रस्तो म्हणल्यार जिणूच!

भांगरभूंय | प्रतिनिधी

रस्त्यां वयल्या वाहनांचो आंकडो उणो कसो जातलो, हाचो विचार करपाक जाय. गाडी चलोवप्यांनीय ती सांबाळून चलोवंक जाय.

संकश्टांनी कोणाचेरुय एकदां घुरी घाली काय तीं एका फाटोफाट येत रावतात. साडेसाती लागली काय ती फाट सोडीना, अशें कांय लोक म्हणटात. गोंयांत फाटल्या देड- दोन म्हयन्यां सावन अपघातांची माळ चालू आसा. कालूय 3- 4 कडेन अपघात जाल्यात. गोंय सरकारान आतां रस्त्यांचें आॅडिट करपाचें थारायलां, ही बरी गजाल. हालींच ते विशींची सप्तकी बसका जाली. मात जो कितें अहवाल येता तो मागीर चालीक लागचो. तो कुशीक दवरलो जाल्यार जें चलता तें चलत रावतलें. गाडयेकार येरादारीचे नेम पाळटले, शिस्तींत गाडी चलयतले तेन्नाच अपघात उणे जातले. अर्थांत सरकारी यंत्रणेचीय व्हडली जापसालदारकी आसा. महामार्ग, जिल्हो पांवड्या वयले तशेंच गांवगिरे रस्ते सुदारपाचेर भर दिवपाचे निर्देश मुख्यमंत्र्यान बांदकाम खात्याक दिल्यात. आयज मेरेन हें आॅडिट जावंक नाशिल्लें. तें काम एके एजन्सीक दितले. रोखडीच निविदा भायर सरतली.
जाणकारांच्या मतान, चडशे अपघात हे राष्ट्रीय म्हामार्गाचेर जातात. कारण तो रुंद, गुळगुळीत (सगले कडेनूच न्हय) आसता. म्हणटकच गाडयो वेगान वतात आनी एका बेसावध खिणाक अपघात…! पुलिसां कडेन मनीसबळ नाशिल्ल्यान तांकां गस्त घालप शक्य ना, अशें पुलिसांचें मत. म्हणटकच वाहनांच्या वेगाचेर नियंत्रण दवरपाक आतां सीसीटीव्ही होच एक आदार. वेग तपासपाची यंत्रणा सगलेच कडेन बसोवप कुस्तार. निदान जंय गाडयो नाका तितल्यो वेगान वतात, थंय ती आसची. ताचे पयलीं येरादारीचे कोंयडेचेर उपाय काडचे पडटले. कारण अर्द वर आडकून उरलो काय ड्रायव्हराचें पाशिंयेस पिड्ड्यार जाता. उपरांत तो मार्गाक लागता तेन्ना मेकळो रस्तो दिसलो काय वेळ भरून काडपाक वेगान वता. अपघाताक हेर बरींच कारणांय आसात. चूक ही नकळटां घडटा आनी ती कोणाकूय सांसणाचो पसून सोंपोवं शकता. तेन्ना खंयचीय गजाल तकली जाग्यार दवरून, ताकतीक करीनासतना, पूर्ण विचार करून करप बरें.
राज्यांतल्या रस्त्यांच्यो, येरादारीच्यो समस्या खोंटलोभर. वाटेर काळीं, धवीं गोरवां बशिल्लीं आसतात. तांकां धपको दिवन वर्साक 5-6 जाण तरी मरतात. लायट आसनात. स्पीड ब्रेकर रंगयिल्ले नासतात. देखून अनवळखी वा गजालींच्या नेटार आपलेच तंद्रेंत आशिल्लो संकश्टांत पडपाक शकता. वाटेर नळाचें कनेक्शन घेवपाक खणिल्ले चर तशेच सोडिल्ले आसतात. रस्त्या कुशीक चौकोनी फोंडकुलां मारल्यांत, तीं वेवस्थीत पुरोवंक नात. हेर फोंड सदचेच. रस्त्या कुशीक गाडयो पार्क करतात. साबार तरांचें सामान, जिनस विकपी बशिल्ले आसतात. बशी प्रवासी घेवपाक आख्ख्यो रस्त्यार उब्यो रावतात. अवजड वाहनां वराक 10 ते 15 किलोमिटर वेगान चलतात. तांकां रातचोच प्रवास करपाचें बंधन घालप शक्य ना? दुचाकी चलोवपी खांचींतल्यान वाट काडीत येरादारीची कोंयडी करतात. मेळटा थंय ट्रॅफिक जाम. एकोड्या मोटारींची वाडिल्ली संख्या. म्हणल्यार गाडयेंत ड्रायव्हर सोडून कोणूच नासता. वाटेर कोयराच्यो राशी, थंय सुकणी, गोरवां, सुणीं. हें अपघाताचें एक थळ. रस्ते अशीर, देगो उंच, बशींचो उणो आंकडो, रातीं 8 उपरांत येरादारी बंद, ही व्हडली समस्या, ओल्तांचेर, देंवती- चडटेंचेर सुरक्षा उपाय घेवप, फलक लावप, शाॅर्टकट मार्ग विकसीत करप, पूल बांदप, सायनबोर्ड नदरेक आडखळ करतात जाल्यार ते काडून दुसरे कडेन लावप……!! हाका लागून खाजगी वाहनांचो आंकडो खूबच वाडला. परिणाम अपघात. रस्त्याचें आॅडिट करचेंच, पूण ताचेच वांगडा पुलिसांच्यो गाडयो फिरतात, तश्यो बांदकाम खात्याचो खास स्क्वाॅड सुरू करपाक जाय. दीसभर ताणें गाडी घेवन भोवप आनी येरादारीच्यो, रस्त्यांच्यो समस्या पळोवप. ताचेर उपाय काडप. देखीक, वेर्णां फोंडणूल पडलां जाल्यार तें पळयतकच दुसरे दीस दनपार मेरेन तें दुरुस्त करप. रस्त्यांच्या अवस्थेच्यो खबरो, सुचोवण्यो दिसाळ्यांनी येत आसतात. सरकारान तांची दखल घेवं येता. कांय गिरेस्त पालिका, पंचायती गरीब स्वराज संस्थांक येरादारी सायनबोर्ड दिवप, स्पीड ब्रेकर, हाॅट मिक्सिंग करपाक मजत करूं शकनात? समाजसेवा म्हूण हें पावल उबारप तांकां सहज शक्य आसा.
तालांव दिवप, नशेंत वाहन चलोवप्याचेर कडक कारवाय करप हे उपाय घेतल्यार अपघातांचेर नियंत्रण येवं येता. रस्त्यां वयल्या वाहनांचो आंकडो उणो कसो जातलो, हाचो विचार करपाक जाय. गाडी चलोवप्यांनीय ती सांबाळून चलोवंक जाय. ‘इक रास्ता है जिंदगी….’ अशें एक गीत आसा. खरेंच हो रस्तो म्हणल्यार गाडी चलोवप्याची जिणूच. तो सारको नासल्यार जिणेक बादा येतलीच.