भांगरभूंय | प्रतिनिधी
राज्य रस्तो सुरक्षा मंडळाचे बसकेंत निर्णय
पणजी : रस्ते सुरक्षीत करपाक रस्त्यावेल्या अतिक्रमणा आड कारवाय करपा वांगडा रस्त्यांची जोड पळोवणी करपाचो निर्णय राज्य रस्तो सुरक्षा मंडळाचे बसकेंत जालो. चलत भोंवप्यांचे सुरक्षे खातीर झेब्रा क्रॉसिंगाचे तपासणे सयत कामाच्या वेळार बॅरीकेडिंगची कार्यवाही करपाचेरूय चर्चा जाली.
येरादारी मंत्री मॉविन गुदिन्हो हांणी ही म्हायती दिली. दिसान दीस अपघातांचें प्रमाण वाडतू आसा. रस्ते चडांत चड सुरक्षीत जावपा खातीर रस्त्या कुशीकच्या बेकायदो अतिक्रमणांचेर कारवाय करतले. वाहनांचो आंकडो वाडिल्ल्यान रस्तो हुपप धोक्याचें जाता. हाचेर उपाय म्हणून झेब्रा क्रॉसिंगाची पळोवणी करून तांचें योग्य तरेन मार्गींग करतले. तशेंच रस्त्यांची दुरूस्ती सुरू आसल्यार कंत्राटदाराका बॅरीकेडिंग करप स्कतीचें आसतलें. अतिक्रमण, झेब्रा क्रॉसिंग, बॅरीकेडींगचे कार्यवाही खातीर संयुक्तपणान रस्त्यांची पळोवणी करपाचेर भर आसतली.
येरादारी नेम मोडपाचेर नदर दवरून दंड घेवपा खातीर स्पीड डीटेक्शन यंत्रणां आनी कॅमेर्यांचो वापर करतले. बसकेक येरादारी, पुलीस आनी भौशीक बांदकाम खात्याचे अधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
