रस्तो अपघात : एक हुस्क्याची गजाल

भांगरभूंय | प्रतिनिधी

अपघात! अपघात ही एक हुस्क्याची गजाल जावन आसा. पुलीस खात्याच्या वर्सुकी अपघात विश्लेशणा प्रमाण कळटा की 1 जानेवारी ते 31 डिसेंबर 2024 ह्या एका वर्सां पुराय गोंयभर 2682 अपघात घडले. तांतुतली काळजांक पिळ घालपा सारखी गजाल म्हटल्यार 286 जणांक आपलो जिव व्हगडावचो पडलो.148 गंभीर जखमी जाल्यार 370 जाण किरकोळ जखमी जाल्याचे मुखार आयला. सरकारान कितलेंय जरी कायदे काडले तरी कांय लोक कायद्या नजरआड करताना दिश्टी पडटात आनी तातुंतल्यान हें अशें दिसान दीस अपघात घडपाचें प्रमाण वाडत आसा.
ह्या तेंपार वचत थंय अपघाताच्योच खबरी कानार पडटात. दिसान दीस वाडपी आंकडो. तशेंच गोंयांत 1 जानेवारी ते 10 जुलय ह्या कांळांत वट्ट 1248 अपघात जाल्यात आनी ह्या अपघातांच्या घडणुकांनी 143 जाणांचो जीव गेला. हाचो अर्थ दर दिसा सरासरी 6 अपघात आनी दर 32 वरांनी अपघातांत एकल्याक मरण येता. म्हाका दिसता असो एकूय दीस आसचो ना ज्या दिसा गोंयच्या दिसाळ्या भितर अपघाताची एकूय खबर छापून येवंक ना. अपघाताचीं कारणां साबार आसूं येतात. सोरो पियेवन गाडयो चलप, हेल्मॅट घालप ना, ओव्हरटेक करपाचो यत्न करप, गाडयेची स्पीड वाडवप, आयच्या तरणाट्याच्या हातीन आयल्यो केटीयम सारक्यो गाडयो, तरणाट्यांची स्टंटबाजी, कानांत ईयरफोन घालून गाडी चलोवप, ड्रग्स सेवन करून गाडी चलप, सिट बेल्ट वापरी नासताना गाडी चलप, गाडी चलयतना फोनार उलवप, गाडी चलयतना बराबर आशिल्ल्या मनशावांगडा खबरी उलवप, बेशिस्तपणान गाडी चलप, बायल मनीस
जेन्ना दुचाकीर फाटल्यान बसता तेन्ना चुडीदारा वयलो दुपट्टा वा साडयेचो पदर गाडयेच्या टायरा भिंतूर घुस्पटून अपघात घडटा अशीं साबार कारणां.
मोटार वाहन कायद्या प्रमाण दुचाकी चालकांनी आयएसआय मार्क आशिल्लें हेल्मॅट वापरचे असो कायदो आसा पूण कितलेशेच लोक सादी आयएसआय मार्क नाशिल्ली हेल्मॅट वापरतात जेन्ना केन्ना अपघात घडटा तेन्ना ती फूटून वतात आनी तकलेक मार लागता. आयज कांय लोक पुलीस तालाव मारीत म्हूण फक्त नांवापुरते हेल्मॅट अशा हेल्मॅटाचो वापर करतात अशें दिश्टी पडटात. तशेंच हेल्मॅट हें तकलेक घालपा खातीर आसता पण कांय लोक ते हातीन घालून गाडी चलयतात, कांय लोक पायाकडेन दवरतात, कांय लोक गाडयेच्या डिकीन, वा गाडयेच्या हारशात लावून गाडी चलयतना नजरेक येतात. जेन्ना केन्ना पुलीस मुखार दिसतात पुलीस तालांव मारीत ह्या भंयान त्याच खिणांक हेल्मॅट घालपा सोदतात अशांतल्यान अपघात घडटात.
