भांगरभूंय | प्रतिनिधी
ज्या तरणाट्यांच्या बळार आमी महासत्ता जावपाचें सपन पळयत आसात त्याच तरणाट्यांक अपघातांत मरण येत आसत जाल्यार तें देशाचें व्हड लुकसाण आसा.
उत्तर प्रदेशांतल्या मथुरा एक्सप्रेस वे चेर मंगळारा जिवघेणो अपघात पळोवंक मेळ्ळो. दाट धुक्याक लागून फांतोडेर साडेचार वरांच्या सुमाराक आठ बशी आनी तीन मोटारी एकामेकांचेर आपटल्यो. उपरांत वाहनांनी पेट घेतलो. हातूंत 25 जाणांक लासून मरण आयलें, जाल्यार 59 जाण गंभीर जखमी जाले. ह्या अपघाताक लागून देशभरांत दुख्खाचें ल्हार पातळ्ळें. असो भिरांकूळ अपघात घडिल्ल्याची ही पयलीच घडणूक न्हय. हाचे आदींय अशे खूबशे अपघात देशांत घडल्यात तातूंत लाखांनी लोकांचो जीव गेला. फाटल्या धा वर्सांत देशभरांत जाल्ल्या अपघातांत 15 लाख 30 हजारां परस चड लोकांक मरण आयलां. केंद्रीय रस्तो मंत्रालयान ही आंकडेवारी जाहीर केल्या.
केंद्रीय रस्तो मंत्रालयाच्या संकेत थळार ही आंकडेवारी उपलब्ध आसून ते प्रमाण 2013 ते 2023 ह्या धा वर्सांत रस्तो अपघातांत बळी पडिल्ल्यांचे संख्येंत पयल्या स्थानार उत्तर प्रदेश, दुसऱ्या स्थानार तामिळनाडू जाल्यार तिसऱ्या स्थानार महाराष्ट्राचो नंबर लागता. रस्तो अपघातांत जर इतल्या लोकांक दरवर्सा मरण येता जाल्यार ही हुस्क्याची गजाल आसा. विशेश म्हणल्यार हातूंतलीं चडशीं मरणां ही 20 ते 50 ह्या पिराय गटांतलीं आसात. हाचोच अर्थ रस्तो अपघातांत सगल्यांत चड मरण तरणाट्यांक येत आसा. ज्या तरणाट्यां कडेन देश फुडारांतलो आधारस्तंभ म्हूण पळयता आनी त्याच तरणाट्यांक जर अशें मरण येवंक लागलें जाल्यार तें देशा खातीर व्हड लुकसाणीचें आसा.
फक्त सर्वसामान्य तरणाटोच न्हय जाल्यार देशांतल्या खुबश्या महनीय व्यक्तींक लेगीत रस्तो अपघातांत मरण आयलां. दोन वर्सां पयलीं शिवसंग्राम पक्षाचे संस्थापक अध्यक्ष आनी मराठा समाजाचे फुडारी विनायक मेटे हांकां अपघातांत मरण आयलें. तांच्या मरणान मराठा समाजाचोच न्हय जाल्यार महाराष्ट्राचे व्हड लुकसाण जालें. तांकां आयिल्ल्या अपघाता उपरांत टाटा उद्देग समुहाचे आदले अध्यक्ष आनी नामनेचे उद्देगपती सायरस मिस्त्री हांकां अपघातांत मरण आयलें. सायरस मिस्त्री हांकां गुजरातच्या अहमदाबाद सावन मुंबयक वचपी मार्गार चारोटी कुशीक सुर्या न्हंयच्या पुलार अपघात जालो. सायरस मिस्त्री हांचे देशाच्या उद्देगीक विकासांत म्हत्वाचें योगदान आसा. तांकां आयिल्ल्या मरणान उद्देगीक मळार व्हड दुख्ख पातळिल्लें. सायरस मिस्त्री, विनायक मेटे हांचे सारक्या समाजांतल्या महनीय व्यक्तींक आयिल्ल्या मरणान समाजाचें व्हड लुकसाण जायत आसा. विनायक मेटे, सायरस मिस्त्री हे समाजांतले प्रतिश्ठीत आनी महनीय व्यक्ती आसात म्हणून तांकां आयिल्ल्या मरणाची बातमी जाली. रस्तो अपघातांत दर वर्सा लाखांनी लोकांक मरण येता. देशांत सगल्यांत चड मरण रस्तो अपघातांत जाता. अपघातांत जखमी आनी जीणभर अपंगूळ जावप्यांची संख्या जाल्यार सुमारा भायर आसा.
