भांगरभूंय | प्रतिनिधी
भांगरभूंय । प्रतिनिधी
पणजीः राष्ट्रीय म्हामार्ग 66 तशेंच हेर म्हामार्गाच्या कुशीक मोबायल जायरात होर्डींग दवोरून जायरात करतात अशी म्हायती मुंबय उच्च न्यायालयाच्या गोंय खंडपिठाक दिल्या उपरांत न्यायालयान केंद्रीय म्हामार्ग प्राधिकरणाचे गोंयचो मुख्य अभियंतो तशेंच गोय सरकाराच्या बांदकाम खात्याच्या मुखेल अभियंत्याक प्रतिवादी करून तांकां नोटीशी धाडल्यात.
मांडवी न्हंय आनी हेर न्हंयेचे देगेर व्हडली होर्डींगा उबारल्यात. नियंत्रण दवोरपी यंत्रणा नाशिल्ल्यान मेळटा थंय तीं उबारतात. हाचेर आळाबंद हाडपा खातीर 2007 वर्सा खंडपिठान स्वेच्छा दखल घेवन ते संबंदितांक आदेश दिवंन बेकायदेशीर होर्डींगाचेर कारवाय करपाचो आदेश दिल्लो. हे संबंदी न्यायालयाक मजत करपा खातीर ज्येश्ठ वकील एस डी लोटलीकार हांची अॅमिकस क्युरी म्हणून नेमणूक केल्ली.
होर्डींगा संबंदी न्यायालयांत सुनावणी जाली. म्हापशें पालिका मंडळान होर्डींग उबारपी 17 कंपन्याक नोटीशी धाडल्यात. 17 जमीन धनयांक कारणे दाखयात नोटिशी धाडल्यात. दोन म्हयन्यांत हे संबंदीचो निकाल येतलो अशें म्हापशे पालिकेचो वकील संदेश पडियार हाणे खंडपिठाक सांगलें. तेन्ना न्यायमूर्तींनी कृती अहवाल सादर करपाक सांगलां.
राष्ट्रीय म्हामार्ग 66 आनी हेर रस्त्याचे कडेन मोबायल व्हॅन वरवीं जायरात करतात. म्हामार्गान होर्डींग लायतात अशें एस डी लोटलीकारान खंडपिठाचे नदरेक हाडून दिलें. ताका लागून खंडपिठान केंद्रीय म्हामार्ग प्राथिकरण आनी बांदकाम खात्याक प्रतिवादी केलां. दोन सप्तकां भितर मोबायल व्हॅनी आनी होर्डींगाक दिल्ल्या परवानगीची म्हायती न्यायालयाक सादर करपाक सांगलां. म्हामार्ग आनी हेर सुवातांनी करतात ते जायरातीं विशीं तीन सप्तकांत म्हायती दिवपाक सांगलां. अशें सरकारी वकील दीप शिरोडकारान सांगलें. फुडली सुनावणी 5 एप्रिलाक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