अशेंय मनीस आसतात हेल्मॅट बराबर आसता पूण ते फाटल्यान बसता त्या मनशा कडेन दितात आनी जेन्ना पुलीस फुड्यांत दिश्टी पडटात नेन्ना गडबडीन हेल्मॅट घालपाचो यत्न करता वा पुलिसांक चुकोवन आडवाटेन पळ काडपा सोदतात हातूंतल्यान अपघात घडटात. कांय चालक गाडी चलयतना हेल्मॅट गाडयेच्या हारशाक लावन दवरतात जेन्ना अपघात घडटा तेन्ना गाडी चालकाच्या तकलेक मार लागता वा गाडीय काबार जाता पूण त्या हेल्मॅट लायल्या हारशाक कांय जायना. आतां हें हेल्मॅट कोणा खातीर आसता . हारशा खातीर आसता वा तकले खातीर? असो प्रस्न पडटा. सांगपाचो उद्देश इतलोच की तेच हेल्मॅट जर चालकान तकलेक घातिल्ले आशिल्ले जाल्यार तकलेक मार लागपा नाशिल्लो.
कितलेशेच लोक बेजबाबदार पणान वागतात. जरी आमच्या गोंयात दुचाकी चलयता ताणीच हेल्मॅट घालव सक्तीचे आसले तरी म्हाका तरी दिसता कोण फाटल्यान बसता ताणीय हेल्मॅट घालव खूब गरजेचे जावन आसा.जिण हीं एकदाच मेळटा. ताची जतनाय दर एकल्याना स्वता घेवप आसता. फाटल्या कांय दिसांनी कांय पेट्रोल पंपार Without Helmet no Petrol अशें बरयले दिश्टी पडटाले. खरेच अशें जर केल्ले जाल्यार कितलेशेच अपघात जावपाचे आमी आडवपाक शकतात अशें म्हणू येता.
गोंयचे येरादारी पुलीस वर्सांन वर्सं येरादारीच्या नियमाच्या पालना विशीं कार्यावळी घडवून हाडीत आसता. ह्या दिसांनी गोंयच्या येरादारी पुलीसांनी ( PROJECT TRUST) एक बऱ्यातलो बरो उपक्रम राबयलो आसा तो म्हटल्या गोंयच्या दर एका स्कूलांत वचून येरादारी नियमांचे पालन आमी कशें करचें. अपघात उणे करपाक आमी कितें करचें.. कितें करचे आनी कितें करचे न्हय हाच्या विशयी जागृताय करपाचे बऱ्यातले बरें कार्य गोंयच्या येरादारी खात्याचे कुडचडे ट्राफीक सेलाचे श्री.शशी रोठोड सारके कितलेशच पुलीस अधिकारी करीत आसात.गोंय पुलीस आतां जनजागृताय, दंडात्मक कारवाय, आनी खाशेली मोहीम चालीक लायतात. पूण अपघात थांबोवपाचे आसल्यार फकत पुलीस न्हय तर दरेका ड्रायव्हराक तशेंच दर एका मनश्यान जागृत रावपाची गरज आसा.
अशें कळटा की जानेवारी 2020 ते जून 2025 ह्या काळांत गोंय पुलिशेच्या येरादारी विभागान येरादारी नेम मोडिल्ले खातीर 22 लाख 43 हजार 534 प्रकरणांची नोंद केला. हाच्या वयल्यान कळटा की आमी मनश्या कशें तऱ्हेन वागतात. अपघात आडावपा खातीर आमी सदांच सादूर रावपाक जाय, सुरक्षेचे नेम पाळपाक जाय आनी आमच्या क्षमताय भितर गाडी चलोवंक जाय.जर समजा दरएकलो जबाबदारीन वागलो जाल्यार आमी जो रस्ते अपघाताचो आकडो दिसान दिस वाडटा तो उणो करू शकता.
मरण हें कोणाक चुकना पूण अशें तरेन बेजबाबदार/ निष्काळजीपणान वागून आमी मरणाक आपोवणें दिवप कित पर्यत योग्य आसा? आमी ह्या संवसारान एकटे आसना जाल्यार आमचें फाटल्यान आमचें कोण ना कोण आसताच… ह्या विशयी दर एकल्यान विचार करपाची काळाची गरज जावन आसा. शेवटाक इतलेंच म्हणन दिसता… आमी जगुया दुसऱ्यांकय जगपा दिवया! दुसऱ्यांक जगोवया… आमच्या निश्काळजीपणा खातीर कोणाचो जीव वचपा ना! आमच्या खातीर कोणाक कसलोच त्रास जावपा ना … आमच्या खातीर कोणाच्या दोळ्यांतल्यान दूख गळचें ना… हांची आमी दर एकलो जतनाय घेवया आनी जबाबदारीन वागुया.