रस्तो रुंदिकरणाचेर भाश्य करपी भाजपा फुडाऱ्याचो भोमकारां कडल्यान निशेध

भांगरभूंय | प्रतिनिधी

भांगरभूंय । प्रतिनिधी
पोरणे गोंयः भोमच्या रस्तो रुंदिकरणाचेर आनी चड करून आंदोलन करपी संजय नायक हाचे आड उलोवपी भाजपाच्या एका फुडाऱ्याचो भोमकारांनी आयतारा रातीं नागझर देवस्थाना कडेन जमून निशेध केलो. एका मीडिया डिबेटी वेळार भाजपा फुडाऱ्यान भोमा  बायपास रस्तो तयार करप शक्य ना. जे सुवाते वल्यान बायपास रस्तो बांदपाची भोमकार मागणी करतात तो वाठार दोंगराळ तशेंच बांदकाम बंदी आनी  पर्यावरणाचे नदरेन संवेदनशील आसा अशें त्या भजपा फुडाऱ्यान सांगल्लें.
संजय नायक हे डिबेटींत वांटेकार जाल्लोो. शेतांतल्यान बायपास रस्तो तयार करपाक शेतकारांचो विरोध आसा. संजय नायक स्वताच्या फायद्या खातीर रस्तो रुंदिकरणांत राजकारण हाडटा असोय आरोप भाजपा फुडाऱ्यान केल्लो. भाजपा आतां तांचो फुडारी सर्गेस्त मनोहर पर्रीकार हाणे दिल्लें उतर नेगार करता काय कितें. पर्रीकार हाणेच बायपास रस्त्याचो पर्याय दिल्लो. आतां ताचें भाजपान कितें चलयलां असो प्रश्न राजन नायक ह्या थळाव्यान केला. चडशी शेंतां आमचीं आसात. ताचे धनी जावंन बायपासाक विरोध करपी कोण ते शेतकार हे भाजपा फुडाऱ्यान जाहीर करचें अशें आव्हान नायकान दिलां.
जीं 9 घऱां आसात ती भाजपा फुडारी सांगता त्या पर्यावरण संवेदनशील आनी बांदकाम बंदी वाठारांत येतात. त्या वाठारांत 24 प्लॉट कशे केल्यात हें लेगीत ह्या फुडाऱ्यान सांगचें अशें सुनील भोमकार हाणे सांगलां. गांवांतली देवळा आनी घरांक धोको ना असो रस्ताचो आराखडो दाखयल्यान भोमकार आपलें आंदोलन बंद करतले. तेन्ना तो दाखोवपाचें आव्हान भोमकारान सरकाराक दिलां. मनोहर पर्रीकार हाणे बायपासाचें जें उतर दिल्लें तें भोमकारांनी भाजपाक मतां दिवचीं हे खातीरूच आशिल्ले कांय किदें अशें किशोर नायकान विचारलां.
मजगतीं भोमकारांनी संजय नायक हाचेर पुराय विस्वास दाखयला.ताच्या फुडारपणाचेर आमचो विस्वास आसा आनी सगल्या भोमकार ताच्या फाटल्यान आसात अशें एके बायलेन सांगलें.