भांगरभूंय | प्रतिनिधी
पणजी : अभियंत्यां कडल्यान म्हायती घेवन खड्डे पुरोवपा वांगडा राज्यांतल्या गरजेच्या रस्त्यांची प्राधान्यान दुरूस्ती करतले. वीज खात्या प्रमाणूच भौशीक बांदकाम खात्याकूय न्याय दिवन सकारात्मक बदल करपाक कटीबद्ध आशिल्ल्याचें भौशीक बांदकाम खात्याचे मंंत्री दिगंबर कामत हांणी स्पश्ट केलां.
चवथी पयलीं मंत्रिपदाचो सोपूत घेतिल्ल्या दिगंबर कामत हांणी मंत्रालयांत खात्याचो ताबो घेतलो. खात्याच्या अभियंत्यांची बसका घेवन एकंदर आढावो घेतले. अभियंत्यांच्या खात्याचे स्थिती विशीं सादरीकरण करचें पडटलें. उपरांत उण्या आनी दिर्घ काळांतल्या कामांचो आराखडो तयार करतले. खात्या खंयचे गजालीची गरज आसा, जनतेक बरी सेवा दिवपाक खंयच्यो गजाली करपाक जाय, हाची म्हायती घेतले.
खड्डे पुरोवपा वांगडा रस्त्या कुशीकचीं झाडां आनी खांदयो कुशीक करतले. रस्त्यांची दुरूस्ती प्राधान्यान हातांत घेतले. हातूंत गांवगिरो आनी शारी असो भेदभाव करचे ना, अशे दिगंबर कामत हांणी म्हणलें.
वट्ट आठ वर्सां हांव वीज मंत्री आशिल्लो. देशांत सगल्यांत चड काळ वीजमंत्री रावपाचो मान म्हाकाच मेळ्ळा. वीजमंत्री आसतना मोबायल ट्रान्सफॉर्मर, मोबायल इलेक्ट्रीक वॅन अशे उपक्रम हांवें सुरू केल्ले. ट्रान्सफॉर्मर रातच्या वेळार मोडल्यार मोबायल ट्रान्सफॉर्मरच्या आधारार वीजपुरवण करताले. वीज खात्या वरींच भौशीक बांदकाम खात्याच्या कारभारांतूय सकारात्मक बदल हांव करतलों, अशें दिगंबर कामत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