विशेश म्हणल्यार हातूंत तरणाट्यांचो आस्पाव चड आसा. ज्या तरणाट्यांच्या बळार आमी महासत्ता जावपाचें सपन पळयत आसात त्याच तरणाट्यांक अपघातांत मरण येत आसत जाल्यार तें देशाचें व्हड लुकसाण आसा. खूबशे यत्न करून लेगीत देशांतल्या रस्तो अपघातांची संख्या कित्याक उणी जायना हो एक संशोधनाचो विशय आसा. वाडट्या रस्तो अपघातांक जितली वेवस्था जापसालदार आसा तितलीच मनशाच्यो चुकीय जापसालदार आसात. टोलाच्या माध्यमांतल्यान कोट्यांनी रुपयांची वसुली जायत आसतनाच म्हामार्गार जिवघेणें ब्लॅकस्पॉटांत लेगीत सुदारणा जायना. तेचप्रमाण रस्त्यां वेलीं फोंडकुलां, धुल्लाचें साम्राज्य, म्हामार्गा वेलीं अतिक्रमणां, सर्व्हीस रोडाचो उणाव, रस्त्यार उबीं केल्लीं अवजड वाहनां, बंद पडिल्ल्या वाहनां खातीर उणीं पडत आशिल्लीं मजत केंद्रां, हेडगीं जनावरां, बेवारशी सुणीं, उणे दुभाजक ह्यो गजाली अपघातां खातीर कारण थारत आसात.
सरकाराचीय एक म्हत्वाची जापसालदारकी आसा. सगले रस्ते बरे अवस्थेंत दवरप हें सरकाराचें काम आसा. रस्तो पेड्डेर जालो वा रस्त्यार फोंडकुलां पडलीं जाल्यार तीं रोखडींच पुरोवंक जाय. दुर्दैवान खूबशे रस्ते वर्साचीं वर्सां सामके वायट अवस्थेंत आसतात आनी ताचें मोल सर्वसामान्य लोकांक भोगचे पडटात. हाका लागून खूबशे अपघात जातात आनी खुबश्या जाणांचो जीव वता. पूण तरी लेगीत रस्ते ताकतिकेन दुरुस्त जायनात हाचीं खूबशीं उदाहरणां आसात. रस्ते बरे दवरले आनी तांची देखभाल, दुरुस्ती वेळच्या वेळार केली जाल्यार अपघातांचे प्रमाण नक्कीच उणें जातले.
आयज दरेक जाण आपले सोयी खातीर वाहनांचो वापर करता. ताका लागून वाहनांची संख्या सुमारा भायर वाडल्या. हे वाडटे संख्ये बराबरच अपघातांचे प्रमाण लेगीत दिसानदीस वाडत आसा. शारांनी, चौकांनी, गांवांनी आनी म्हामार्गांचेर दीसपट्टी येरादारीची कोंयडी आनी अपघात जायत आसतात. ह्या अपघातांनी खूबशा निश्पाप लोकांचे बळी वचत आसात. जाल्यार कांय जाण जीणभर अपंगूळ जायत आसात. अपघात टाळपा खातीर सरकारान खुबश्यो उपाय येवजण्यो आनी नेमावळ तयार केल्या. पूण ताका खूब उणें लोक पाळो दिवपाचें काम करतात.
म्हामार्गार वाहन चालक गतीचे मर्यादेक पाळो दिनात. चडशे प्रवाशी 100 किमि परस चड गतीन वाहन चलयतात. ट्रक आनी हेर मोट्या वाहनां कडल्यान लेनीची शिस्त पाळिनात. कांय वाहन चालक सोरो पियेवन वाहनां चलयतात, जाल्यार कांय वाहन चालक वाहन चलयता आसतना मोबायलाचेर उलयतात. आपलें वाहन वेवस्थीत आसप ही काळाची गरज आसा पूण तशें जायना. सीट बेल्ट न लावप ह्यो गजालीय अपघाताक कारण थारतात. नेम खबर आसून लेगीत चालक तांकां पाळो दिनात. सगल्यांकूच उण्यां वेळांत घरा पावपाचें आसता. नेमांक पाळो दिनात म्हूण अपघात जावपाचे प्रकार उणें जायनात.
जगांत सगल्यांत चड रस्तो अपघात भारतांत जातात, हें लक्षांत घेवन लोकांनी सादूर रावल्यार आनी योग्य ती खबरदारी घेत जाल्यार, तशेंच सरकारान आपली जापसालदारकी वळखून खर कारवाय केल्यार अपघातांचें प्रमाण नक्कीच उणें जावंक शकता. ताका लागून अपघातांचे बळी लाक्षणीक रितीन उणें करप हें सगलें आमच्या हातांत आसा हें दरेकान लक्षांत घेवप खूब म्हत्वाचें आसा. जर अपघात उणें जावपाचे आसत जाल्यार वाहन चालकांनी नेमांक पाळो दिवचोच पडटलो. नेम पाळात अपघात टाळात.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
