रस्तो अपघातांत मरणां वाडटात; जापसालदार कोण?

भांगरभूंय | प्रतिनिधी

गोंयच्या रस्त्यांचेर मरण सवाय जालां काय कितें? किड्या सारके लोक मरतात आनी संबंदीत पांयांर पांय ओडून बढायो मारतात पोक्या उदरगतीच्यो.

राज्यांत सुमारा भायर रस्त्यांचेर अपघात वाडल्यात. ताचीं कारणां खूब तरेचीं आसूं येतात. देखीक लोक येरादारी कायदे पाळिनासतना वाहनां-दुचाकी चलयतात, सोरो पियेवन चलयतात, रस्त्यार मस्ती करतात, वा फोंडकुलांत पडचे न्हय म्हूण स्वताक साल्वार करीत दुसरे वटेन पावतना अशे अपघात घडूं येतात. घडटात. ताची नोंद मात सरकारी कागदपत्रांनी उरता काय खबर ना.
आदीं वर्साचे अखेरेक आनी सुरवातेक अपघात जातात म्हूण लोक उलयताले. आतांय ते जातात आनी उपरांत ते वर्सभरूय चालू आसतात. अंदूंय वर्साचे सुरवातेक रस्त्यार अपघात जाल्यात आनी अजुनूय जायत आसात. सरकारान मार्च म्हयन्याची अपघातांची आंकडेवारी जारी केल्या. तातूंत ह्या म्हयन्यांत 20 लोकांक अपघाती मरण आयलां अशें म्हणलां. मार्चांत 198 अपघात जाल्यात. तातूंत थोडे किरकोळ अपघातूय आसात. अपघातांत जखमी जाल्ली व्यक्ती कितलो तेंप घरा उरत आनी ताका कामा पसून कितलो तेंप वंचीत रावचें पडत हें सांगूंक जायना. हातूंतल्यान त्या व्यक्तीक लुकसाण जाता आनी ताच्या कुटुंबाकूय.
आतां फाटल्या 6 वर्सांत जाल्ल्या अपघातांची आंकडेवारी पळोवया, जी आंगार कांटो हाडपा सारकी आसा. 2020 वर्सा 216 लोकांक रस्तो अपघातांत मरण आयलां. तशेंच 2021 वर्सांत 219, 2022 वर्सांत 260, 2023 वर्सांत 275, 2024 वर्सा 265 आनी 2025 च्या फाटल्या चार म्हयन्यांत सुमार 90 जाणांक मरण आयलां. हाचें गणीत केलें जाल्यार फाटल्या स वर्सांत सुमार 1300 लोकांक मरण आयलां. गोंयच्या रस्त्यांचेर मरण सवाय जालां काय कितें? किड्या सारके लोक मरतात आनी संबंदीत पांयांर पांय ओडून बढायो मारतात पोक्या उदरगतीच्यो.
आदीं आरटीओ रस्त्यार उबे रावताले तेन्ना लोकांक कायदो पाळपा विशीं जबाबदारी आसताली. आतां ते चड रस्त्यार दिसनात. चड दिसतात ते येरादारी पुलीस, जांचेर कितलेशेच आरोप जातात. ते खरे काय फट हें सरकारान थारावचें. पूण सरकारांतले मंत्री आनी आमदार तांचेर आरोप करतात, तेन्ना गजाल खरी आसतली अशें मानचें पडटा.
रस्त्यांचेर जावपी अपघात आडावपाक सरकार काम करिना अशें म्हणूंक जावचें ना. जेन्ना खंयूय व्हडलो अपघात जालो जाल्यार सरकार रोखडेंच जागें जाता आनी उपाय येवजण्यो घेता म्हूण सांगता. पोरूं मे म्हयन्यांत वेर्णें उद्देगीक वसणुकेंत रस्त्या कुशीचे खोंपीचेर बस चडिल्ल्यान सुमार चार बिगर गोंयकार कामगार आक्ताक सोंपिल्ले आनी पांच जाण जखमी जाल्ले. हो अपघात रातच्या वेळार जाल्ल्यान खोंपींत न्हिदिल्ले कामगार स्वताक वाटावपाक शकले नात. ते उपरांत थंय जमिल्ल्या लोकांनी हे बशीचो ड्रायव्हर पियेल्लो असो आरोप केल्लो. हे खातीर ह्या अपघाता उपरांत कांय दीस रातच्या वेळार पुलीस सोरो पियेवन गाडयो चलयतल्यांक धरपाक लागले. पूण कितले दीस? थोडेच दीस! ह्या अपघाताचेर जसो लोकांचो विसर पडलो तसो ‘सोरो तपासपाचेरय’ सरकाराक विसर पडलो.
