भांगरभूंय | प्रतिनिधी
रस्तो नाट्य, पथ नाट्य हाका खरेंतर हेर राज्यांनी मान्यताय आसा, पूण गोंयांत तें कॉलेज वा काॅलेजकुमारा पुरतेंच वा आंदोलकां पुरतेच मर्यादीत आसा काय कितें, असो प्रस्न पडटा. लेखन, अभिनय, नाच, गायन अश्यो साबार कला विकसीत करपाची तांक ह्या कलाप्रकारांत आसा. गोंयांत हाचे विशीं एक- दोन पुस्तकां आसात. पत्रकार संदेश प्रभुदेसाय हांची पथनाट्याचेर एक पुस्तक बरयलां. पथनाट्याच्यो लिखीत संहिता आसतल्यो. एखाद्यो ज्वलंत विशय ह्या रस्तो नाट्याचो विशय जावं शकता. तोच कित्याक, हेर विशयांचेर लेगीत रस्तो नाट्य करप शक्य आसा. तें पळोवप्याक वेळ उणो आसता, हें मतींत घेवन ताचें लिखाण आनी सादरीकरण जावंक जाय. भौसाक कळटा तेच भाशेंतल्यान तें जावंक जाय. ह्या कला प्रकारांतल्यान तुमकां आत्मविस्वासुय येवंक शकता. हातूंत वांटेकार जाल्ले कलाकार आयज फुडारी, पत्रकार, साहित्यीक, अभिनेते जाल्ले आसात.
हालींच मडगांवचे महेश्वरी हे तरणाटेची मुलाखत गोवा दूरदर्शनाचेर जाल्ली. तुमी ती पळयल्याच आसतली. तिका रस्तो नाट्याची आवड आसा. तिका हे विशीं विचारलें तेन्ना तिणें सांगलें, तिचें मुळावें शिकप विद्याभारतींत जालें. मडगांवच्या नूतन इंग्लीश स्कूलांत माध्यमीक शिकप जालें. ल्हानपणा सावन तिका पाढे म्हणप, मुस्तायकी सर्त, श्लोक पाठांतर हाची आवड आशिल्ली. भरतनाट्यम, नाच, चित्रकलाय आवडटाली. इंजिनियरींग शिकप घेवन तें घरा कडल्यान काम करता. रस्तो नाटकांनी ताणें वांटो घेतला. हार्वर्डची कोड शिश्यवृत्ती, वूमन इन टेक्नाॅलाॅजी इंटरनॅशनल हांचे कडल्यान तिका संवसारीक पांवड्या वयली पदवी मेळ्ळ्या. म्हजे म्हायती प्रमाण हो भोवमान मेळोवपी ती गोंयची पयलीच विद्यार्थिनी.
रस्तो नाट्यांत लेखकांचे सृजनशिलतायेक वाव मेळटा, कारण वेगवेगळे ज्वलंत विशय हाताळपाक मेळटात. हें जातना तुमकां अभिनयाची संद मेळटा, आत्मविस्वास मेळटा, माचयेचो भंय ना जाता. उलोवप, भाशा सुदारता, नाच, संगीताचें गिन्यान मेळटा. प्लास्टिकाचें प्रदुशण, कोयर, नितळसाणेचो विशय, अपघात कसो टाळप, वेगाचेर मर्यादा अशे जायते जनजागृताय करपी विशय तुमी हाताळपाक शकतात. तुमचें करियर करतना तुमी हेरांक हाची जाणवीकाय दिवन जागृताय करूंक शकतात. ही एक प्रकाराची समाजसेवाच.
महेश्वरी सांगता, हांव आठवे यत्तेंत आसतनाच नाटक ह्या प्रकारा कडेन वळ्ळें. मनांतलें उक्तें करपाक हे सारकें दुसरें माध्यम ना. हांव नाटकाच्या मोगांत इतलें पडलें की मुंबयचे एके टीव्ही माळे खातीर आॅडिशनाक गेल्लें. थंय म्हजी निवड पसून जाल्ली. पूण गोंयांत येवन शिक्षण पुराय करपाचें चिंतलें आनी ती येवजण थंयूच उरली. म्हाका दिसता व्यक्तीमत्व विकासा खातीर नाटकांत वचप बरें. रस्तो नाट्य तर तुमकां पुराय स्वातंत्र्य दितां.
रस्तो नाटकांत तुमकां अमूक भशेन उलोवपाक जाय, अमूक हावभाव करपाक जाय, अशें बंधन नासता. हाका लागून दडपण नासता. नाटकाची जी संकल्पना आसा, ती चुकोवपाची ना, इतलेंच तुमीं मतींत दवरलें जाल्यार कांयच भिरांत उरना. लोकांची गर्दी आसता, ते सुवातेर ह्या नाटकाच चड प्राधान्य दिवप. देखीक बाजार, बसस्टॅण्ड. मायकाची गरज नाशिल्ल्यान तुमकां सैमीकआवाजांत उलोवन लोकांचें लक्ष वेधून घेवचें पडटा. हे कलेंत वांटो घेवप्यांक चड पयशे मेळटलेच अशें ना. पूण, तुमचे कलेक वाव मेळटा, कलाकार म्हूण तुमी घडटात. हॅरी अँडरसन, डेव्हीड राॅबिन विलीयम्स हे वेवसायीक पथनाट्य कलाकार. 1960, 1970 च्या दशकांत लुमियर, जाॅन बुल, पंक्चर रिपेर किट सारक्या पंगडांनी हें माध्यम चड विकसीत केलें. खरें तर रस्तो नाट्याची सुरवात रशियेंत कामगारां मदीं जाली. तेन्नाच्या कामगारां मदीं तें प्रसिद्ध आशिल्लें.
वेसना सारके विशय हातूंत हातळ्ळ्यार ते लोकां मेरेन पावूं येतात. हातूंत लोककलाय हाडूं येता. तुमचे लागीं जें आसात, तातूंतल्यान रस्तो नाट्य उबें करूं येता. महेश्वरीच्या मतान तुमचो व्यक्तीमत्व विकास रस्तो नाट्याक लागून जावं येता. तुमचो आत्मविस्वास वाडटा. करियराक मजत जाता. लेखक जावपाची संद मेळटा. बाकी तुमकां अणभवांतल्यान कळटलेंच. बरेंच कितें शिकपाक मेळटलें.
रस्तो नाट्य हो कलाप्रकार खूब लोकप्रीय जाल्लो. तुमकां जर हातूंत करियर करपाचें आसा जाल्यार तुमी शाळेच्या शिक्षकाक मेळून तें करपाक शकतात.
वतां वतां – बँक आॅफ बडोदा हे राष्ट्रीयीकृत बँकेंत काम करपाची संद आसा. तुमी जर शेतकी विशींचे शिक्षण घेतलां जाल्यार अधिकारी म्हणून तुमकां नोकरी मेळूं येता. www.bankofbaroda.in हे वेबसायटीक भेट दिवन जरूर म्हायती घेवची.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
