावसा पयलीं मतदार संघांतले खड्डे पडिल्ले रस्ते दुरुस्त करून वाहन चालकांक सुशेग दिवपाची मागणी निवेदनांत नमूद केल्या.
चड म्हायती दितना शैलेश नायक हांणी, खड्डे पडिल्ल्या रस्त्यांक लागून दुचाकी रस्त्यार कोसळून जखमी जावपाचे प्रकार वाडल्यात. मात थळावे आमदार आनी थळाव्या पंचायत मंडळाक हे विशीं कांयच पडून गेल्लें ना अशें दिसून येता. पावसा पयलीं रस्त्याची दुरुस्ती करिना जाल्यार लोकांक घेवन बांदकाम खात्याच्या कार्यालयांत वतले अशी शिटकावणी तांणी दिली.
विश्रवेश नायक हांणी सादर केल्ल्या निवेदनाचेर ग्रामस्थांच्यो सयो तशेंच धोको निर्माण करपी खड्ड्यांचे फोटो लायल्यात. हाचेर अधिकार्यांनी खरपणान लक्ष दिवपाची गरज आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