हालींच पेहलगाम काश्मिरांत आतंकवादी हल्ल्यांत 28 जाणांक मरण आयलें. ते उपरांत सगले कडेन सुरक्षा वेवस्था वाडयली. वाडोवंकूच जाय. कित्याक तर आतंकवादी केन्ना आनी खंयचे सुवातेक लक्ष्य करीत हें सांगूंक जायना. हे खातीर घडये गोंय पुलिसांनी रातच्या वेळार नाकाबंदी घाल्यो. पूण कितले दीस? पेहलगाम आतंकवादी हल्ल्याचो विसर पडचे आदींच नाकाबंदी नाच्च जाल्यो. आमचीं पुलीस यंत्रणां अशींच चलतात. देखून पर्वरे खून जाल्ले बायलेची कूड गाडयेंत घालून महाराष्ट्रांत उडोवपाक खुन्यांचें फावता. सुरक्षेंत सदळसाण जाली म्हूण त्या त्या वांठारांतल्या पुलिसांचेर कारवाय बी जाता? हांगां स्क्रॅप डिलर, हेर लोकां कडल्यान कथीतपणान खंडणी घेवपी पुलिसांक तात्पुरते निलंबीत करतात आनी उपरांत परत सेवेंत घेतातूच न्हय? खंडणीचें वेसन लागिल्ली व्यक्ती सांपडून साव जातकच परत खंडणी घेवपाची सोडटले? जरी म्हजो विशय ’पुलीस आनी खंडणी’ ना, जाल्यारूय सरकारी यंत्रणां कशीं चलतात ताचेर उजवाड घालपा खातीर आमचे यादीक याद करून दिवप गरजेचें.
सोरो पियेवन अपघात जातात म्हूण सरकारान ’आल्कोमिटर’ वाडयले आनी तालांव दिवपाक सुरवात केली. 2020 वर्सा 1625, 2021 वर्सा 294, 2022 वर्सा 1429, 2023 वर्सा 2060, 2024 वर्सा 5370 आनी 2025 वर्साच्या ह्या कांय म्हयन्यांनी 1330 जाणांक सोरो पियेवन गाडयो चलयतना धरल्यात आनी तांकां तालांव फारीक करपाक लायला. हो आंकडो जरी खूब दिसता, तरीय तसो तो खूब ना. दर्यादेग वांठारांत सोऱ्या सयत, घुंवळे वखदां घेवनूय गाडयो चलोवपी कितलेशेच जाण मेळटले. फक्त ‘आल्कोमिटराक’ अशा लोकांक धरपाचें वेसन लागपाक जाय. तेन्नाच सोरो पियेवन जावपी अपघातांक आळो बसतलो.
दोन वर्सां फाटीं केंद्रीय म्हामार्ग मंत्री नितिन गडकरी हांणी गोंयच्या ‘ब्लॅक स्पॉटां’चेर उपाय काडपा खातीर 100 कोटी रुयया मंजूर केले. हे 100 कोटी कंत्राटदारांनी खाले काय ‘सिस्टमी’न खाले हें लोकांक कळपाक जाय. हेच बरोबर कितल्या ब्लॅक स्पॉटांचेर उपाय काडला आनी कितले उरल्यात हें करदात्याक कळप गरजेचें. तशेंच जर ब्लॅक स्पॉट काडल्यात जाल्यार थंय परत अपघात जाल्यात काय ना हाचेरय नदर दवरप गरजेची.
आतां पावस लागीं पावला. चवथी मेरेन फोंडुकलां दुरुस्त करता म्हणपी सरकाराक जागें करपाची गरज आसा. नाजाल्यार पावसाचें उदक ह्या फोंडकुलांनी भरून उरतलें आनी अपघातांत वाड जातली. मागीर परत चवथीचें निमित्त दिवन वेळ मारून व्हरप समा जावचें ना. फोंडकुलां पुरोवपाचीं सरकाराच्यो सगल्यो येवजण्यो नापास जाल्यात. फोंडकुलांची सुवात दाखोवपाक जारी केल्लो वॉट्सअ‍ॅप नंबर धरून जॅटपॅचर मशीन लेगीत गोंयचीं फोंडकुलां काडपाक शकलें ना. नाजाल्यार अधिकाऱ्यांनी आनी मंत्र्यांनी लोक उलयतात तें चूक म्हूण सिद्ध करचें.

संजय बोरकार
9921343430