भांगरभूंय | प्रतिनिधी
जीत आरोलकारः मोरजे रस्त्याच्या डांबरीकरणाक सुरवात
भांगरभूंय । प्रतिनिधी
पेडणें: गांवांतल्या रस्त्याचो विस्तार, रुंदीकरण जावपाक जाय. कारण ह्या रस्त्याचेरूच गांवची उदरगत आदारून आसता. ताका लागून एकादो रस्तो रूंद करतना वा नवो रस्तो करपाचो आसत जाल्यार भाटकारांनी, लोकांनी आदार करपाची गरज आसा, अशें मांद्रेंचे आमदार जीत आरोलकार हांणी सांगलें.
मोरजी पंचायत वाठारांतल्या दिवणजी मंदीर वाठारांत रस्त्याचें डांबरीकरण करपाच्या कामाक सुरवात करून दिवपाचे कार्यावळींत आमदार आरोलकार उलयताले. ह्या वेळार मोरजीचे उपसरपंच पवन मोरजे, अभियंते गांवस, कंत्राटदार परब, ज्येश्ठ नागरीक प्रकाश सप्तोजी, वंदना शेटगांवकार, थळावे लोक हाजीर आशिल्ले.
कसलीय उदरगत ही गांवांतल्या रस्त्याचेर निंबून आसता. गांवांतलो रस्तो जर विस्तारीत जालो जाल्यार गतीन उदरगत जावपाक मजत मेळटा. अशीर रस्त्याक लागून खूबश्यो आडखळी येतात, येरादारीची कोंयडी जातात, अपघात जातात. ताका लागून गांवांतले मुख्य रस्ते रूंद करप गरजेचें आसा. कांय रस्ते रूंद करतना खूबश्यो आडखळी येतात. त्यो आडखळी सरकार दरबारांत सोडोवपाचो आपूण यत्न करतां. मदलोवाडो मुख्य रस्तो ते श्री कुळकर सांतेरी मंदिरा मेरेनच्या रस्त्याची जी आवतिकाय जाल्या आनी रस्त्या खातीर येवपी आडखळी फुडल्या कांय दिसां भितर सुटाव्यो करतले. उपरांत तोवूय रस्तो सुसज्ज करतले, अशें आमदार आरोलकार हांणी सांगलें.
मुख्यमंत्री डॉ. प्रमोद सावंत हांचो पुराय आदार मेळिल्ल्यान उदरगतीच्या कामांक गती मेळ्ळ्या. रस्त्याचें रुंदीकरण आनी हॉटमिक्सींग डांबरीकरण करपाक तांचो व्हड आदार मेळटा. मांद्रें मतदारसंघांतले सगळे रस्ते वेवस्थीत आनी सुसज्ज करतले. एकदां रस्ते रूंद केले उपरांत गाडयेकारांनी रस्त्या कुशीक गाडयो पार्क करच्यो न्हय. तशेंच रस्त्याचे कुशीक जीं दुकानां, स्टॉल आसात तांच्या धनयांनी आपापल्या गाडयां खातीर पार्कींगची वेवस्था करप सक्तीचें करतले, अशेंय आरोलकार हांणी सांगलें. उपसरपंच पवन मोरजे हांणी सांगलें, फाटल्या कितल्याश्याच वर्सां सावन दिवाणजी वाठारांत रस्तो नाशिल्ल्यान लोकांक साबार अडचणींक फुडो करचो पडटालो. पावसाल्यांत धोपरभर उदकांतल्यान देवळा मेरेन वच्चें पडटालें. चिखल सगळे कडेन जातालो. आतां हो रस्तो जाले उपरांत ही समस्या सुटावी जातली. आमदार जीत आरोलकार हांणी केल्ल्या यत्नां खातीर मोरजे हांणी समाधान उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
