भांगरभूंय | प्रतिनिधी
परवानगे बगर रस्तो खणल्यार कंत्राटदाराक दंड
पणजी: गोंयांत हाचे मुखार फक्त भौशीक बांदकाम खात्या कडल्यानच (पीडब्ल्यूडी) रस्ते खणपाची परवानगी दितले. खात्याचे परवानगी बगर खंयचोय रस्तो खणपाक 100 टक्के बंदी घालतले. परवानगे बगर रस्तो खणल्यार कंत्राटदारा कडल्यान दंड वसूल करतले. हे विशीं खात्या कडल्यान रोखडेंच परिपत्रक जारी करतले अशें मुख्यमंत्री डॉ. प्रमोद सावंत हांणी सांगलें.
शुक्रारा विधानसभेंत विरोधी पक्ष फुडारी युरी आलेमांव हांणी रस्ते अपघाताचेर मांडिल्ले लक्ष ओडपी सुचोवणेचेर ते उलयताले.
मुख्यमंत्र्यांनी म्हणलें, गोंयांतल्या रस्तो अपघातांत मनशाच्या चुकीचें प्रमाण चड आसा. अशें आसलें तरी रस्त्यांक लागून लेगीत अपघात जायत आसतात. विवीध खात्यांनी समन्वयाचो उणाव आसा. हाका लागून नवो रस्तो केले उपरांत पंदरा दिसांत वीज, उदका स्रोत वा हेर खात्यां कडल्यान तो फोडटात. हाचे मुखार अशे प्रकार जावचे नात. कंत्राटदारांक पुराय रस्तो परतून करून दिवचो पडटा जाल्यार ते लेगीत खणचे पयली विचार करतले. गोंयांत मोटे रस्ते बांदचे पयलीं सेवा वाहिन्यां खातीर विशेश डक्ट दवरतले.
मुख्यमंत्र्यांनी म्हणलें, अपघात उणे करपा खातीर रस्ते अभियांत्रिकी खातीर तितलेच म्हत्वाचे आसा. अपघातांचे ब्लॅक स्पॉट सोदून काडून ताचेर उपाय येवजण करपाचें काम लेगीत सुरू आसा. नवे सिग्नल बसोवपा खातीर कंत्राट काडलां. रस्तो येरादारीचे नेम मोडप्यां खातीर पुलिसांच्या वाहनांक कॅमेरा बसयतले. गोंयांत कोरोना काळांत जाल्ल्या मरणां परस चड मरण अपघातांनी जायत आसात. हाका लागून अपघात आडावपा खातीर लोकांचें सहकार्य लेगीत तितलेंच गरजेचें आसा. पालकांनी आपल्या भुरग्यांक वाहन दितना विचार करप गरजेचें आसा.
ताचे पयलीं युरी आलेमांव हांणी रस्तो अपघातांत मरण आयिल्ल्यांची संख्या वाडत आशिल्ल्यान हे विशीं उपाय येवजण करपाची मागणी केली. आमदार कार्लोस फेरेरा हांणी अपघातांचे हॉट स्पॉट सोदपाची मागणी केली.
विरेश बोरकार हांणी गोंयांत इंडियन रोड काँग्रेसीच्या नेमांक पाळो दिल्यार अपघात उणे जातले अशें सांगलें. विजय सरदेसाय हांणी एआय कॅमेरे बसयल्यार अपघाताचें प्रमाण उणें जातलें अशें सांगलें.
रेंट अ कार फ्रंचायजीची चवकशी करतले
युरी आलेमांव हांणी रेंट अ कार फ्रंचायजी वरवीं बेकायदो रितीन सुमार पांच हजार परवाने दिल्ल्याचो आरोप केलो. मुख्यमंत्र्यांनी हाची चवकशी करून अवैध परवाने रद्द करतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
